အားလပ်ရက်မှာ ဖတ်စရာ

အဆုံးရဲ့အစ တစ်ခု(သို့မဟုတ်) ရှစ်ရက်မြောက်နေ့
ဓာတ်ပုံ− နစ်ကီ

- ဒီတစ်ပတ် အားလပ်ရက်မှာ ဖတ်စရာအဖြစ် ပူလစ်ဇာဆု သုံးကြိမ်တိုင် ဆွတ်ခူးခဲ့တဲ့ စာရေးဆရာကြီး သွန်တန်ဝိုင်းလ်ဒါ (Thornton Wilder)ရဲ့ The Eighth Day စာအုပ်ကို စာရေးသူ ဝင့်ပြုံးမြင့် ဘာသာပြန်တဲ့ ရှစ်ရက်မြောက်နေ့ ကို ညွှန်းဆိုလိုက်ပါတယ်။

မူရင်းစာရေးဆရာ သွန်တန်ဝိုင်းလ်ဒါဟာ (၂၀) ရာစု ကမ္ဘာ့စာပေမှာ အလွန်ထင်ရှားသူဖြစ်ပြီး သူရေးသားတဲ့ ဝတ္ထုတချို့ဟာ စာဖတ်သူနဲ့ စာအုပ်ဝေဖန်သူတွေကြား ဂယက်ရိုက်ခတ်ခဲ့ပါတယ်။ ယခုစာအုပ်ကတော့ သူ့ရဲ့ အကောင်းဆုံး လက်ရာလို့သတ်မှတ်ထားပြီး လူသားမျိုးနွယ် တိုးတက်ဖြစ်ထွန်းမှုနဲ့ပတ်သက်လို့ ဆန်းစစ်ကာ ရေးထားတာ ဖတ်ရပါ မယ်။

စာအုပ်မှာလူသတ်မှုတစ်ခုကြောင့် အီလီနွိုက်စ်ပြည်နယ် တောင်ပိုင်းမှာ နေထိုင်တဲ့ မိသား စုနှစ်ခု ဖရိုဖရဲဖြစ်သွားရပုံ၊ လူသတ်တရားခံလို့ စွပ်စွဲခံရတဲ့ ဇာတ်ကောင်ဂျွန်အက်ရ်ှလေက သေမိန့်ကျထားပြီး အသတ်ခံရ မယ့်ဆဲဆဲမှာ လူတစ်စုရဲ့ ကယ်တင်မှုကြောင့် လွတ်မြောက် သွားခဲ့ပုံ၊ အသတ်ခံရတဲ့ သူရဲ့ မိသားစုဝင်တွေနဲ့ စွပ်စွဲခံရတဲ့ မိသားစုဝင်တွေအကြောင်း ပဟေဠိဆန်ဆန် ရေးထားတာဖတ်ရပါ မယ်။ လျှို့ဝှက်သည်းဖိုဆန်သလို ရှေ့ဘာဆက်ဖြစ်မလဲ သိလိုဇောနဲ့ ဖတ်မိရင်လက်က မချချင် အောင် ဆွဲသွားမယ့်ဝတ္ထုမျိုးပါ။ နောက်ဆုံးမှာ သားကဖခင်ကို သတ်တဲ့အကြောင်း သိရပြီး လူ တွေရဲ့ရှုပ်ထွေးလှတဲ့ ဝိရောဓိကို ဆန့်ကျင်ဘက်အမြင်တွေနဲ့ စာရေးဆရာက အံ့သြလောက်ဖွယ် ရေးထားပါတယ်။

ဒါကြောင့် ဘာသာပြန်ဆိုသူက စာအုပ်မိတ်ဆက်မှာ ‘ဇာတ် ကြောင်း အခြေပြုသောခေတ်ကာလသည် ၁၈၈၅ ခုမှ ၁၉၀၀ ကျော်ဖြစ်ရာ မြန်မာပြည်တွင် သီပေါမင်းပါတော်မူသော ခေတ် ကာလနှင့် တိုက်ဆိုင်နေသည်။ စိတ်ဝင်စားစရာကောင်းသည်မှာ ထိုခေတ်ထိုအခါက မြန်မာတို့၏ အတွေးအခေါ်နှင့် နှိုင်းယှဉ်၍ရမည်ဆိုလျှင်စာအုပ်ထဲမှ ဇာတ်ကောင်တို့၏ အတွေးအခေါ်သည် များစွာကွာဟနိုင်ကောင်းသည်။ သာမန်တွေးရိုးတွေးစဉ်အရ အ ဇာတသတ်ဆိုလျှင် မုန်းတီးစက်ဆုပ်စရာ။ ဝိုင်းလ်ဒါ၏ အဇာတ သတ်ကမူ သနားစရာ။ ဤစာအုပ်ကို ဖတ်ရှုပြီးလျှင် သင့်စိတ်ထဲ စနောင့်စနင်း ဖြစ်ခဲ့ပစေဦး၊ ဖတ်ရကျိုးနပ်မည်ဟု ယုံကြည်မျှော်လင့်ပါသည်’ လို့ ရေးထားပါတယ်။

ယခုစာအုပ်ကို တိုးမြစ်စာအုပ်တိုက်က တန်ဖိုး ၄,၅၀၀ ကျပ် နဲ့ ထုတ်ဝေပြီး အိမ်တိုင်ရာရောက် ဖတ်လိုသူတွေ ဖုန်း ၀၉-၇၃၀ ၄၅၂ ၆၄ နဲ့  ၀၉-၄၅၀ ၁၀၀ ၇၄၂ ကို ဆက်သွယ်မှာယူနိုင်ပါတယ်။

Top News