မြောက်ပိုင်း လက်နက်ကိုင်ခုနစ်ဖွဲ့နှင့် တစ်ပြိုင်တည်းတွေ့ရန် အစီအစဉ်မရှိသေးဟု ငြိမ်းချမ်းရေးကော်မရှင်ပြော

တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ် ( NCA) မထိုးရသေးသည့် မြောက်ပိုင်းလက်နက်ကိုင်အဖွဲ့ ခုနစ်ဖွဲ့နှင့် တစ်ပြိုင်တည်းတွေ့ဆုံမည်မဟုတ်ကြောင်း ငြိမ်းချမ်းရေးကော်မရှင်အဖွဲ့ဝင် ဦးအောင်စိုးက ပြောသည်။

‘ဝ’အဖွဲ့ (UWSA)၊ မိုင်းလားအဖွဲ့ (NDAA)၊ ရှမ်းအဖွဲ့ (SSPP) တို့ အပါအဝင် တပ်မတော်နှင့် တိုက်ပွဲဖြစ်ပွားနေသော ကချင်လက်နက်ကိုင်အဖွဲ့ (KIA)၊ တအောင်းအဖွဲ့ (TNLA)၊ ကိုးကန့်အဖွဲ့ (MNDAA)၊ ရခိုင်အဖွဲ့ (AA) စသည့် လက်နက်ကိုင်ခုနစ်ဖွဲ့သည် NCA မထိုးဘဲ အစိုးရ နှင့် နိုင်ငံရေးဆွေးနွေးရန် ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီကို စုဖွဲ့ထားသည်။

‘‘မြောက်ပိုင်းခုနစ်ဖွဲ့လုံးနဲ့ တော့ တစ်ပြိုင်တည်းအစိုးရက မတွေ့ဘူးလို့ပြောပါတယ်။ တစ်ဖွဲ့ချင်းတွေ့မယ်။ အစုအဖွဲ့လေးတွေနဲ့ တွေ့မယ်ပေါ့’’ ဟု ဦး အောင်စိုးက ပြောသည်။

ပြီးခဲ့သည့် မေလက ကျင်းပခဲ့သော ပြည်ထောင်စုငြိမ်းချမ်း ရေး ညီလာခံ-၂၁ ရာစုပင်လုံ ဒုတိယအစည်းအဝေး ဖွင့်ပွဲနေ့သို့ တရုတ်နိုင်ငံ၏ ညှိနှိုင်းပေးမှုဖြင့် မြောက်ပိုင်းခုနစ်ဖွဲ့ တက်ရောက်ခဲ့သည်။ အဆိုပါနေပြည်တော် ခရီးစဉ်တွင် မြောက်ပိုင်းအဖွဲ့များသည် သုံးဖွဲ့၊ လေးဖွဲ့ခွဲ၍ နိုင်ငံတော်၏ အတိုင်ပင်ခံ ပုဂ္ဂိုလ်ဒေါ်အောင်ဆန်းစုကြည်နှင့် လူမှုရေးအရ တွေ့ဆုံမှု ပြုလုပ်ခဲ့သည်။

ထိုသို့ တွေ့ဆုံမှုကြောင့် အစိုးရနှင့် မြောက်ပိုင်းခုနစ်ဖွဲ့အကြား ဆွေးနွေးပွဲဖြစ်လာမည်ဟု မျှော်လင့်ကြောင်း မြောက်ပိုင်းအဖွဲ့ကိုယ်စားလှယ်များက ပြောကြားသည်။ သို့သော် ၂၁ ရာစုပင်လုံဒုတိယအစည်းအဝေး ကျင်းပပြီးသည်မှာ နှစ်လကျော်ကြာပြီ ဖြစ်သော်လည်း ယင်းအဖွဲ့များနှင့် တွေ့ဆုံဆွေးနွေးရန် ဆက်သွယ်ညှိနှိုင်းမှု မရှိသေးပေ။

‘‘တွေ့ဆုံမှုက ဘာမှလည်း လမ်းစမမြင်သေးဘူး။ သူတို့ကတစ်ဖွဲ့ချင်းပဲ တွေ့ချင်တာ။ ကျွန် တော်တို့က မြောက်ပိုင်းခုနစ်ဖွဲ့ စုစည်းပြီးတွေ့ဖို့ ဒီဟာလေးပဲကွာတယ်ထင်တယ်’’ ဟု TNLA ဒုဥက္က ဋ္ဌ တာဂျုတ်ဂျားက ပြောသည်။

မြောက်ပိုင်းခုနစ်ဖွဲ့အနေဖြင့် လက်ရှိ NCA တွင်မပါဝင်ဘဲ ၎င်းတို့ ရေးဆွဲထားသည့် အပစ် ရပ်စဲရေးစာချုပ်မှတစ်ဆင့် နိုင်ငံရေးဆွေးနွေးရန် ပြင်ဆင်နေသည့်အပေါ် တွေ့ဆုံမှုများ ရပ်ဆိုင်းနေခြင်းဖြစ်ကြောင်း ငြိမ်းချမ်းရေးဖြစ်စဉ် လေ့လာသူအချို့က သုံးသပ်ထားသည်။

တစ်ဖက်တွင် အစိုးရအနေ ဖြင့် NCA လက်မှတ်ထိုးရှစ်ဖွဲ့နှင့် တွေ့ဆုံ၍ ၂၁ ရာစုပင်လုံတတိယ အစည်းအဝေးကျင်းပနိုင်ရေး ဆွေးနွေးနေသကဲ့သို့ NCA မထိုးရသေးသည့် လက်နက်ကိုင်အဖွဲ့များဖြင့် စုဖွဲ့ထားသော UNFC ကိုယ်စားလှယ်အဖွဲ့ DPN နှင့်လည်း NCA လက်မှတ်ထိုးနိုင်ရေး ဆက်လက်ညှိနှိုင်းရန် သြဂုတ် ၁၀ ရက်တွင် တွေ့ဆုံမည်ဖြစ်သည်။

More in Politics Section

Top News