လက်နက်ကိုင်အဖွဲ့ ထိန်းချုပ်ရာ ဒေသများတွင် အစိုးရတပ်အင်အားတိုးခြင်း အမြန်ဆုံးရပ်ရန်တောင်းဆို

တိုင်းရင်းသားအဖွဲ့များ ထိန်းချုပ်ရာ ဒေသများတွင် အစိုးရ၏တပ်အင်အား တိုးချဲ့နေခြင်းကို အမြန်ဆုံးရပ်တန့်ရန် ရှမ်းတိုင်းရင်းသားနိုင်ငံရေးအင်အားစုများက အစိုးရကို တောင်းဆိုလိုက်သည်။ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD)နှင့် ရှမ်းပြည်တိုးတက်ရေးပါတီ/ရှမ်းပြည်တပ်မတော် (SSPP/SSA)တို့ ပူးပေါင်းပြီး ဧပြီ ၂၅ရက်စွဲဖြင့် ထုတ်ပြန်ခဲ့သည့် ကြေညာချက်တွင် ထည့်သွင်း ဖော်ပြထားခြင်းဖြစ်သည်။

““၀မ်းဟိုင်းကြေညာချက်””ဟု အမည်ပေးထားသော အဆိုပါကြေညာချက်တွင် အဖွဲ့အစည်းအသီးသီးနှင့် ငြိမ်းချမ်းရေးတည်ဆောက်ရာ၌ ငြိမ်းချမ်းရေးဆွေးနွေးပွဲများသို့ အစိုးရက ဖော်ဆောင်နေသလို အခြားတစ်ဖက်က တပ်အင်အားများကို တိုးချဲ့ပြီး တိုင်းရင်းသားအဖွဲ့များ ထိန်းချုပ်ရာဒေသများသို့ ၀င်ရောက်နေသောကြောင့် ထိတွေ့မှုများ ဖြစ်ပေါ်နေရသည်ဟုလည်း ထည့်သွင်းရေးသားထားသည်။

လက်ရှိအချိန်တွင် အစိုးရတပ်များနှင့် ရှမ်းပြည်မြောက်ပိုင်းအခြေစိုက် တိုင်းရင်းသားလက်နက်ကိုင်တပ်ဖွဲ့များသည် ထိပ်တိုက်တွေ့ဆုံမှုအချို့  ဖြစ်ပွားကာ တိုက်ပွဲများလည်း ဖြစ်ပွားခဲ့သည်။ တပ်အင်အား တိုးချဲ့ခြင်းကြောင့် သံသယများဖြစ်ပေါ်ကာ နှစ်ဖက်ကြား ယုံကြည်မှုလည်း လျော့နည်းစေနိုင်ကြောင်း အဆိုပါ ရှမ်းအင်အားစုနှစ်ခုက သတိပေးထားသည်။

တိုင်းရင်းသားအဖွဲ့အစည်းများနှင့် ဖြစ်ပွားနေသည့် ပဋိပက္ခများကို အင်အားသုံးဖြေရှင်းသည့် နည်းလမ်းထက် နိုိင်ငံရေးအရ စားပွဲဝိုင်းတွင်တွေ့ဆုံဆွေးနွေးအဖြေရှာခြင်းသာ ရေရှည်တည်မြဲသည့် ငြိမ်းချမ်းရေးကို တည်ဆောက်နိုင် မည်ဟုလည်း အဆိုပါကြေညာချက်တွင် ဖော်ပြထားသည်။

ယင်းအပြင် မကြာသေးမီက အစိုးရက နိုင်ငံရေးအကျဉ်းသားအချို့ကို လွှတ်ပေးသည့်အပေါ် ကြိုဆိုကြောင်းဖော်ပြခဲ့ပြီး ထပ်မံကျန်ရှိနေသူများအားလည်း လွှတ်ပေးရန် တောင်းဆိုခဲ့သည်။ ဧပြီလ ၂၃ရက် ၌ အစိုးရကပေးခဲ့သော လွတ်ငြိမ်းချမ်းသာခွင့်တွင် နှစ်အကန့်အသတ်မရှိ  အကျဉ်းချထားခံရသည့် ရှမ်းတိုင်းရင်းသား လက်နက်ကိုင်၄၀ဦး ပါဝင်ခဲ့သည်။

More in Politics Section