မုံရွာတွင် သုသာန်နှစ်ခုမှ ၀ိညာဉ်များအား ဖယ်ရှားရွှေ့ပြောင်း

ပရလောက၀ိညာဉ်များကို ပြောင်းရွှေ့ဖယ်ရှားနေစဉ် (ဓာတ်ပုံ − မျိုးမင်းဦး)

မုံရွာမြို့သုသာန်နှစ်ခုမှ  ပရလောကသား ၀ိညာဉ်များကိုသြ ဂုတ် ၁၁ ရက်က ကားခြောက်စီး ဖြင့် ဖယ်ရှားပြောင်းရွှေ့ခဲ့ကြောင်းမုံရွာမြို့နယ် စည်ပင်သာယာရေးကော်မတီဥက္ကဋ္ဌ ဦးကျော်မျိုးဝင်းက ပြောသည်။

လူနေအိမ်များနှင့် နီးကပ် နေသောကြောင့် မြို့သစ်ရပ်ကွက် နှင့် အိုးဘိုထောင်ရပ်ကွက် သု သာန်နှစ်ခုကို ဇွန်လ ၂၂ ရက်က စတင်ပိတ်ထားသည်။ ထို့နောက် ပရလောက ၀ိညာဉ်များအား သြဂုတ် ၁၁ ရက် မွန်းလွဲပိုင်းက ဆားကျင်းကျေးရွာအနီး မြို့မသုသာန်သို့ပြောင်းရွှေ့ခဲ့သည်။

‘‘၀ိညာဉ်တွေ၊ ပရလောက သားတွေကို စည်ပင်လုပ်ထုံးလုပ် နည်းနဲ့အညီ ပြောင်းရွှေ့ပြီးပြီဆို တော့ စက်ယန္တရားတွေနဲ့ ရှင်း လင်းရေး လုပ်ငန်းတွေ ဆောင် ရွက်မယ်။ ထုံးစံအတိုင်းကတော့ သုသာန် ပိတ်သိမ်းပြီးပြီဆိုရင် တိုင်းဒေသကြီးအစိုးရ ပိုင်မြေဖြစ် သွားပြီ။ တိုင်းဒေသကြီး အစိုးရ ကနေ စည်ပင်ကမြေလိုအပ်ရင် စည်ပင်ချပေးတယ်။ ဆောက် လုပ်ရေးကလိုရင် ဆောက်လုပ် ရေးချပေးတယ်။ လွှတ်တော်က လိုရင်လွှတ်တော်ကို ချပေးတာ တွေ လုပ်တယ်’’ဟု ဦးကျော်မျိုး ၀င်းက ပြောသည်။

လက်ရှိတွင် ပိတ်သိမ်းသည့် သုသာန်နှစ်ခုအစား ဆားကျင်းနှင့် မြနန္ဒာရပ်ကွက် သုသာန်များ၌ အသုံးပြုနေကြောင်း အိုးဘိုထောင်ရပ်ကွက်အုပ်ချုပ်ရေးမှူး ဦးအေးဇော်ဝင်းက ဆိုသည်။

‘‘အိုးဘိုထောင်သုသာန်က တော့ နှစ်ပေါင်းကြာပြီ။ရွာစတည်ကတည်းကလို့ ပြောလို့ရတယ်။ အခုအသက်ကြီးတဲ့သူတွေလည်း ဘယ်တုန်းက ရွာတည်တာဆိုတာ အတိအကျမသိကြဘူး။ နှစ်ပေါင်းရာကျော်နေပြီပေါ့။ မြို့သစ်သုသာန်ကတော့ ၁၉၉၈ လောက်မှာ အိုးဘိုထောင်ရွာက လယ်ယာမြေတွေကို ၀ယ်ပြီး သုသာန်ပြုလုပ်ခဲ့တာပါ။ အခုတော့ သုသာန်နှစ်ခုစလုံး အသုံးမပြုတော့ဘဲ ဆားကျင်းသုသာန်နဲ့ မြနန္ဒာသုသာန်ကိုပဲ အသုံးပြုနေတယ်’’ဟု ၎င်းကပြောသည်။

ယင်းသုသာန်နှစ်ခု ပိတ် သိမ်းခဲ့သဖြင့် နာရေး ဖြစ်ပေါ်လာပါက နာရေးထောက်ပံ့ငွေ ကျပ်သုံးသောင်းနှင့် ဆားကျင်းနှင့် မြနန္ဒာသုသာန်တွင် သင်္ဂြိုဟ်စရိတ်အခမဲ့ဖြင့် မြို့နယ်စည်ပင်သာယာရေးကော်မတီက ကူညီထောက်ပံ့မည် ဖြစ်သည်။

အိုးဘိုထောင် ရပ်ကွက်နှင့် မြို့သစ်ရပ်ကွက် ဒေသခံများက မုံရွာမြို့၏ မြောက်ဘက်အပိုင်းတွင် သုသာန်၊သင်္ဂြိုဟ်စက် ပြုလုပ်ပေးရန် တောင်းဆိုမှုများရှိခဲ့ပြီး အဆိုပါ သင်္ဂြိုဟ်စက်ပါရှိသော သုသာန်မြေတည်ဆောက်ပေးနိုင်မည့် အချိန်ကာလအထိ ကူညီထောက်ပံ့မှုများ ဆက်လက်ဆောင်ရွက်ပေးမည်ဖြစ်ကြောင်း ဦးအေးဇော်ဝင်းက ဆိုသည်။