ရခိုင်ပြည်နယ်လွှတ်တော် ဒုဥက္ကဋ္ဌနေရာအတွက် ဦးအောင်ဝင်းကို ANP က ရွေးချယ်

မြေပုံမဲဆန္ဒနယ်အမှတ်(၁)မှ ပြည်နယ်လွှတ်တော်ကိုယ်စားလှယ် ဦးအောင်ဝင်း (ဓာတ်ပုံ − မောင်ကံ)

လစ်လပ်နေသည့် ရခိုင်ပြည်နယ်လွှတ်တော် ဒုဥက္ကဋ္ဌ နေရာအတွက် မြေပုံမဲဆန္ဒနယ်အမှတ် (၁)မှ ပြည်နယ်လွှတ်တော်ကိုယ်စားလှယ် ဦးအောင်ဝင်းကို ရခိုင်အမျိုးသားပါတီ (ANP)က ရွေးချယ်ခဲ့သည်။


ပြည်နယ်လွှတ်တော်ဒုဥက္ကဋ္ဌ ဦးဖိုးမင်းသည် ပြီးခဲ့သည့် ဇွန်လ အတွင်း ကွယ်လွန်ခဲ့သဖြင့် လစ် လပ်နေခြင်းဖြစ်သည်။

ရခိုင် အမျိုးသားပါတီက ပြည်နယ်လွှတ်တော် ဒုဥက္ကဋ္ဌနေ ရာ ရွေးချယ်ရန် ဗဟိုအလုပ်အမှု ဆောင်အဖွဲ့ဝင်များနှင့် ပြည်နယ် လွှတ်တော်ကိုယ်စားလှယ်များ ညှိ နှိုင်းအစည်းအဝေးကို ဇူလိုင် ၁၂ရက်က ပါတီဗဟိုဌာနချုပ်တွင် ပြုလုပ်၍ အနိုင်ရပြည်နယ် လွှတ်တော်ကိုယ်စားလှယ် ၂၁ ဦးကဆန္ဒမဲပေး ရွေးချယ်ခဲ့ခြင်းဖြစ် ကြောင်း ပါတီအထွေထွေအတွင်း ရေးမှူး ဦးထွန်းအောင်ကျော်က ပြောသည်။

‘‘ရခိုင်ပြည်နယ်လွှတ်တော် ဒုဥက္ကဋ္ဌနေရာရရှိရေးအတွက် ရခိုင်အမျိုးသားပါတီက ကိုယ်စား လှယ်လောင်းတစ်ဦးကို ပြည်နယ် လွှတ်တော်ကိုယ်စားလှယ်တွေက ရွေးချယ်ပေးခဲ့တာ ဖြစ်ပါတယ်။ ပါတီတွင်း ယှဉ်ပြိုင်သူ နှစ်ဦးအ နက် ဦးအောင်ဝင်းက မဲအများ ဆုံးနဲ့ အနိုင်ရရှိခဲ့တာဖြစ်ပါတယ်’’ ဟု ဦးထွန်းအောင်ကျော်က ဆို သည်။

ရခိုင်ပြည်နယ်လွှတ်တော် ဒုဥက္ကဋ္ဌနေရာ ရွေးချယ်ခံနိုင်ရေး ရခိုင်အမျိုးသားပါတီသည် ကိုယ် စားလှယ်လောင်း ရွေးချယ်ရေး မူလေးရပ်ကို ဇူလိုင် ၉ ရက်က ပြုလုပ်သည့် ပါတီအစည်းအဝေးတွင် ချမှတ်ခဲ့သည်။

အဆိုပါ မူလေးရပ်သည် ဗဟိုအလုပ်အမှုဆောင် ကော်မတီဝင်ဖြစ်ခြင်း၊ သင့်တော်သော ပညာအရည်အချင်းရှိခြင်း၊ ပါတီအပေါ် သစ္စာရှိသူဖြစ်ခြင်းနှင့် ပါတီကထုတ်ပြန်သော သဘောထားကြေညာချက်များ၊ ညွှန်ကြားချက်များ နှင့် အမိန့်များကို လေးစားလိုက် နာသူဖြစ်ခြင်းတို့ဖြစ်သည်။

အဆိုပါ မူလေးရပ်နှင့် ကိုက် ညီသူလေးဦးကို ပြည်နယ်လွှတ် တော်ဒုဥက္ကဋ္ဌနေရာအတွက် ပါတီ တွင်း ဝင်ရောက်ယှဉ်ပြိုင်ရန် ပါတီကအကြောင်းကြားခဲ့သော်လည်း ကိုယ်စားလှယ်နှစ်ဦးသာ ရွေးချယ်ခံခဲ့ကြောင်း ဦးထွန်းအောင်ကျော် က ပြောသည်။

ရခိုင်အမျိုးသား ပါတီက ပြည်နယ်လွှတ်တော် ဒုဥက္ကဋ္ဌနေ ရာအတွက် သင့်တော်သူကို ရွေး ချယ်ထားပြီဖြစ်ပြီး လွှတ်တော်အ တွင်းသို့ တင်သွင်းရေးတွင် ပြည်နယ်လွှတ်တော်ကိုယ်စားလှယ် များ၏ တာဝန်သာဖြစ်ကြောင်း ၎င်းက ဆက်လက်ပြောသည်။

၂၀၁၅ ရွေးကောက်ပွဲတွင် ရခိုင်ပြည်နယ်လွှတ်တော်နေရာ ၄၇ နေရာတွင် ရခိုင်အမျိုးသား ပါတီက ၂၃ နေရာ အနိုင်ရရှိထား ပြီး ပြည်နယ်လွှတ်တော်ဥက္ကဋ္ဌနှင့် ဒုဥက္ကဋ္ဌနေရာလည်း ရရှိခဲ့ သည်။

Top News