ရာသီချိန် ကုန်ဆုံးတော့မည်ဖြစ်၍ ရှမ်းရင်ကွဲသရက်သီးများ ဈေးတက်

သရက်သီးရာသီချိန် ကုန်ဆုံးတော့မည်ဖြစ်၍ ရှမ်းရင် ကွဲသရက်သီးများ ဈေးကွက်သို့ ဝင်ရောက်မှု နည်းလာကာ ဈေး နှုန်းမြင့်တက်လာသည်။

ရှမ်းရင်ကွဲသရက်သီး ဇူလိုင် ဈေးနှုန်းသည် သေတ္တာကြီးတစ်လုံးလျှင် ၁၂,၀၀၀ ကျပ်ခန့်မှ ၁၃,၀၀၀ ကျပ်ခန့်အထိရှိပြီး စက်တင်ဘာ ပထမပတ်အတွင်း ၁၇,၀၀၀ ကျပ်မှ ၂၅,၀၀၀ ကျပ်အထိ ပေါက်ဈေးရှိကြောင်း သီရိမင်္ဂလာ သရက်သီးဒိုင်များထံမှ သိရသည်။


မြသပြေသစ်သီးပွဲရုံပိုင်ရှင် ဦးဆန်းဝင်းက ‘‘အသီးက ဒိုင်ဆီ မှာတောင် တစ်လုံးပျမ်းမျှဈေး ၄၅၀ လောက်ရှိတယ်။ ဒါ လက် လီရောင်းဈေး မဟုတ်သေးဘူး။ နောက်နှစ်ပတ်လောက်ဆိုရင် သရက်သီး တုံးပြီ’’ဟု ပြောကြား သည်။

ဝယ်လိုအား မြင့်တက်လာ သော်လည်း ထွက်ကုန်နည်းပါး လာ၍ ဈေးတက်ခြင်းဖြစ်ပြီး ရှမ်း ရင်ကွဲသရက်သီးတုံးပါက သရက်သီးရာသီ ပြီးဆုံးပြီဖြစ်ကြောင်း ၎င်းကဆိုသည်။

ရင်ကွဲသရက်သီး သေတ္တာ အကြီးတစ်လုံးလျှင် သရက်သီး အကြီးဆိုပါက အလုံးရေ ၇၀ မှ ၉၀ အထိပါဝင်ပြီး သရက်သီး အရွယ်အစား သေးငယ်ပါက ၁၃၀ ခန့်အထိ ပါဝင်သည်။

စေတနာသစ်သီးပွဲရုံပိုင်ရှင် ဒေါ်တင်တင်လင်းက ‘‘ဒီတစ်ခါ ဈေးတက်တာက ရာသီဥတု ကြောင့် မဟုတ်ပါဘူး’’ဟု ပြော ကြားသည်။

 ရင်ကွဲသရက်သီးများကို ပြည်တွင်းက နှစ်သက်စွာ ဝယ်ယူ စားသုံးပြီး ပြည်ပတင်ပို့ရောင်း ချမှုသည် စိန်တလုံးသရက်သီးကဲ့သို့ တွင်ကျယ်မှုမရှိသေးကြောင်း သိရသည်။

မန္တလေးရင်ကွဲ သရက်သီး ရာသီချိန်သည် မေလအစပိုင်းမှ ဇူလိုင်လကုန်အထိဖြစ်ပြီး ရှမ်းရင်ကွဲ သရက်သီးရာသီချိန်မှာ ဇူလိုင်မှ စက်တင်ဘာလကုန်အထိ ဖြစ်သည်။

 စက်တင်ဘာလကုန်တွင် မြန်မာနိုင်ငံ၌ သရက်သီးထွက်ရှိမှု ကုန်ဆုံးပြီဖြစ်၍ နောက်ပိုင်းတွင် ထိုင်းနိုင်ငံ၊ တရုတ်နိုင်ငံများမှ သရက်သီး ဝင်ရောက်လာမည် ဖြစ်ကြောင်း သရက်သီးဒိုင်များ ကဆိုသည်။

More in News Section

Top News