ရခိုင်ရှိ ဒုက္ခသည်စခန်းများ၌ စစ်တမ်းကောက်ယူမည်

ရခိုင်ပြည်နယ်ရှိ ကျေးရွာနှင့် ဒုက္ခသည်စခန်း Camp များတွင် ဖွံ့ဖြိုးမှုလုပ်ငန်း များဆောင်ရွက်ပေးနိုင်ရန် ယခုလကုန်တွင် စစ်တမ်းများကောက်ယူမည်ဟု လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေးက  ပြောသည်။


စစ်တမ်းတွင် အလုပ်အကိုင် အခွင့်အလမ်းဆိုင်ရာများ၊ လူမှု ကျွမ်းဝင်ရင်းနှီးပေါင်းစပ်မှုဆိုင်ရာ သဘောထားအမြင်များ၊ ပညာ ရေး၊ ကျန်းမာရေးဆိုင်ရာ ပြည်သူ့ ၀န်ဆောင်မှုရရှိမှုအခြေအနေများ ကောက်ယူမည်ဟု ၀န်ကြီးဌာန ထုတ်ပြန်ချက်တွင်ပါရှိသည်။

ထို့အပြင် သဘာဝဘေးကြုံတွေ့မှုနှင့် ရင်ဆိုင်တုံ့ပြန်ရေးဆိုင်ရာများ၊ နေ့စဉ်စားသုံးမှုနှင့် အစာအာဟာရဆိုင်ရာများကို ကောက်ယူမည်ဖြစ်ကြောင်း ၀န်ကြီးဌာနက ထုတ်ပြန်ထားသည်။

လက်ရှိတွင် အဆိုပါဒေသ၌ လူသားချင်းစာနာမှုလုပ်ငန်းများ ဆောင်ရွက်ပေးနေပြီး ယခုစစ် တမ်းပြီးဆုံးပါက အသက်မွေးဝမ်းကျောင်းလုပ်ငန်းများကို ဆက်လက် ဆောင်ရွက်မည်ဖြစ်ကြောင်း ဒေါက်တာဝင်းမြတ်အေး က ပြောကြားသည်။

‘‘ရခိုင်နဲ့ပတ်သက်ရင် ရခိုင် မှာ Camp တွေရှိတယ်။ ရွာတွေ မှာလည်းရှိတယ်ပေါ့။ ဆိုလိုတာ ကတော့ ကျွန်တော်တို့က ဒါနဲ့ ပတ်သက်ပြီးရင် လူသားချင်းစာ နာထောက်ထားမှုအကူအညီတွေ ပေးနေတယ်’’ဟု သြဂုတ် ၁၂ ရက်က ကျင်းပသည့် မြန်မာ့ဒီမိုကရေစီကူးပြောင်းမှုဖြစ်စဉ် သုံးသပ်ဆွေးနွေးပွဲအပြီး မီဒီယာများ၏ မေးမြန်းမှုကို ပြည်ထောင်စုဝန်ကြီးက ပြန်လည်ဖြေကြားခဲ့သည်။

‘‘တကယ့်လက်တွေ့ဘ၀ တွေကို သိချင်လို့ လေ့လာဆန်းစစ် ချက်တွေကို လုပ်မယ်လို့ပြော တာ’’ဟု ပြည်ထောင်စုဝန်ကြီး ဒေါက်တာဝင်းမြတ်အေးက ပြော သည်။

စစ်တမ်းကောက်ယူမှုကို လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီး ဌာနနှင့်အတူ UNDP မှ သုတေသ နပညာရှင်များ၊ ဆက်စပ်ဝန်ကြီး ဌာနများ၊ ရခိုင်ပြည်နယ် အစိုးရ အဖွဲ့များနှင့် ပူးပေါင်းဆောင်ရွက် မည်ဟု ၎င်းကပြောသည်။

လက်ရှိဆောင်ရွက်နေသော လူသားချင်းစာနာထောက်ထားမှု အကူအညီပေးနေမှုများကို မှန်ကန်လုံလောက်မျှတမှုရှိ၊ မရှိ ပြန်လည်စိစစ်မည်ဖြစ်ပြီး လိုအပ်မှုရှိပါက ဆက်လက်ထောက်ပံ့ပေးမည်ဟု ၎င်းကပြောသည်။

‘‘ဆိုလိုတာက သူတို့ကို ထောက်ပံ့တာနဲ့တွဲပြီး (ထောက်ပံ့တာလည်း လုံးဝမဖြုတ်ဘူး) သူတို့ရဲ့ အလုပ်အကိုင်အခွင့်အလမ်းတွေကို ဖန်တီးပြီးတော့ ဖွံ့ဖြိုးတိုးတက်ရေးဆီကို ဦးတည်သွားမယ်’’ဟု ဒေါက်တာဝင်းမြတ်အေးက ဆိုသည်။

More in News Section

Top News