တောဘဲမန်ဒါလီ သားအုပ်ကို ထမံသီ ဘေးမဲ့တောတွင် တွေ့ရှိ မှတ်တမ်းတင်နိုင်

မျိုးသုဉ်းလုနီးပါးအန္တရာယ်ရှိသည့် တောဘဲမန်ဒါလီ ၁၀ ကောင်ကို ထမံသီတောရိုင်းတိရစ္ဆာန်ဘေး မဲ့တောတွင် ဇွန်လ ၁၇ ရက်က တွေ့ရှိမှတ်တမ်းတင်နိုင်ခဲ့ကြောင်း သား ငှက်တိရစ္ဆာန်ထိန်းသိမ်းရေးအဖွဲ့ (WCS)က ထုတ်ပြန်သည်။

တောဘဲမန်ဒါလီများကို ထမံသီတောရိုင်းတိရစ္ဆာန်ဘေးမဲ့တောအတွင်းရှိ နမ့်အီးစူချောင်းတွင် ထမံသီတောရိုင်းတိရစ္ဆာန်ဘေးမဲ့တော ၀န်ထမ်းများနှင့် သားငှက်တိရစ္ဆာန် ထိန်းသိမ်းရေးအဖွဲ့တို့ ကင်းလှည့်စဉ် တွေ့ရှိခဲ့ပြီး မိခင် တစ်ကောင်နှင့် အကောင်ပေါက်အရွယ် ကိုးကောင် စုစုပေါင်း ၁၀ ကောင်ကိုတွေ့ရှိမှတ်တမ်းတင်နိုင်ခဲ့သည်။

၂၀၁၆ အတွင်းက မိခင်တစ်ကောင်နှင့် အရွယ်ရောက် တောဘဲမန်ဒါလီ ခုနစ်ကောင်၊ စုစုပေါင်း ရှစ်ကောင်ကို တွေ့ရှိမှတ်တမ်းတင်နိုင်ခဲ့သည်။

တောဘဲမန်ဒါလီများသည် နိုင်ငံအချို့တွင်သာ ကျန်ရှိတော့၍ တစ်ကမ္ဘာလုံးတွင် မျိုးသုဉ်းလုနီးပါးအန္တရာယ်ရှိသော မျိုးစိတ်ဖြစ်နေပြီး မြန်မာနိုင်ငံ၌ ချင်းတွင်းမြစ်ဖျား ဟူးကောင်းချိုင့်ဝှမ်းတောရိုင်းတိရစ္ဆာန်ဘေးမဲ့တောနှင့် ထမံသီ တောရိုင်းတိရစ္ဆာန်ဘေးမဲ့တောအတွင်းရှိ မြစ်ချောင်း၊ အင်းအိုင်တို့တွင် ကျက်စားနေထိုင်လေ့ရှိသည်။

၎င်းတို့သည် ၁၉၉၄ တောရိုင်းတိရစ္ဆာန်နှင့် သဘာဝအပင်များကာကွယ်ရေးနှင့် သဘာဝနယ်မြေများထိန်းသိမ်းရေး ဥပဒေအရ လုံးဝကာကွယ်ထားသည့် တောရိုင်းတိရစ္ဆာန်များ စာရင်းတွင် ပါဝင်သည်။

More in Environment Section