ဆယ်နှစ်ကျော်ကြာ ထုတ်ဝေခဲ့သည့် ဖလားဝါးနယူးစ်ဂျာနယ် ထုတ်ဝေမှု ခေတ္တရပ်နား

ရန်ကုန်မီဒီယာဂရု(ပ်)က အပတ်စဉ်ထုတ်ဝေနေသည့် ဆယ်နှစ်ကျော် သက်တမ်းရှိ ဖလားဝါးနယူးစ်ဂျာနယ်ကို သြဂုတ်ကစတင်၍ ထုတ်ဝေမှု ခေတ္တရပ်နားမည်ဖြစ်ကြောင်း သတင်းရရှိသည်။

သြဂုတ် ၁ ရက် ထုတ်ဝေမည့် ဂျာနယ်အတွဲ(၁၃)၊ အမှတ်(၂၉) ထုတ်ဝေပြီးနောက် ဂျာနယ်ထုတ်ဝေမှုကို ခေတ္တရပ်နားမည်ဖြစ် ကြောင်း ဇူလိုင် ၂၃ ရက်ထုတ် ဖလားဝါးနယူးစ်ဂျာနယ်တွင် အ သိပေးဖော်ပြထားသည်။

စီးပွားရေးတွက်ခြေကိုက်မှု နှင့် သတင်းစာများနှင့် ယှဉ်ပြိုင်ရ မှု အခြေအနေများကြောင့် ထုတ် ဝေမှု ခေတ္တရပ်နားရကြောင်း ဖလားဝါးနယူးစ်ဂျာနယ် အယ်ဒီ တာချုပ် ဦးခိုင်ခန့်ကပြောသည်။


‘‘စီးပွားရေးအရ တွက်ခြေ ကိုက်မှုအခြေအနေတွေကို ဒါရိုက်တာအဖွဲ့က ပြန်ကြည့်ရတာပေါ့နော်။ ပြီးတော့ ၀န်ထမ်းအင်အား ထိန်းညှိချင်တာလည်းပါတယ်။ အဓိကကတော့ သတင်းရရှိမှုတွေမှာ ဂျာနယ်ဖြစ်နေတော့ သတင်းစာတွေနဲ့ မယှဉ်ပြိုင်နိုင် ဖြစ်နေတာကြောင့်လည်း ပါတယ်’’ဟု ဦးခိုင်ခန့်ကပြောသည်။

ရန်ကုန်မီဒီယာဂရု(ပ်) အနေဖြင့် ဖလားဝါးနယူးစ်ဂျာနယ်အပြင် ရန်ကုန်တိုင်းမ်ဂျာနယ်၊ 8Days ဂျာနယ်နှင့် ဒီမိုကရေစီတူဒေး နေ့စဉ်သတင်းစာတို့ကို ထုတ်ဝေနေသည်။

စီးပွားရေးအကျိုးအမြတ်မရ၍ ရပ်တည်ရန်ခက်ခဲလာသဖြင့် ထုတ်ဝေမှုရပ်နားခဲ့သည့် ပုဂ္ဂလိ ကသတင်းစာ၊ ဂျာနယ်အရေအ တွက် တဖြည်းဖြည်းများပြားလာ ပြီဖြစ်သည်။

 ပြန်ကြားရေးဝန်ကြီးဌာန၊ မူပိုင်ခွင့်နှင့် မှတ်ပုံတင်ရုံးမှ ရရှိ သည့် အချက်အလက်များအရ ၂၀၁၁ မတ်လမှ ၂၀၁၇ နှစ်ကုန် တွင် ကဏ္ဍစုံဂျာနယ်ပေါင်း ၈၂ စောင် ရပ်နားပိတ်သိမ်းခဲ့သည်။

ထို့အပြင် သတင်းစာများစတင် ထုတ်ဝေခွင့်ပြုခဲ့သည့် ၂၀၁၃ ဧပြီလမှ လက်ရှိအချိန်အထိ သတင်းစာ ၁၂ စောင် ရပ်နားပိတ်သိမ်းခဲ့သည်ဟု ဆိုသည်။

ယခုရပ်နားခဲ့သည့် ဖလားဝါးနယူးစ်ဂျာနယ်သည် သတင်းဂျာနယ်ခေတ်ဦးအစောပိုင်း ကာလတွင် စတင်ထုတ်ဝေခဲ့သည့် ဂျာနယ်ဖြစ်သည်။

Top News