ကိုဆွေဝင်း၏ ရုံးချိန်းများသို့ ဥရောပသမဂ္ဂက တက်ရောက်ကြားနာမည်

ကိုဆွေဝင်းနှင့် မြန်မာနိုင်ငံဆိုင်ရာ ဥရောပသမဂ္ဂ သံအမတ်ကြီး သြဂုတ် ၂ရက်က တွေ့ဆုံစဉ် (ဓာတ်ပုံ − European Union in Myanmar FB)

မန္တလေးမြို့တွင် သွား ရောက်ရင်ဆိုင်ရမည့် Myanmar Now သတင်းဌာနအယ်ဒီတာချုပ် ကိုဆွေဝင်း၏ တရားရုံးချိန်းများသို့ မြန်မာနိုင်ငံဆိုင်ရာ ဥရောပသမဂ္ဂရုံးက တက်ရောက်ကြားနာ မည်ဖြစ်ကြောင်း သတင်းရရှိ သည်။

၎င်းနှင့် မြန်မာနိုင်ငံဆိုင်ရာ ဥရောပသမဂ္ဂသံအမတ်ကြီး ရိုလန်ကိုဘီးယားတို့သည် ဩဂုတ် ၂ ရက်တွင် တွေ့ဆုံဆွေးနွေးမှုများ ပြုလုပ်ခဲ့အပြီး ကိုဆွေဝင်းက အထက်ပါအတိုင်း ပြောကြားခြင်းဖြစ်သည်။

‘‘အစ်ကို့အမှုရဲ့ ဖြစ်စဉ်တွေ ကို မေးမြန်းတယ်။ ဘာအခက်အ ခဲတွေရှိလဲ၊ ဘာတွေရင်ဆိုင်နေရ လဲ အစရှိသဖြင့် ဒါပါပဲ’’ဟု ကိုဆွေဝင်းက သံအမတ်ကြီးနှင့် တွေ့ဆုံမှုကို ပြောသည်။

ကိုဆွေဝင်းကို ဇူလိုင် ၃၀ ရက်ညနေက ရန်ကုန်အပြည်ပြည် ဆိုင်ရာ လေဆိပ်တွင် ရဲတပ်ဖွဲ့က ဖမ်းဆီးခဲ့ပြီး ဇူလိုင် ၃၁ ရက်၌ မန္တလေးမြို့ မဟာအောင်မြေမြို့နယ် တရားရုံးတွင် ရုံးထုတ်၍ ချုပ်ရမန်ယူခဲ့ရာ အာမခံရရှိခဲ့သည်။ ထို့နောက် နှစ်ရက်အကြာတွင် ဥရောပသမဂ္ဂသံအမတ်ကြီးက ကိုဆွေဝင်းနှင့် တွေ့ဆုံခြင်းဖြစ်သည်။

ဥရောပသမဂ္ဂ အနေဖြင့် သတင်းမီဒီယာလွတ်လပ်ခွင့်ကို အားပေးထောက်ခံသည်ဟု သံအ မတ်ကြီးက ပြောဆိုကြောင်း ၎င်းက ပြောသည်။ ၎င်း၏ အမှုနှင့် ပတ်သက်ပြီး ဆွေးနွေးချင်သည် ဟုပြောကာ သံအမတ်ကြီးက ခေါ်ယူသဖြင့် သွားရောက်တွေ့ဆုံခဲ့ကြောင်း ကိုဆွေဝင်းက ပြောကြားသည်။

မြန်မာနိုင်ငံဆိုင်ရာ ဥရောပ သမဂ္ဂရုံးကလည်း ၎င်းတို့၏ လူမှု ကွန်ရက်စာမျက်နှာတွင် သံအ မတ်ကြီးက ကိုဆွေဝင်းနှင့်တွေ့ ဆုံပြီး မြန်မာနိုင်ငံရှိ သတင်းသမား များနှင့် သတင်းမီဒီယာများ လတ် တလော ရင်ဆိုင်နေရသည့် အ ခက်အခဲများကို ဆွေးနွေးပြောဆို ခဲ့ကြောင်း ထုတ်ပြန်သည်။

ကိုဆွေဝင်းသည် ၎င်းအသုံး ပြုသည့် Ba Kaung အမည်ဖြင့် ဖေ့စ်ဘွတ်ခ်လူမှုကွန်ရက်တွင် ‘ဝီရသူပါရာဇိကကျပြီး ရဟန်း ဘဝနိဋ္ဌိတံသွားပြီဖြစ်ကြောင်း သိ ရပါတယ်။ ပါရာဇိကကျတာ ခုမှ ကျတာတော့ မဟုတ်လောက်ဘူး’ စသည့် စာသားများနှင့်အတူ ဦးဝီ ရသူဓာတ်ပုံများကို ရေးသားဖော် ပြခဲ့သဖြင့် ဦးဝီရသူ၏တပည့် မဘသအဖွဲ့ဝင်ဟောင်း ဦးကျော် မျိုးရွှေက ဆက်သွယ်ရေးဥပဒေ ဖြင့် အမှုဖွင့်တိုင်ကြားခဲ့သည်။

‘‘ကိုယ်တို့ မြန်မာပြည်မှာဆို ရင် အင်တာနက်ကို အသုံးပြုပြီး တော့မှ လူ့အဖွဲ့အစည်းကို ပဋိ ပက္ခတွေဖြစ်အောင် လုပ်တယ်၊ လှုံ့ဆော်တာတွေလုပ်တယ်။ ဒါဘယ်သူလဲဆိုတာ အစ်ကိုပြောရင်သိပါတယ်။ အဲဒီလိုလူမျိုးတွေကို အရေးမယူဘဲနဲ့ အဲဒီလိုလုပ်နေတဲ့ သူတွေ တိုင်းပြည်ကို မီးဟုန်းဟုန်း တောက်အောင်လုပ်နေတယ်။ ဘာသာတစ်ခုနဲ့တစ်ခုကြား၊ လူ မျိုးရေးတစ်ခုနဲ့တစ်ခုကြား မီးဟုန်းဟုန်းတောက်အောင် လုပ်ဆောင် နေတဲ့သူတွေ ဖေ့စ်ဘွတ်ခ်ကို အ သုံးပြုလုပ်ဆောင်နေတဲ့သူတွေ ကို ဥပဒေကြောင်းအရ အရေးယူ မခံရဘဲ အဲဒီလူတွေကို သွားဝေ ဖန်တဲ့သူကို အဲဒီဥပဒေက အရေး ယူတယ်ဆိုတော့ ဒီဥပဒေကြီးကို က၊ အသုံးချတာကြီးကိုက၊ ဒီ ဥပဒေရဲ့ သဘောသဘာဝကိုက ပြောင်းပြန်လို ဖြစ်နေတယ်လို့ ကိုယ်ခံစားရတယ်’’ဟု ကိုဆွေဝင်း က ဆက်သွယ်ရေးဥပဒေဖြင့် အရေးယူခံရမှုအပေါ်တွင် မှတ်ချက်ပြုသည်။

မဟာအောင်မြေမြို့နယ် တရားရုံးက ကိုဆွေဝင်း၏အမှု ဒုတိယအကြိမ်ရုံးချိန်းကို ဩဂုတ် ၇ ရက်သို့ ချိန်းဆိုထားသည်။

ကိုဆွေဝင်းက တရားစွဲဆို အမှုဖွင့်ခံရခြင်းနှင့်ပတ်သက်၍ ဧပြီ ၃ ရက်တွင် သာသနာရေးဦးစီး ဌာန၏ သဘောထားမှတ်ချက် တောင်းခံခဲ့ပြီး သာသနာရေးဝန် ကြီးဌာနက အချက်ခုနစ်ချက် ပါဝင်သည့် အကြောင်းပြန်စာကို ဧပြီ ၅ ရက်က ပြန်လည်ပေးပို့ခဲ့ ရာတွင် သာသနာရေးဝန်ကြီးဌာန က ကိုဆွေဝင်းသည် ဦးဝီရသူကို အသရေဖျက်ရာမရောက်ကြောင်း ဖော်ပြထားသည်။ 

သာသနာရေးနှင့် ယဉ်ကျေး မှုဝန်ကြီး သူရဦးအောင်ကိုက ကိုဆွေဝင်း၏ လူမှုကွန်ရက်၌ ဖော်ပြရေးသားချက်သည် ဆက်သွယ် ရေးဥပဒေပုဒ်မ ၆၆(ဃ)နှင့် လွတ် ကင်းကြောင်း RFA သတင်းဌာန အား မတ်လ ၁၁ ရက်တွင် ပြော ကြားထားသည်။

ကိုဆွေဝင်းသည် အင်းဝ အပ်ချုပ်ဆိုင်တွင် အိမ်အကူအမျိုး သမီးငယ်နှစ်ဦးကို ကိုယ်လက် အင်္ဂါချွတ်ယွင်းသည်အထိ နှစ်နှင့် ချီ၍ လူမသိ၊ သူမသိ နှိပ်စက်နေ သည့်အကြောင်း ဖော်ထုတ်ခဲ့သဖြင့် နိုင်ငံတော်သမ္မတရုံးက ဂုဏ်ပြုဆု၊ မြန်မာနိုင်ငံရဲတပ်ဖွဲ့က မှုခင်းများဖော်ထုတ်ရာတွင် အရပ်သားများ ပူးပေါင်းပါဝင်မှုအတွက် ရဲချုပ်ဆု၊ မြန်မာနိုင်ငံသတင်းမီဒီယာကောင်စီက စတုတ္ထမဏ္ဍိုင်ဆုနှင့်သတင်းမီဒီယာအဖွဲ့အစည်းအသီးသီး၏ ဂုဏ်ပြုဆုများ ချီးမြှင့်ခံထားရသူဖြစ်သည်။

More in News Section

Top News