ရေကြီးနစ်မြုပ်သည့် ဧရိယာများကို ဒရုန်းများဖြင့် ရိုက်ကူး၍ သတင်းအချက်အလက်ရယူ

မြန်မာနိုင်ငံအလယ်ပိုင်းရှိ ရေကြီး မှုဒဏ်ခံနေရသည့် ဒေသများတွင် ရေလွှမ်းမိုးမှုဧရိယာများနှင့် သဘာဝဘေးဒဏ်ခံရမှု အခြေအနေများကိုသိရှိရန် မောင်းသူမဲ့လေယာဉ်များအသုံးပြုကာ ဗီဒီယိုရိုက်ကူးခဲ့ကြောင်း မြန်မာနိုင်ငံလေကြောင်းနှင့် အာကာသပညာတက္ကသိုလ်မှ သတင်းရရှိသည်။

‘‘မင်းဘူးတို့၊ ရေစကြိုတို့ ဘက်တွေမှာ ရိုက်ကူးခဲ့တယ်။အခု ကတော့ ရေကြီးနေတဲ့ ဧရိယာတွေသိအောင်  အရင်လုပ်နေတယ်။ နောက်ပိုင်း ရေပြန်ကျပြီးတော့ ဘယ်လောက်ထိခိုက်မှုရှိခဲ့လဲဆို တာက နောက်တစ်ပိုင်းပေါ့’’ဟု မြန်မာနိုင်ငံလေကြောင်းနှင့် အာ ကာသပညာတက္ကသိုလ် ဒုပါမောက္ခချုပ် ဒေါက်တာကြည်သွင်က ပြောသည်။

မြန်မာနိုင်ငံလေကြောင်းနှင့် အာကာသပညာတက္ကသိုလ်အနေ ဖြင့် အဆိုပါ ရေကြီးမှုဧရိယာများ အား မှတ်တမ်းရိုက်ကူးမှုများကို ကုလသမဂ္ဂစားနပ်ရိက္ခာအဖွဲ့ (UNFAO)၊ လူမှုဝန်ထမ်း၊ ကယ် ဆယ်ရေးနှင့် ပြန်လည်နေရာချ ထားရေးဝန်ကြီးဌာနတို့ဖြင့် ပူး ပေါင်း ဆောင်ရွက်ခဲ့ပြီး မောင်းသူမဲ့လေယာဉ်တစ်ခုနှင့် ဒရုန်းတစ်ခုတို့ကို   အသုံးပြုကာရိုက်ကူးခဲ့ကြောင်း သိရသည်။

‘‘တစ်ခါတည်း  ရိုက်ရင် အောက်ကနေ  တန်းကြည့်နိုင် အောင်လုပ်ထားပြီးတော့ လိုအပ် တဲ့ နေရာတွေအားလုံးကို ရိုက်ကူး ခဲ့ပါတယ်။ မောင်းသူမဲ့လေယာဉ် ကတော့ ပိုပြီးတော့ ကျယ်ကျယ် ပြန့်ပြန့်နဲ့ ရိုက်ကူးနိုင်တာပေါ့။ ဒရုန်းကတော့ လိုအပ်တဲ့နေရာ တွေမှာ ထပ်ပြီးရိုက်ကူးနိုင်ဖို့အ တွက် အသုံးပြုခဲ့ပါတယ်’’ ဟု ဒေါက်တာကြည်သွင်က ဆိုသည်။

ရေကြီးမှုဧရိယာများအား သိရှိနိုင်စေရန်  ရိုက်ကူးခြင်းကို မကွေးတိုင်းရှိ ရေစကြို၊ မင်းဘူးနှင့် ပွင့်ဖြူမြို့နယ်တို့တွင် ပြုလုပ်ခဲ့ပြီး ဇူလိုင် ၂၅ ရက်မှ ၂၈အထိ လေးရက်ကြာ ရိုက်ကူးခဲ့သည်။

Top News