သေဆေးသောက်ပြီး ဘ၀ကို အဆုံးသတ်သူများ

India.com

ကိုယ်ကိုယ် ဆေးသောက်ပြီး သတ်သေဖို့ဆိုသည်က သာမန်လူတစ်ယောက်အတွက် တွေးပင်မတွေးရဲသည့် အရာမျိုးဖြစ်သည်။ အထူးသဖြင့် ဗုဒ္ဓဘာသာယဉ်ကျေးမှုထွန်းကားသော မြန်မာပြည်မှာက ပိုဆိုးသည်။ အဘယ်ကြောင့်ဆိုသော် မိမိကိုယ်ကိုယ်သတ်သေခြင်းသည် သံသရာမှာ အဖန်ငါးရာငါးကမ္ဘာတိုင်အောင် ဆက်စပ်အကျိုးခံစားရလေ့ရှိသည်ဟု မြန်မာလူမျိုးများက ယုံကြည်လေ့ရှိကြသည်။ မည်မျှပင် စိတ်သောက အပူကြီးပါစေ သည်လုပ်ရပ်မျိုးကို မြန်မာ လူမျိုးများက ရှောင်လွှဲလေ့ရှိကြ သည်။ မြန်မာလူမျိုးများတွင် မဟုတ်ပါ။ ကမ္ဘာပေါ်ရှိ မိမိအသက်ကို တန်ဖိုးထားကြသူတိုင်း သည်ဖြစ်ရပ်မျိုးကို ကြောက်ကြသည်။ လူတိုင်း သေမျိုးဖြစ်လင့်ကစား သေရမှာကို ကြောက်သဖြင့် အမျိုးမျိုး ကာကွယ်ပြင်ဆင်ပြီး အသက်ရှင်နေထိုင်ကြသည်။ အလွန့်အလွန် ကံဆိုးလွန်းသည့် အခြေအနေတစ်ခုမှာပင် ကြံဖန်အသက်ရှင်ရန် ကြိုးစားကြလေ့ရှိသည်။

သို့သော် အမေရိကန်နိုင်ငံ ကယ်လီဖိုးနီးယားမှာ ၂၀၁၆ ခုနှစ်မှာလူ ၁၁၁ ယောက်သည် ကိုယ့်ကိုယ်ကိုယ် ဆေးသောက်ပြီး သတ်သေသွားကြသည်ဟု ကယ်လီဖိုးနီးယားပြည်နယ် ကျန်းမာရေးဌာနက ဇွန်လ ၂၈ ရက်က သတင်းထုတ်ပြန်ခဲ့သည်။ ထိုလူများသည် အလွန်အမင်း နေမကောင်းဖြစ်နေသူ လူနာများဖြစ်၏။ ကယ်လီဖိုးနီးယားဥပဒေအရ ဆရာဝန်၏ ခွင့်ပြုချက်ဖြင့် သေဆေးသောက်ပြီး သူတို့၏ ဘ၀ကိုအဆုံးသတ်ခဲ့ခြင်းဖြစ်သည်။

သူတို့သည် ဂုဏ်သိက္ခာဖြင့် သေဆုံးခြင်းဆိုသည့် အလွန်အမနာမကျန်းဖြစ်ပြီး အသက်ရှင်ရန် နောက်ဆုံးအချိန်ရောက်နေသော လူနာများကို ဆရာဝန်၏ခွင့်ပြုချက်ဖြင့် သေဆုံးခွင့်ပေးသည့်ဥပဒေအရ တရားဝင် ကိုယ့် ကိုယ်ကိုယ်သတ်သေသွားကြခြင်း ဖြစ်၏။ ၂၀၁၆ ဇွန်လမှာ ကယ်လီဖိုးနီးယားပြည်နယ်က သေ ကောင်ပေါင်းလဲ လူနာများကို သေဆေးသောက်သေခွင့် ပေးသည့် ဥပဒေကို အတည်ပြုခဲ့ပြီးနောက် မိမိကိုယ်ကိုယ် သတ်ပြီးသေဆုံးရန် ရွေးချယ်ခဲ့သူများဖြစ် သည်။

ကယ်လီဖိုးနီးယား ကျန်းမာရေးဌာန၏ အဆိုအရ ယခုသေဆုံးသူစာရင်းသည် ဥပဒေအသက်ဝင်သည့် ဇွန်လ ၉ ရက်ကနေ ၂၀၁၆ ခုနှစ် ဒီဇင်ဘာအထိခြောက်လအတွင်း သေဆုံးသူများ၏ စာရင်း ဖြစ်သည်။ ထိုလူနာများသည် ခြောက်လကြာသာ အသက်ရှည်တော့မည်ဟု ဆရာဝန်များ၏  အသိပေးခံရသူများဖြစ်သည်။ သူတို့သည် ဆရာဝန်၏ ညွှန်ကြားချက်ဖြင့် သေဆေးသောက်ကာ သေဆုံးခဲ့ကြသည်ဟုဆိုသည်။

ထိုကဲ့သို့ သေဆုံးသူလူနာ များ၏ ၈၇ ရာခိုင်နှုန်းမှာ (၆၀)နှင့် (၆၀)နှစ်အထက်များ ဖြစ်သည်။ အများစုက အမေရိကန်လူဖြူ ပညာတတ်များဖြစ်သည်။ သူတို့မှာ ဆေးကုစရိတ်အတွက်ပူစရာ မလိုသော ကျန်းမာရေးအာမခံ လည်းရှိပြီး အိမ်တိုင်ရာရောက် နောက်ဆုံးအချိန်ပြုစုကုသမှုကို ခံယူနေသူများ ဖြစ်သည်ဟု ဆိုသည်။


connectgujarat.com

ကယ်လီဖိုးနီးယားအပြင် အမေရိကန်နိုင်ငံ၌ ဆရာဝန်၏ ခွင့်ပြုချက်ဖြင့် သေဆေးသောက်ပြီး သေနိုင်သော ဒေသငါးခုရှိသည်။ ကော်လိုရာဒို၊ မွန်တားနား၊ ဗားမောင့်၊ ၀ါရှင်တန်ပြည်နယ်နှင့် ၀ါရှင်တန်ဒီစီမြို့တော်တို့ဖြစ်သည်။

ကယ်လီဖိုးနီးယားပြည်နယ် က (၂၉)နှစ်အရွယ်ရှိ ဘရစ်တနီ မေနတ်အမည်ရှိ ဦးနှောက်ကင်ဆာရောဂါသည် အမျိုးသမီးလေးသည် ၂၀၁၄ ခုနှစ်က သူ့ကိုယ်သူ သေဆုံးရန်အတွက် ဗားမောင့်ပြည်နယ်သို့ ပြောင်းခဲ့ပြီး သေခဲ့ရ သည်။ ထို့နောက်ပိုင်းမှာ ကယ်လီဖိုးနီးယားပြည်နယ်၌ သေဆုံးခါနီး လူနာများကို သေဆေးသောက်ပြီး သတ်သေခွင့်ပေးသည့် ဥပဒေကို သတ်မှတ်လိုက်ခြင်း ဖြစ်သည်။ သို့သော် ထိုဆေးကို ဆရာဝန်က အသေအချာစိစစ်ပြီးမှ ထုတ်ပေး ရမည်ဖြစ်သည်။ သောက်ရမည့် လူနာကလည်း ဆရာဝန်လုံးဝလက်လျှော့လိုက်သော၊ ကုသ၍မရနိုင်တော့သည့် လူနာဖြစ်ရန်လိုသည်။

ကယ်လီဖိုးနီးယားပြည်နယ်၏ ဆယ်ပုံတစ်ပုံသာရှိသော အော်ရီဂွန်ပြည်နယ်သည် ၁၉၉၇ ခုနှစ်ကတည်းက အဆိုပါဥပဒေကို ပြဋ္ဌာန်းခဲ့သည်။ ထိုပြည်နယ် သည်ပြီးခဲ့သည့်နှစ်က သေဆေးသောက်ပြီး သေဆုံးသူအသည်းအသန်လူနာ ၂၀၄ ဦးရှိသည်ဟု ဆိုသည်။ သူတို့ထဲအများစုမှာ အ သက် (၆၅)နှစ်အထက်ရှိသူနှင့် ကင်ဆာရောဂါသည်များ ဖြစ်ကြသည်ဟု သိရ၏။

တချို့ကလည်း ထိုကဲ့သို့ လူနာများကို သေဖို့ရွေးချယ်ပေးခြင်းကို ကန့်ကွက်ကြသည်။ အဘယ်ကြောင့်ဆိုသော် ဆေးပညာဆိုသည်မှာ လူနာများကို အသက်ရှည်ရှည်နေနိုင်ရန် ကူညီခြင်းဖြစ်သဖြင့် ယခုဥပဒေသည် ဆေးပ ညာ တိုးတက်လာမှုကို ထိခိုက်စေ သည်ဟုဆိုသည်။

တချို့ကလည်း သည်အချက်သည် ကောင်း၏။ မသေခင်ဝေဒနာကြောင့် ခံစားနာကျင်မှုများကို အဆုံးသတ်စေသည်။ မသေဆုံးဘဲ ကာလရှည်ကြာစွာ ပင်ပန်းဆင်းရဲမှုကနေ သက်သာစေသည်ဟုဆို၏။

 တချို့ကမူ လူနာတွေကို သေခွင့်အား ရွေးချယ်မှုပေးခြင်းဖြင့် ဆုံးဖြတ်ချက်အလျင်စလိုချမှုများ၊ ကုသမှုအမှားအယွင်းများ ဖြစ်လာနိုင်စေသည်။ ထို့အပြင် လူနာတွေကို အသက်ညင်ညင်သာသာ ထွက်စေရေးအတွက် မနာမကျင်ဆေးထိုးပေးသည့် ကုသဆောင်ရွက်မှုများကိုလည်း ထိခိုက်စေနိုင်သည်ဟု ဆိုသည်။

ဖလော်ရီဒါပြည်နယ်ရှိ အသက် (၅၆)နှစ်အရွယ် မြန်မာလူမျိုး ဒေါ်စန်းစန်းကတော့ သည်ကိစ္စသည် မကောင်းဘူးဟုလည်း ပြောရခက်သည်ဟု ဆိုသည်။

‘‘ကိုယ်က မြန်မာလူမျိုးဆိုတော့ ဘာသာရေးအရကိုယ်တို့ဘာသာမှာက မလုပ်သင့်တဲ့အရာပေါ့။ ဒါပေမဲ့ တစ်ခုတော့ရှိတယ်။ ကိုယ်သေရင် ကိုယ့်ဘာသာကိုယ် လုပ်နိုင်ကိုင်နိုင်တဲ့ အနေအထား၊ ဘယ်သူ့ကိုမှ အားမကိုးရတဲ့ အနေအထားမျိုးမှာ သေချင်တယ်။ ကိုယ်က အိပ်ရာထဲပက်လက်ကြီးလဲနေ၊ သူများထူမှထ၊ သူများ ကျွေးမှစားနိုင်၊ သွားနိုင်တာမျိုး ဆိုရင်တော့ အသက်မရှည်ချင်ဘူး။ မြန်မြန်ပြီးအေးရော လုပ်ချင်မလားပဲ။ ကိုယ့်ဘာသာအရ မလုပ်ရဘူးဆိုတာ သိတယ်။ ဒါပေမဲ့ တစ်ခါတလေလည်း အဲဒါမျိုး တွေးမိတယ်’’။

ကယ်လီဖိုးနီးယားပြည်နယ်မှာ အဆိုပါဥပဒေကို ရေးသားသတ်မှတ်ရန်ပါဝင်ခဲ့သူ ပညာရှင်မစ္စတာအက်ဂ်မန်က သည်နှစ်ဆောင်းဦးရာသီမှာ သူတို့ပြည်နယ်အနေဖြင့် သေကောင်ပေါင်းလဲလူနာများကို သေဆေးသောက် သေခွင့်ပေးသည့်ဥပဒေကို ပြန်လည်သုံးသပ်မည်ဟုဆိုသည်။ သူတို့အနေဖြင့် အဆိုပါဥပဒေဖြင့် သေဆေးသောက်သေခဲ့သည့် လူနာများ၏ မိသားစုများကို တွေ့ဆုံဆွေးနွေးပြီး အကျိုးသက်ရောက်မှု မည်သို့ ရှိ၊ မရှိဆိုသည်ကို လေ့လာဆန်းစစ်ဦးမည်ဟုဆိုသည်။

(ကိုးကား-စီဘီအက်စ်နယူးစ်)

Top News