အစိုးရနှင့်ဆွေးနွေးရာတွင် စွဲကိုင်ရမည့် မူဘောင်များ တိုင်းရင်းသားအဖွဲ့များရေးဆွဲလာ

အစိုးရနှင့် နိုင်ငံရေးဆွေးနွေးရာတွင် တိုင်းရင်းသားလက်နက်ကိုင် အဖွဲ့အစည်းများ လက်စွဲပြုနိုင်မည့် နိုင်ငံရေးတွေ့ဆုံဆွေးနွေးမှု မူဘောင်ကို ဧပြီလအကုန်တွင် အစိုးရအား ချပြရန်ရှိကြောင်း သတင်းရရှိသည်။

““ဧပြီလအကုန်မှာ အဆုံးသတ်နိုင်မယ်။ ပြီးရင် အစိုးရရော၊ တိုင်းရင်းသားလက်နက်ကိုင်အဖွဲ့အစည်း တွေနဲ့ တိုင်းရင်းသားနိုင်ငံရေးပါတီ တွေကို ချပြသွားမယ်”” ဟု မူဘောင် ရေးဆွဲရာတွင် ပါဝင်သူ ချင်းအမျိုး သားတပ်ဦးမှ ဒေါက်တာရွှေခါးရ်က ပြောသည်။

အဆိုပါ နိုင်ငံရေးတွေ့ဆုံမှု မူဘောင်ကို ထိုင်းနိုင်ငံအခြေစိုက် တိုင်းရင်းသား ပူးပေါင်းဆောင်ရွက်ရေးအလုပ်အဖွဲ့ (WGGC) တွင် ပါဝင်သော ချင်းအမျိုးသားတပ်ဦး၊ ကရင်အမျိုးသားအစည်းအရုံး၊ ကချင်လွတ်မြောက်ရေးအဖွဲ့၊ မွန်ပြည်သစ်ပါတီ၊ ကရင်နီအမျိုးသား လွတ်မြောက်ရေးပါတီတို့မှ ကိုယ်စားလှယ်များက ရေးဆွဲထားခြင်းဖြစ်ကြောင်း ဒေါက်တာရွှေခါးရ်က ဆိုသည်။

ထို့ပြင် ထိုင်းနိုင်ငံအခြေစိုက် တိုင်းရင်းသားပူးပေါင်းဆောင်ရွက်ရေးအလုပ်အဖွဲ့သည် ပြည်တွင်းရှိ တိုင်းရင်းသားလူမျိုးများ မဟာမိတ်အဖွဲ့ (UNA) ၊ ညီနောင်တိုင်းရင်းသားများ ဖက်ဒရေးရှင်း (NBF) တို့ မှ ကိုယ်စားလှယ်များနှင့် ဧပြီ ၃၀ ရက်တွင် ထိုင်းနိုင်ငံ၊ ချင်းမိုင်မြို့၌ တွေ့ဆုံမည်ဖြစ်သည်။

၂၀၀၈ ဖွဲ့စည်းပုံအခြေခံဥပဒေအား စစ်အစိုးရက စိတ်ကြိုက်ရေးဆွဲသွားသကဲ့သို့ နိုင်ငံရေးတွေ့ဆုံဆွေးနွေးမှုများတွင် အစိုးရမှ စိတ်ကြိုက်မပြုနိုင်ရန် ရည်ရွယ်ပြီး ရေးဆွဲထားကြောင်း မူဘောင်ရေးဆွဲရာတွင် ပါဝင်သူများထံမှ သိရသည်။

အစိုးရနှင့် နိုင်ငံရေးဆွေးနွေးရာတွင် အဓိကထား ဆွေးနွေးရမည့် အချက်များ၊ တွေ့ဆုံမှုမှရရှိလာမည့် ရလဒ်များကို အကောင်အထည်ဖော်ဆောင်ရေးလုပ်ငန်းများကို နိုင်ငံရေးတွေ့ဆုံဆွေးနွေးမှု မူဘောင်တွင် ထည့်သွင်းရေးဆွဲထားသည်။

ယင်းမူဘောင်ကို ၂၀၁၂ ခုနှစ် နိုဝင်ဘာမှစတင်ပြီး ရေးဆွဲခဲ့ခြင်း ဖြစ်သည်။

More in Politics Section