လောကနန္ဒာဘေးမဲ့တောတွင် ကြယ်လိပ်ကောင်ရေ ငါးထောင်ခန့်ရှိလာ

လောကနန္ဒာဘေးမဲ့တောအတွင်း စောင့်ရှောက်ထားသော ကြယ်လိပ်များ (ဓာတ်ပုံ − ရွှေဌေးအောင်)

 လောကနန္ဒာဘေးမဲ့ တော ဥယျာဉ်တွင် ထိန်းသိမ်း စောင့်ရှောက်ထားသည့် ရှားပါး စာရင်းဝင် မြန်မာမျိုးစိတ်ကြယ် လိပ်များသည် ၁၆ နှစ်အတွင်း အကောင်ရေ ငါးထောင်ကျော် မျိုးပွားနိုင်ခဲ့ကြောင်း ဘေးမဲ့တော အုပ်ချုပ်ရေးမှူး ဦးရွှေဌေးအောင် က ပြောသည်။

တစ်ကမ္ဘာလုံးတွင် မြန်မာ တစ်နိုင်ငံတည်း၌သာရှိပြီး မျိုး သုဉ်းရန် စိုးရိမ်နေရသည့်အခြေ နေတွင် မြန်မာ့ကြယ်လိပ်များကို လောကနန္ဒာဘေးမဲ့တော ဥယျာဉ်၌ ၂၀၀၁ ကစတင်၍ ခြံလှောင် မွေးမြူခဲ့သည်။

လောကနန္ဒာ ဘေးမဲ့တော ဥယျာဉ်၌ ကြယ်လိပ်များကို စတင်မွေးမြူခဲ့ချိန်က ၈၂ ကောင်သာ ရှိသော်လည်း လက်ရှိတွင် အရွယ်စုံ ကြယ်လိပ် ၅,၀၅၈ ကောင်ရှိလာပြီဖြစ်၍ မြန်မာနိုင်ငံသာမက ကမ္ဘာတွင်ပါ ကြယ်လိပ်အများဆုံးရှိရာ နေရာတစ်ခုဖြစ်လာကြောင်း ၎င်း က ဆိုသည်။

ထို့အပြင် ကြယ်လိပ်များကို မျိုးဆက်မပျက်သုဉ်းစေရန်နှင့် အကောင်ရေ တိုးပွားလာစေရန် နေရင်းဒေသများဖြစ်သည့် မင်းစုံ တောင်သို့ ၂၀၀၈ တွင် ကောင်ရေ ၅၀ နှင့် ၂၀၁၄ တွင် ကောင်ရေ ၁၅၀ နှင့် ၂၀၁၅ တွင် ရွှေ စက်တော်သို့ ကောင်ရေ ၁၅၀ အား သုတေသနပြုလုပ်ရန် ပြန်လည်လွှတ်ပေးခဲ့ကြောင်း ဦးရွှေဌေးအောင်က ပြောသည်။

ရှားပါးစာရင်းဝင် ကြယ်လိပ် သည် မျိုးသုဉ်းရန် နီးကပ်နေ၍ ကမ္ဘာ့ပတ်ဝန်းကျင်ထိန်းသိမ်းရေး အဖွဲ့ (IUCN)၏ မှတ်တမ်းစာအုပ် တွင် မှတ်တမ်းတင်ထားပြီး ကြယ် လိပ်ကို မြန်မာနိုင်ငံရှိ မန္တလေး၊ မကွေးနှင့် စစ်ကိုင်းတိုင်းဒေသ ကြီးတို့၌ တွေ့ရှိနိုင်သည်။

မြန်မာနိုင်ငံတွင် ကုန်းလိပ် နှင့် ရေချိုလိပ် မျိုးစိတ် ၂၆ မျိုးရှိ ပြီး ယင်းအနက် ကြယ်လိပ်အပါ အဝင် မျိုးစိတ်ခြောက်မျိုးသည် မြန်မာနိုင်ငံ၌သာ တွေ့ရှိရသည့် လိပ်မျိုးစိတ်များဖြစ်သည်။

More in News Section