သဘာဝဘေး၏ နှစ်ဆက် ထိုးနှက်ချက်အောက်ဝယ်...

နှိပ်စက်ကြုံတွေ့နေသော သဘာဝဘေးကို ရင်ဆိုင်ရန် အစိုးရတွင် မူဝါဒကောင်းတစ်ရပ်ရှိရန် လိုအပ်နေပြီဖြစ်သည်။ (ဓာတ်ပုံ − ဂျေမောင်မောင်(အမရပူရ))

ရှိစုမဲ့စုငွေကို စုဆောင်းကာ တည်ဆောက်ထားသော သစ်သားအိမ်ကြီးကို ဘဝတူ ကျေးရွာသား များ အကူအညီဖြင့် နေ့ချင်းပြီး ဖြို ချလိုက်ရပြီးနောက် ဦးလှငွေတစ် ယောက် မိသားစုရှေ့ရေးကို တွေး ကာ စိတ်ပျက်လက်ပျက်ဖြစ်နေ သည်။

ဒေသထွက် သစ်ရိုင်းများဖြင့် ၂၀၁၆ စက်တင်ဘာက အသစ်တည်ဆောက်ထားသော လတ်လတ်ဆတ်ဆတ် ခြေတံရှည်အိမ်ကြီးကို သက်တမ်း (၁) နှစ် မပြည့်မီမှာပင် ဦးလှငွေကိုယ်တိုင် ဦး ဆောင်ကာ ဖျက်ချလိုက်ရခြင်းဖြစ် သည်။ အိမ်တိုင်များနှင့် သစ်တို သစ်စများ၊ အနည်းငယ်သာရှိ သော အိမ်တွင်းပရိဘောဂများနှင့် လယ်ယာသုံးပစ္စည်းများကို ဆွေမျိုးတစ်ဦး၏ အိမ်ဘေးတွင် စုပုံထားရကာ ၎င်းနှင့်အတူ မိသားစုဝင်များအားလုံး ဆွေမျိုးများ အိမ်၌ ခိုကပ်နေရသည်။ လယ်ယာသုံး ကျွဲနှင့်နွားများအတွက် ထားစရာ နေရာမရှိ၍ ရေထဲသို့ သစ်ကိုင်း များကိုခုတ်ချကာ ယင်းသစ်ကိုင်းများကိုစုစည်း၍ ကျွဲနှင့်နွား အိမ် မွေးတိရစ္ဆာန်များကို တင်ထားရသည်။

မိမိပိုင်အိမ်ကို ကိုယ်တိုင်ဖြိုချလိုက်ရကာ ဆွေမျိုးတစ်ဦး၏ အိမ်တွင်နေထိုင်နေရသော ဦးလှငွေ နှင့် မိသားစုဝင်များကို အိမ်ခြေမဲ့ ဘဝသို့ ရောက်စေသည့် တရားခံသည် စိုးရိမ်ရေမှတ်အထက်၌ လဝက်ခန့်ကြာ မြင့်တက်ခဲ့သော ချင်းတွင်းမြစ်ရေဖြစ်သည်။

အသက် (၆၀) အရွယ်အိမ်ထောင်ဦးစီးဦးလှငွေက ‘‘ကိုယ်နေတဲ့ အိမ်ကို ဖြိုချပြီး ရေဘေးလွတ်ရာကို ပြေးရတာ။ တော်တော်ဝမ်းနည်းဖို့ကောင်းတယ်။ ရေပြန်ကျ ရင်နေရေးအတွက် တစ်ကပြန်စရ ဦးမယ်’’ ဟု ညည်းတွားသည်။

ဦးလှငွေသည် မကွေးတိုင်း ဒေသကြီးရေစကြိုမြို့နယ် ဇရပ်နီ ကျေးရွာမှဖြစ်ပြီး ဧရာဝတီမြစ်အ နောက်ဘက်နှင့် ချင်းတွင်းမြစ်အ ရှေ့ဘက်ကမ်းတွင် တည်ရှိနေ သောယင်းဒေသသည် ယခုလိုရေ ကြီးနစ်မြုပ်သည့် ကာလရောက် လာပါကဒေသခံများ မျက်ကလူး ဆန်ပျာပြေးကြလွှားကြရသည်။ ဦးလှငွေကဲ့သို့ပင် မြစ်ကမ်းဘေး တွင် နေထိုင်ကြသောကျန်ဒေသခံ အချို့လည်း မိမိတို့ပိုင်ဆိုင်သည့် အိမ်များကို ဖြိုဖျက်ကာရေဘေး လွတ်ရာတိမ်းရှောင်ကြရသည်။ ယခုတစ်ကြိမ်တွင် နေအိမ် ၂၀ ကျော်တစ်ပြိုင်နက် ဖြိုဖျက်လိုက် ရခြင်းဖြစ်ပြီး နီးစပ်ရာ ဆွေမျိုး များနေအိမ်၌ ယာယီနေထိုင်ကြရသည်။

ယခုအကြိမ်နှင့်ဆိုလျှင် ရေ ဘေးကို သုံးနှစ်ဆက်တိုက် ဆိုးရွားစွာ ရင်ဆိုင်ရခြင်းဖြစ်ကြောင်း နေအိမ်ဖြိုဖျက်လိုက်ရသော ဇရပ်နီကျေးရွာဒေသခံများက ပြော သည်။ ၂၀၁၆ ဇူလိုင်ကလည်း မြစ် ရေတက်လာပြီးနောက်ကမ်းဘေး နေရာများကို ရေတိုက်စားရာ ဇရပ်နီကျေးရွာမှ အိမ် ၃၀ ခန့်ဖြိုဖျက်ခဲ့ ရသည်။

‘‘ရေဝင်လာလို့ မနှစ်ကလည်းကမ်းပြိုတယ်။ ဒီနှစ်လည်း ပြို တယ်။ စိုက်ပျိုးစုဆောင်းထားသ မျှ ကုန်တယ်။ သမင်မွေးရင်း ကျား စားရင်း အခြေအနေဖြစ်နေတယ်’’

ဟု ဇရပ်နီကျေးရွာဒေသခံဦးကျော် က စိတ်ပျက်စွာညည်းညူသည်။

လက်ရှိကာလ၌ ရေဘေး သင့်ဒေသများရှိ ကယ်ဆယ်ရေး စခန်းများတွင် စိတ်ပျက်လက်ပျက် ဖြစ်နေသော ရေဘေးသင့်သူအများအပြား မြင်တွေ့နိုင်သည်။ ရေလွတ်ရာ တာပေါင်များပေါ်တွင် ယာယီတဲထိုးကာ မိုးသဲသဲမဲမဲ အောက်၌ ကယ်ဆယ်ရေးပစ္စည်း ရလိုရငြား မျှော်နေသူများကို မြင် နိုင်ပါသည်။

လက်ရှိရေဘေးကာလ၏ အ စက အောက်ပါအတိုင်းဖြစ်သည်။ မြန်မာနိုင်ငံ၏ ဒုတိယရေကြီး ကာ လ ဇူလိုင်အတွင်း ချင်းတွင်းမြစ်ရေ နှင့် ဧရာဝတီမြစ်ရေသည် မြစ်ကမ်း ဘေးမြို့များတွင် စိုးရိမ်ရေမှတ် အထက်သို့ နေ့ချင်း ညချင်းမြင့် တက်လာခဲ့သည်။ ဇူလိုင် ၁ ရက်မှ ယခုဆောင်းပါးရေးနေချိန် ဇူလိုင်၁၇ ရက်အတွင်း ချင်းတွင်းမြစ်နှင့် ဧရာဝတီမြစ်ရေကြောင့် မြစ်ကမ်း ဘေးဒေသများမှ လူဦးရေ ရှစ် သောင်းခန့် ရေဘေးရင်ဆိုင်ခဲ့ရ ကြောင်း လူမှုဝန်ထမ်း၊ ကယ်ဆယ် ရေးနှင့် ပြန်လည်နေရာချထားရေး ၀န်ကြီးဌာန၏ စာရင်းများတွင် ဖော်ပြထားသည်။ ချင်းတွင်းမြစ်မှ ဆင်းလာသော ရေများသည် ဧရာဝတီမြစ်အတွင်း ၀င်ရောက် ကာ ဧရာဝတီမြစ်ကမ်းဘေး မြို့နယ်များတွင်လည်း ရေကြီးနစ်မြုပ် မှုဖြစ်ပေါ်နေသည်။ လတ်တ လောတွင် မြစ်ကြီးများ စိုးရိမ်ရေ မှတ်အထက် ရောက်နေသလို နေရာကွက် မိုးကောင်းနေပြန်၍ ရေကြီးနစ်မြုပ်မှုဒေသ ပိုမိုများပြား လာနိုင်ကြောင်း မိုးလေ၀သနှင့် ဇလဗေဒ ညွှန်ကြားမှုဦးစီးဌာနက သတိပေးထားသည်။

‘‘အရင်တုန်းကတော့ ရေ ဘေးက သုံးနှစ်နဲ့လေးနှစ်ကိုတစ် ကြိမ်လောက်ရင်ဆိုင်ရတာ။ အခု ဆို ၂၀၁၅ ကနေစပြီး ဆက်တိုက် ရင်ဆိုင်နေရတယ်။  ၂၀၁၅ နဲ့ ၂၀၁၆ ရယ် အခုဆို ၂၀၁၇။ ဆို တော့ သုံးနှစ်ဆက်တိုက်ရှိနေပြီ’’ ဟု မိုးလေ၀သနှင့်ဇလဗေဒညွှန် ကြားမှုဦးစီးဌာန ဒုတိယညွှန်ကြား ရေးမှူးချုပ်ဦးကျော်မိုးဦးက ပြောသည်။


မကွေးတိုင်းရှိ ကျေးရွာတစ်ရွာ ရေလွှမ်းမိုးနေသည်ကို ၂၀၁၆ မိုးရာသီက တွေ့ရစဉ် (ဓာတ်ပုံ − ဂျေမောင်မောင်(အမရပူရ))

မြန်မာနိုင်ငံသည် ကမ္ဘာပေါ် တွင် ရာသီဥတုဖောက်ပြန်မှု ဒုတိ ယ အဆိုးရွားဆုံးနိုင်ငံဖြစ်ပြီး သဘာဝဘေးအန္တရာယ် ကျရောက် နိုင်ခြေ ထိပ်တန်း ၁၀ နိုင်ငံတွင် ပါဝင်သည်။

၂၀၀၀ နောက်ပိုင်းကာလ များတွင် သုံးနှစ်တစ်ကြိမ်၊ လေးနှစ် တစ်ကြိမ် တစ်နိုင်ငံလုံးအတိုင်းအ တာဖြင့် ရေဘေးရင်ဆိုင်ရခြင်းဖြစ် ကာ ၂၀၀၄၊၂၀၀၇နှင့် ၂၀၁၁ များ၌ ဆိုးရွားသော ရေဘေးရင်ဆိုင် ခဲ့ရကြောင်း မိုးလေ၀သနှင့် ဇလ ဗေဒညွှန်ကြားမှုဦးစီးဌာန မှတ် တမ်းများတွင် ဖော်ပြထားသည်။ ၂၀၁၅ ဇူလိုင်၊ ဩဂုတ်နှင့်အောက် တိုဘာတို့တွင် ရေဘေးအဆိုးရွား ဆုံးရင်ဆိုင်ခဲ့ရပြီး ယင်းကာလ၌အစိုးရက သဘာဝဘေးကျရောက် ရာဒေသများအဖြစ် ကြေညာခဲ့ရ သည်။

၂၀၁၅ အတွင်း အဆိုးရွားဆုံး ဖြစ်စဉ်တစ်ခုသည် မန္တလေးတိုင်း ဒေသကြီး သပိတ်ကျင်းမြို့နယ် တွင် တောင်ကျရေကြောင့် တစ် နေ့တည်း လူကိုးဦးသေဆုံးကာရှမ်း ပြည်နယ် သီပေါမြို့၌ ရေတိုက် စားခြင်းခံရသော တံတားတစ်စင်း ကျိုးကျမှုကြောင့် လူသုံးဦးသေဆုံး မှု ဇူလိုင် ၂၅ ရက်က တစ်ချိန် တည်းဖြစ်ပွားခဲ့ခြင်းဖြစ်သည်။ ရေဘေးကြောင့် တစ်နေ့တည်း လူ ၁၁ ဦးသေဆုံးခဲ့သည့် ယင်းဖြစ် ရပ်က ရေဘေး၏ ဆိုးရွားမှုကိုမြင် သာစေခဲ့သည်။ ၂၀၁၅အတွင်း  ရေဘေးကာလတွင် ချင်း၊ ရခိုင် ပြည်နယ်၊ မကွေးနှင့် စစ်ကိုင်း တိုင်းဒေသကြီးတို့ကို သဘာဝ ဘေး ကျရောက်ရာဒေသအဖြစ် အစိုးရက ကြေညာခဲ့သည်။ ၂၀၁၆ မိုးရာသီကာလတွင်လည်း ကချင်ပြည်နယ်၊ စစ်ကိုင်း၊ မကွေး၊ ဧရာဝတီတိုင်းဒေသကြီး နှင့် ရခိုင်ပြည်နယ်တွင် လူဦးရေ လေးသိန်းခန့်တစ်ပြိုင်နက် ရေ ဘေးရင်ဆိုင်ခဲ့ရပြီး သေဆုံးသူလူ ဦးရေ ၁၄၀ ခန့်ရှိခဲ့သည်။ အိမ်မွေး တိရစ္ဆာန်အကောင်ရေ သောင်း ချီသေဆုံးခဲ့သည်။

၂၀၁၆ ရေဘေး၏ လက် သည်တရားခံသည် ယခုကာလဖြစ်စဉ်နှင့် တူညီနေသည်။ ချင်းတွင်းမြစ်နှင့် ဧရာဝတီမြစ်ရေ မြင့်တက်ကာ မြစ်ကမ်းဘေးဒေသများ ရေကြီးနစ်မြုပ်ခြင်းဖြစ်သည်။ ယခု လက်ရှိတွင် မြစ်ကြီးများ ဖြစ်သော ဧရာဝတီ၊ ချင်းတွင်း၊ သံလွင်မြစ်တို့ စိုးရိမ်ရေမှတ်အထက်တွင် ရောက်ရှိနေကာ ဒေသတွင်း အခြားမြစ်များလည်း ရေတိုးနေကြောင်း မိုးလေ၀သနှင့် ဇလဗေဒညွှန်ကြားမှုဦးစီးဌာနက သတင်းထုတ်ပြန်ထားသည်။

လက်ရှိရေဘေးရင်ဆိုင်နေရ သော ဒေသများသည် စစ်ကိုင်းတိုင်းနှင့် မကွေးတိုင်းတို့ဖြစ်ပြီး မန္တလေးတိုင်းဒေသကြီးနှင့် ဧရာဝတီတိုင်းဒေသကြီးတွင်လည်း ရေကြီးနစ်မြုပ်မှုများ စတင်ဖြစ်နေသည်။ ချင်းတွင်းမြစ်ရေသည် မြန်မာနိုင်ငံ အထက်ပိုင်းဒေသမှ စတင်စီးဆင်းလာကာ ရေစကြိုနှင့် မြောင်မြို့အနီးမှဖြတ်ကာ ဧရာဝတီမြစ်အတွင်း ၀င်ရောက်ပြီး နောက် ရေကြီးနစ်မြုပ်မှု သက်ဆိုးရှည်နေခြင်းဖြစ်သည်။ ဧရာဝတီမြစ်အတွင်း ၀င်ရောက်ပြီးနောက် မန္တလေး၊ မကွေးနှင့် ဧရာဝတီတိုင်းဒေသကြီးမှ မြစ်ကမ်းဘေးမြို့နယ်များသည် ရေဘေးအန္တရာယ်၏ စိန်ခေါ်မှုကို ရင်ဆိုင်နေရသည်။

၂၀၁၆ ရေဘေးကာလက ရေကြီးနစ်မြုပ်မှု ဆိုးရွားစွာရင်ဆိုင် ခဲ့ရသော သာပေါင်းမြို့နယ်တွင် ရေစတင်ဝင်ရောက်နေကာ ရေ ဘေး ကြိုတင်ကာကွယ်ရေး အစိုးရအနေဖြင့် အင်တိုက်အားတိုက် လုပ်ဆောင်ထားစေလိုကြောင်း ဒေသခံများက သတင်းစကားပါးသည်။


မင်းဘူးမြို့နယ်ရှိ ကျေးရွာတစ်ရွာ ရေလွှမ်းမိုးနေသည်ကို ၂၀၁၇ ဇူလိုင် ဒုတိယပတ်က တွေ့ရစဉ် (ဓာတ်ပုံ − Tin Shwe)

ဇူလိုင်လ အစောပိုင်းက ချင်းတွင်းမြစ်ရေ ၀င်ရောက်၍ ရေကြီးနစ်မြုပ်မှု ရင်ဆိုင်ခဲ့ရသည့် ကလေးဝမြို့နယ်မှ မြို့နယ်အမျိုးသားဒီမိုကရေစီအဖွဲ့ချုပ်ပါတီအတွင်းရေးမှူးက ရေဘေးသင့်ဒေသများ၏ အကျပ်အတည်းကို ယခုလို ပြောဆိုသည်။ ‘‘မြစ်ကမ်းပါးရေတိုက်စားလို့ အိမ်ပျက်သွားတာ။ ကျွဲ၊ နွားတိရစ္ဆာန်တွေ အချိန်မီ မရွှေ့ပြောင်းနိုင်လို့ သေကျေပျက် စီးဆုံးရှုံးရတာ။ သောက်သုံးရေ အခက်အခဲဖြစ်တာ။ ရေကြီး ချိန်ကြာလာရင် စပါးရှိပေမယ့် ဆန်ဖြူပြတ်လပ်လာလို့ စားရေး သောက်ရေး ခက်ခဲလာတာ။ တစ်နိုင်တစ်ပိုင် အလုပ်အကိုင်တွေ ရပ်ဆိုင်းသွားလို့ နေ့စားအလုပ်သမား ပြည်သူတွေဆို စားစရာပြတ်လပ်လာတာ။ မမာမကျန်းအဖြစ် များလာတာ စတဲ့ ရေဘေးဒုက္ခကို ကြုံကြရတယ်။ အထူးသဖြင့် ရေနစ်မြုပ်ပြီး သွားလာဆက်သွယ်ရေးတွေ ပြတ်တောက်သွားတဲ့ အချိန်ကာလဟာ တစ်ပတ်ထက်ပိုလာရင် ရေဘေးဒုက္ခစသင့်လာပါပြီ’’

ကလေးဝမြို့ လမ်းကြောင်း မှန်စာပေနှင့် လူမှုကွန်ရက်မှ ဒေါ်အိအိခိုင်က ရေဘေးကာလတွင် ကယ်ဆယ်ရေးစခန်းသို့ ရောက်သူများသာ ထောက်ပံ့မှုရ ပြီး ရေ၀င်သော်လည်း နေအိမ်များကို စွန့်ခွာမသွားသည့် အိမ်ထောင်စုများသည် ထောက်ပံ့မှုမရ၍ ရေဘေးကျရောက်ရာ ဒေသများ၌ စားနပ်ရိက္ခာ အခက်အခဲကြီးမားစွာရှိနေကြောင်း ဆိုသည်။

ဒေသခံတစ်ဦးဖြစ်သူ ဒေါ်ခိုင် ခိုင်ဦးက ‘‘ရေဘေးသင့်ဒေသတွေ မှာ ကယ်ဆယ်ရေးစခန်းမသွားဘဲ အိမ်ထဲနေကြတဲ့လူတွေလည်း ဒုက္ခ ရောက်တာပဲ။ တကယ်ဆင်းရဲနွမ်းပါးတွေကို အိမ်အရောက်အကူအညီပေးသင့်တယ်။ ၁၀ရက် လောက်ရေနစ်တဲ့အိမ်တွေဆို အလုပ်မလုပ်ရဘူး။ အခြေခံလူတန်း စားတွေမှာရှိတာ ပေါင်နှံစားကြရ တယ်။ တချို့သူတိုိ့အိမ်လေးတွေ မျောပါသွားမှာစိုးလို့ အိမ်အနီးအနားမှာပဲ နေကြတယ်’’ဟု ဆို သည်။

ဒုတိယ ရေကြီးကာလအတွင်း ရေဘေးကြိုတင်ကာကွယ် ရေး အစိုးရနှင့် ပြည်သူလူထု ပူး ပေါင်းချိတ်ဆက်နိုင်မှုက အဓိက အရေးပါနေကြောင်း မိုးလေ၀သပညာရှင် ဒေါက်တာထွန်းလွင်က အကြံပြုသည်။ ယခုဆောင်းပါး ရေးနေသည့် နေ့ရက်များ၏ ရာသီဥတုအခြေအနေသည် တောင် တရုတ်ပင်လယ်မှ အပူပိုင်းမုန် တိုင်း Talas သည် ဗီယက်နမ်ကမ်း ခြေကို ၀င်ရောက်ပြီး ကုန်းတွင်းမုန် တိုင်းအဆင့်ဖြင့် ဆက်လက်တည် ရှိနေ၍ မြန်မာနိုင်ငံ ဒေသအချို့ကို မိုးကောင်းနေစေသည်။ တစ်ချိန်တည်းတွင် ဘင်္ဂလားပင်လယ် အော်၌ လေဖိအားနည်းရပ်ဝန်း ဖြစ်နေ၍ ရန်ကုန်မြို့အပါအ၀င် မြန်မာ့ကမ်းရိုးတန်းဒေသများ မိုး ကောင်းနေပြန်သည်။ ဒေသတွင်း မြစ်များဖြစ်သော ဧရာဝတီ၊ ချင်းတွင်း၊ သံလွင်၊ င၀န်နှင့် တိုးမြစ်တို့သည် စိုးရိမ်ရေမှတ်အထက်တွင် မြင့်တက်နေဆဲဖြစ်သည်။

၂၀၁၅ နှင့် ၂၀၁၆ ရေကြီးနစ် မြုပ်မှုဒဏ် ၂ နှစ်ဆက်တိုက် ရင်ဆိုင်ခဲ့ရပြီး ရေဘေးကယ်ဆယ်ရေး စခန်းတွင် မိသားစုလိုက် ပြောင်းရွှေ့ခဲ့ရသူ ဧရာဝတီတိုင်းဒေသ ကြီး သာပေါင်းမြို့နယ်မှ ဦးထွေးဟန်က ယမန်နှစ်ကအခြေအနေမျိုး မကြုံ တွေ့လိုတော့ကြောင်း ပူပန် စွာ ဖွင့်ဟသည်။

‘‘ရေဘေးဆိုတာ ကြိုလာရ ရင် အိုးပစ်အိမ်ပစ်နဲ့ ကိုယ်ဖြစ် ကိုယ်ခံပါပဲ။ အိမ်ကနေမဖယ်ချင် လို့ ပေကပ်နေရင်းခေါင်မိုးနဲ့ခေါင်း နဲ့ မလွတ်တော့တဲ့အခါ ကယ်ဆယ်ရေးစခန်းပြေးရတာ။ အိမ်မှာကျန် ခဲ့သမျှပစ္စည်း အဟောသိကံဖြစ် ရတာပါပဲ။ အုပ်ချုပ်သူတွေက ကြို ပြီးစီမံခန့်ခွဲမှုကောင်းလို့ သက်သာ ရာရမယ်ဆို ကျွန်တော်တို့ တောသူတောင်သားတွေ အတိုင်းမသိ ဝမ်း သာရမှာပါ။ အခုတော့ရေပြန် တက်လာပြန်ပြီ’’ ဟု ညည်းတွား လေသည်။

Top News