ခြိမ်းခြောက်ခံလာရသော ရွှေ့ပြောင်းကလေးများ၏ ပညာရေးအခွင့်အလမ်း

ထိုင်း-မြန်မာနယ်စပ်ရှိ ရွှေ့ပြောင်းစာသင်ကျောင်းတွင် ပညာသင်ယူနေသော ကလေးများကို ၂၀၁၄ က တွေ့ရစဉ် (ဓာတ်ပုံ − BMWEC)

‘‘စီမံချက်နဲ့ ဖမ်းဆီးမှုတွေထဲမှာကျောင်းဆရာတစ်ဦးပါတယ်။ လိုက်ဖြေရှင်းပေးတဲ့ ကျောင်းအုပ်တစ်ဦးကိုပါဖမ်းပြီး မြဝတီဘက်မှာ ပြန်သွန် (ပို့)ခံလိုက်ရတယ်’’ဟုရွှေ့ပြောင်းဒေသ ဆရာ၊ ဆရာမများအစည်းအရုံး အတွင်းရေးမှူး ဦးနိုင်နိုင်ထွန်းက ပြောသည်။

ထိုင်း-မြန်မာနယ်စပ် တာခ့်ခရိုင်ရှိ မဲဆောက်အပါအ၀င် ထိုင်းနိုင်ငံတွင် တရားမဝင်အလုပ်သမားများ ဖမ်းဆီးလျက်ရှိရာ ရွှေ့ပြောင်း မြန်မာစာသင်ကျောင်းများမှ ဆရာ၊ ဆရာမများပါ ဖမ်းဆီးခံရမှုများ ရှိနေသည်။

ဇွန်လ ၂၈ ရက် နံနက်က ထိုင်းနိုင်ငံ မဲဆောက်မြို့ရှိ ရွှေ့ပြောင်းကလေးများအတွက် ဖွင့်လှစ်ထားသည့် လှိုင်းသစ်ကျောင်းတွင် ပညာသင်ကြားနေသော ဆရာတစ်ဦး ဖမ်းဆီးခံရသည်။ ဖမ်းဆီးခံရမှုကြောင့် ကျောင်းအုပ်ဖြစ်သူ ဆရာဦးဇော်ထက်က ရဲစခန်းသို့သွားရောက်မေးမြန်းရာ ၎င်းပါဖမ်းဆီးခံရပြီး နှစ်ဦးစလုံး မြ၀တီမြို့သို့  ပြန်ပို့(သွန်)ခံလိုက်ရသည်။

လှိုင်းသစ်ကျောင်း၏ကျောင်းအုပ်ဆရာနှင့် ဆရာတစ်ဦး မြန်မာနိုင်ငံသို့ ပြန်ပို့ခံရ၍ စီမံခန့်ခွဲမှုဆောင်ရွက်မည့်သူ မရှိသဖြင့်ကျောင်းပိတ်လိုက်ရပြီး အခြားကျောင်းအချို့လည်း လုံခြုံရေးအခြေအနေကြောင့် ပိတ်ထားရသည်ဟုဆိုသည်။

‘‘လောလောဆယ် ကျောင်း အုပ်အဖမ်းခံရတဲ့ကျောင်းနဲ့ ဖမ်းဆီးမှုစိပ်တဲ့ နေရာအနီးအနားက ကျောင်းသုံးကျောင်းလောက် ပိတ်ထားရတယ်’’ဟု ဦးနိုင်နိုင်ထွန်းက ပြောသည်။

ထိုင်းအစိုးရက အသစ်ပြဋ္ဌာန်းလိုက်သော နိုင်ငံခြားသားအလုပ်သမားဥပဒေအရ ဇွန်လ၂၂ ရက်ကစ၍ ထိုင်းနိုင်ငံတွင်တရားမဝင်အလုပ်လုပ်ကိုင်နေသည့် အလုပ်သမားများနှင့် အလုပ်ရှင်များကို စိစစ်တွေ့ရှိပါက ဖမ်းဆီးကာ နေရပ်သို့ ပြန်လည်စေလွှတ်လျက်ရှိသည်။

ယင်းဥပဒေအရ ထိုင်းနိုင်ငံတွင် တရားမ၀င်လုပ်ကိုင်နေသော အလုပ်သမားများကို ဖမ်းဆီး၍ဒဏ်ငွေများနှင့် ထောင်ဒဏ်ငါးနှစ်အထိ ချမှတ်နိုင်သောကြောင့် ဥပဒေစတင်အသက်ဝင်သည့်နေ့က စ၍ မြန်မာ၊ ကမ္ဘောဒီးယား၊ လာအိုမှ တရားမ၀င် ရွှေ့ပြောင်းအလုပ်သမားများသည် မိခင်နိုင်ငံများသို့ ပြန်လာနေရသည်။

ထိုင်းနိုင်ငံတွင် တရားဝင်နှင့်တရားမဝင် သွားရောက်လုပ်ကိုင်နေသည့် မြန်မာနိုင်ငံသား အလုပ်သမား သုံးသန်းခန့်ရှိနေပြီး ရွှေ့ပြောင်းမြန်မာအလုပ်သမားများ၏ ကလေးငယ်များ၊ မိဘမဲ့မြန်မာကလေးငယ်များအတွက် ထိုင်းနိုင်ငံရောက် မြန်မာအဖွဲ့အစည်း အသီးသီးက စာသင်ကျောင်းများဖွင့်၍ ပညာသင်ကြားပေးနေသည်။

မြန်မာရွှေ့ပြောင်းစာသင် ကျောင်းများသည် ထိုင်းပညာရေး ဌာန(တာခ့်ခရိုင်) အမှတ်(၂) ၏ခွင့်ပြုချက်ဖြင့် ဖွင့်လှစ်ထားခြင်းဖြစ်ပြီး ၂၀၁၆ သြဂုတ်စာရင်းအရ ရွှေ့ပြောင်းစာသင်ကျောင်း ၆၄ ကျောင်း ဖွင့်လှစ်ခွင့်ပြုထားသည်။

မြန်မာကျောင်းသား ၆,၉၄၆ဦး၊ ကျောင်းသူ ၇,၁၆၁ ဦး၊ စုစုပေါင်း ၁၄,၁၀၇ ဦး ရွှေ့ပြောင်းစာ သင်ကျောင်းများတွင် ပညာသင် ယူနေပြီး ထိုင်းအစိုးရ၏ မူဝါဒအပြောင်းအလဲက မြန်မာကလေးများ ပညာရေးကို ခြိမ်းခြောက်မှုရှိ လာခြင်းဖြစ်သည်။

ရွှေ့ပြောင်းစာသင်ကျောင်း မှ ဆရာ၊ ဆရာမများ ဆက်လက်ဖမ်းဆီးခံရပါက ကျောင်းများဖွင့်လှစ်ရန် အခက်တွေ့နိုင်ပြီး မြန်မာကလေးငယ်များအတွက် ပညာရေးကို ထိခိုက်လာနိုင်ကြောင်း ထိုင်း-မြန်မာနယ်စပ် ပညာရေးဆောင်ရွက်နေသည့် အဖွဲ့အစည်းများက ဆိုသည်။

ထိုင်းနိုင်ငံ တာခ့်ခရိုင်အတွင်းရှိ မဲဆောက်၊ ဖုတ်ဖ၊ ဖုတ်ဖရ၊မယ်ပ၊ မယ်ရမတ်၊ ထာ့ဆောင်ယန်း စသည့်ဒေသများတွင် မြန်မာရွှေ့ပြောင်းအလုပ်သမားများ နေထိုင်ပြီး ယင်းတို့နှင့် နီးစပ်ရာနေရာ များတွင် ရွှေ့ပြောင်းစာသင် ကျောင်းများ ဖွင့်လှစ်ထားခြင်းဖြစ်သည်။

ရွှေ့ပြောင်းစာသင်ကျောင်းများမှ ဆရာ၊ ဆရာမများသည် ရွှေ့ပြောင်းအလုပ်သမားများကဲ့သို့ တရားဝင်ပတ်စ်ပို့ ကိုင်ဆောင်ခွင့်မရှိဘဲ Migrant Education Coor-dination Center နှင့် ထိုင်းပညာရေးဌာနက ထုတ်ပေးသော ဆရာဖြစ်ကြောင်း ထောက်ခံချက်ကတ်ပြားကိုသာ ကိုင်ဆောင်ခွင့်ရထားသည်။

‘‘အရင်ကာလတွေက အဲဒီကတ်ပြားနဲ့ သွားလာနေရင်ရပေမယ့် အခု စီမံချက်ကာလမှာ ဖမ်းဆီးခံကြရခြင်းဖြစ်ပါတယ်’’ ဟု ဦးနိုင်နိုင်ထွန်းက ပြောသည်။

ရွှေ့ပြောင်းစာသင်ကျောင်းများတွင် ထိုင်းပညာရေးဌာန၏ ထောက်ခံချက်ကတ်ပြား ကိုင်ဆောင်ခွင့်ရထားသည့် ဆရာ ၂၈၇ ဦး၊ ဆရာမ ၄၅၄ ဦး၊ စုစုပေါင်းဆရာ၊ ဆရာမ ၇၄၁ ဦးရှိနေကြောင်း Migrant Education Coordination Center စာရင်းများအရ သိရသည်။

ဖမ်းဆီးမှုများကြောင့် ရွှေ့ပြောင်းစာသင်ကျောင်းမှ ဆရာ၊ ဆရာမအချို့ မြန်မာနိုင်ငံသို့ ပြန်လာခြင်းမျိုးရှိသကဲ့သို့ အချို့မှာတောထဲတွင် ပုန်းအောင်းနေခြင်းမျိုးလည်းရှိပြီး အချို့ကျောင်းများတွင် မိဘများ အဖမ်းခံထားရသည့် ကျောင်းသားများကို ကျောင်းအိပ်ကျောင်းစားအနေဖြင့် စောင့်ရှောက်ပေးနေရသည်ဟု ဆိုသည်။

‘‘နှစ်နိုင်ငံ အစိုးရအကြား ဒီကိစ္စနဲ့ပတ်သက်လို့  ညှိနှိုင်းတာမျိုး လုပ်ပေးသင့်တယ်။ လတ်တလောပြဿနာကို ဘယ်လိုရှင်းမလဲ၊ ရေရှည်အတွက် ဘာလုပ်ပေးမလဲဆိုတာ မူဝါဒတွေချမှတ်ဆောင်ရွက်ပေးသင့်တယ်’’ဟု ရွှေ့ပြောင်း စာသင်ကျောင်းများတွင် ဆရာဖြစ်သင်တန်းပို့ချခဲ့ဖူးသော ပညာရေးစနစ်ပြုပြင်ပြောင်းလဲရေး နိုင်ငံလုံးဆိုင်ရာ ကွန်ရက်(NNER) မှ ဒေါ်သူသူမာက ပြောသည်။

ရွှေ့ပြောင်းအလုပ်သမားအများစု၏ သားသမီးများသည် ထိုင်းအစိုးရဖွင့်လှစ်သည့် ကျောင်းများသို့ တက်ရောက်ရန် ငွေကြေး၊ ဘာသာစကား အခက်အခဲများရှိခြင်းကြောင့် မြန်မာစေတနာ့ဝန်ထမ်းဆရာ၊ ဆရာမများ သင်ကြားပေးသည့် ရွှေ့ပြောင်းစာသင်ကျောင်းများကိုသာ အားကိုးနေရသည်။

ရွှေ့ပြောင်းစာသင်ကျောင်းများသည် နိုင်ငံတကာအဖွဲ့အစည်းများနှင့် ရွှေ့ပြောင်းမြန်မာအလုပ်သမားများ၏ ထောက်ပံ့မှုဖြင့် ရပ်တည်နေခြင်းဖြစ်သည်။ ယခု မြန်မာအစိုးရလက်ထက်တွင် နိုင်ငံ တကာ အဖွဲ့အစည်းများသည် ရွှေ့ ပြောင်း စာသင်ကျောင်းများအ တွက် ထောက်ပံ့မှုလျှော့ချခြင်းများ ရှိနေသောကြောင့် ထိုင်းနိုင်ငံရှိမြန်မာရွှေ့ပြောင်းစာသင်ကျောင်း များအနေဖြင့် ငွေကြေးအခက်အခဲ နှင့် ကြုံတွေ့နေရသည်ဟု သိရ သည်။

‘‘ဟိုးအရင်ကတော့ ငွေကြေး အထောက်အပံ့နည်းလာတဲ့ အ ခက်အခဲပါ။ အခုချိန်မှာတော့ လုံခြုံမှုဆိုင်ရာ အခက်အခဲက ပိုပြီးရှိလာကြတယ်။ စီမံချက်နဲ့ ဖမ်းဆီးမှု တွေထဲမှာ ကျောင်းဆရာတွေပါ ပါလာတော့ စိုးရိမ်စိတ်တွေ ဖြစ် နေကြတယ်’’ဟု ဦးနိုင်နိုင်ထွန်းက  ပြောသည်။

ထိုင်း-မြန်မာနယ်စပ်ရှိ ရွှေ့ပြောင်းစာသင်ကျောင်းများ အေးချမ်းစွာ ဆက်လက်ဖွင့်လှစ်ရန် စာသင်ကျောင်းတွင် သင်ကြားပေးမည့် ဆရာ၊ ဆရာမများ၏ လုံခြုံ ရေးကို အာမခံပေးနိုင်မည့် နည်း လမ်းများကို တာဝန်ရှိသူများနှင့် ညှိနှိုင်းရန် ရွှေ့ပြောင်းဒေသ ဆရာ၊ဆရာမများ အစည်းအရုံးအနေဖြင့် ကြိုးပမ်းနေသည်။

ထိုင်း-မြန်မာ နယ်စပ်တွင် ရွှေ့ပြောင်းစာသင်ကျောင်းများ ရပ်တည်နိုင်ရေးသာမက မြန်မာနိုင်ငံသို့ ပြန်လာသော ရွှေ့ပြောင်းအလုပ်သမားများ၏ ကလေးငယ်များ ပညာရေးအတွက်လည်း မြန်မာအစိုးရအနေဖြင့် ထည့်သွင်း  စဉ်းစားရန် လိုအပ်နေသည်။

‘‘ထိုင်းဘက်က ပြန်လာကြတဲ့ ကလေးတွေကို မြန်မာအစိုးရကျောင်းတွေက ဘယ်လိုနည်းလမ်းတွေနဲ့ ကျောင်းပြန်လည်လက်ခံနိုင်မလဲဆိုတာလည်း အရေးကြီးတယ်’’ဟု ဦးနိုင်နိုင်ထွန်းက ပြောသည်။

ရွှေ့ပြောင်းကလေးငယ်များကို မြန်မာအစိုးရကျောင်းများတွင် ပြန်လည်လက်ခံနိုင်ရေးအတွက် ပညာရေးဝန်ကြီးဌာန၊ ကျောင်းပြင်ပနှင့် တစ်သက်တာပညာရေး ဦးစီးဌာနသည် ရွှေ့ပြောင်းစာသင်ကျောင်းများမှ ဆရာ၊ ဆရာမများ တွေ့ဆုံကာ ၂၀၁၆ အတွင်း ဆွေးနွေးမှုများရှိသော်လည်း တိကျသည့် မူဝါဒချမှတ်နိုင်ခြင်း မရှိသေးပေ။

‘‘ကလေးအားလုံးပညာသင်ကြားနိုင်ရေးဆိုတဲ့ Education forAll ဆောင်ပုဒ်ကို မြန်မာ-ထိုင်းနှစ်နိုင်ငံစလုံး အကောင်အထည်ဖော်နေကြတာပါ။ ဒါကြောင့် နှစ်နိုင်ငံရဲ့ လက်ရှိချစ်ကြည်ရင်းနှီး ဆက်သွယ်ဆောင်ရွက်နေကြတဲ့ အပေါ်မှာပဲအခြေခံပြီး ညှိနှိုင်းဆောင်ရွက်သွားရင် အဖြေပေါ်လာနိုင်စရာရှိမယ်လို့ ယုံကြည်ပါတယ်’’ ဟု ၎င်းပြောကြားသည်။

Top News