ပီအက်စ်ဂျီ ဆက်လျှောက်နေဆဲ ငွေခင်းတဲ့ အောင်မြင်မှုလမ်း

နှစ်ထောင်ပြည့်လွန်ဆယ်စုနှစ်ဝက်အတွင်း ‘အောင်မြင်မှုကို ငွေကြေးနဲ့ ဝယ်ယူလို့မရဘူး’ဆိုတဲ့ စကားတစ်ခွန်းက ဘောလုံးလောကမှာ အတော်လေး ခေတ်စားခဲ့ပါတယ်။ နိုင်ငံတကာက ကုဋေကြွယ်သူဌေးတွေကနာမည်ကြီး
ဘောလုံးကလပ်တွေကို ဝယ်ယူပြီးချိန်မှာ ငွေကြေးအလုံးအရင်းသုံးစွဲပြီး ကစားသမားသစ်တွေ ခေါ်ယူ၊ အသင်းကို တောင့်တင်းလာအောင် ငွေကြေးအားကိုးနဲ့ တည်ဆောက်လာတဲ့ အပေါ်မှာ တုံ့ပြန်ဝေဖန်ခဲ့တဲ့ စကားပါ။


 ဒါပေမဲ့ ဒီစကားဟာ ထင်သလောက်တော့ မမှန်ခဲ့ပါဘူး။ ငွေကြေးသုံးစွဲမှုကို အားကိုးပြီး ချယ်လ်ဆီးနဲ့ မန်စီးတီးတို့ဟာ မြန်မြန်ဆန်ဆန် အသွင်ပြောင်းလာတယ်။ ဥရောပရဲ့ ထိပ်သီးအဆင့် ထိ တက်လှမ်းလာတယ်။ အစဉ်အလာအကြီးဆုံး ပြိုင်ဘက်တွေနည်းတူ အောင်မြင်မှုတွေလည်း ရလာတယ်။ အခုနောက်ဆုံး ပြင်သစ်ကလပ် ပီအက်စ်ဂျီဟာလည်း ငွေခင်းပြီး အောင်မြင်မှုလမ်းကြောင်းပေါ် တက်လာပြန်ပါပြီ။ ဒီနှစ်နွေရာသီမှာ ပီအက်စ်ဂျီရဲ့
လုပ်ကွက်တွေက ဥရောပ ဘောလုံးလောကတစ်ခုလုံး အံ့ဩ ငေးမောသွားရလောက်အောင် ရိုက်ခတ်မှုတွေ ပြင်းထန်ခဲ့ပါတယ်။

ပီအက်စ်ဂျီဟာ တစ်ချိန်က ပြည်တွင်းမှာတောင် ဒုတိယတန်းစား အဆင့်လောက်ပဲရှိခဲ့တဲ့ ကလပ်အသင်းတစ်ခုပါ။ ဒါပေမဲ့ ၂၀၁၁ မှာ ကာတာက ကုဋေကြွယ် သူဌေးတွေရဲ့ ဝယ်ယူမှုနဲ့အတူ လျင်လျင်မြန်မြန် ပြောင်းလဲလာခဲ့တယ်။ ထိပ်တန်းကစားသမားသစ်တွေ ဝယ်ယူပြီး အသင်းကို ခမ်းခမ်းနားနား တည်ဆောက်ခဲ့တာကြောင့် ၂၀၁၃ ကနေ ၂၀၁၆ ထိ လေးနှစ်ဆက်တိုက် ပြင်သစ်လီဂူးဝမ်း ချန်ပီယံဖြစ်လာတယ်။ ပြီးခဲ့တဲ့ ရာသီမှာတော့ မိုနာကိုက ကျော်
တက်ပြီး ဗိုလ်စွဲသွားပါတယ်။

တကယ်တော့ ပီအက်စ်ဂျီ အသင်းပိုင်ရှင်တွေ ရည်မှန်းတာဟာ ပြည်တွင်းအောင်မြင်မှုကို ထိန်းသိမ်းဖို့ မဟုတ်ပါဘူး။ ဥရောပထိပ်သီးအဆင့်ထိ တက်လှမ်းဖို့ ဖြစ်ပါတယ်။ ဒီအတွက် အခြေခံ အကျဆုံး လိုအပ်ချက်က ဥရောပ
ချန်ပီယံလိဂ် ဆုဖလားကို ဆွတ်ခူးရယူဖို့ပါ။ ပီအက်စ်ဂျီဟာ ထိပ်သီး ကစားသမားတွေကို ငွေကြေးအရ ဆွဲဆောင် သိမ်းသွင်းနိုင်ခဲ့ပေမယ့် ကမ္ဘာ့အဆင့် ကြယ်ပွင့်တွေကို ခေါ်ယူဖို့တော့ အခက်အခဲတွေ ရှိနေခဲ့တယ်။ ဒီနွေရာသီမှာတော့ ပီအက်စ်ဂျီက အဲဒီကန့်သတ်ချက်ကို ရိုက်ချိုးခဲ့ပါတယ်။

ဘာစီလိုနာ တိုက်စစ်မှူး နေမာကို ကမ္ဘာ့စံချိန်တင် ပြောင်းရွှေ့ကြေး ယူရို ၂၂၂ သန်းနဲ့ ခေါ်ယူပြလိုက်တယ်။ ဒါဟာ ဘယ်သူမှ မျှော်လင့်မထားတဲ့ အပြောင်းအရွှေ့ပါ။ ကမ္ဘာ့ဘောလုံးလောကမှာ အစဉ်အလာ အကြီးမားဆုံး
ကလပ်အသင်းကြီး တစ်ခုရဲ့ အဓိကကစားသမားကို အရခေါ်ယူပြခဲ့တာဖြစ်ပါတယ်။ တစ်နည်းအားဖြင့် ဘောလုံးသမား အရောင်းအဝယ် တစ်ခုထက်ပိုပြီး ပါဝါကစားနည်းတစ်ခုလို့တောင် ယူဆနိုင်ပါတယ်။ ငွေကြေးသက်သက်နဲ့ ကမ္ဘာ့အဆင့် ကစားသမားတွေကိုဆွဲဆောင်ဖို့ မဖြစ်နိုင်ဘူးဆိုတဲ့ သုံးသပ်ချက်တွေကို ကျေပျက်သွားစေတယ်။

ဘာစီလိုနာဟာ နေမာကို အပါမခံချင်ပေမယ့် စာချုပ်ပါ သတ်မှတ်လျော်ကြေးအတိုင်း ပေးချေတဲ့ ပီအက်စ်ဂျီကို မတားဆီးနိုင်ခဲ့ပါဘူး။ ပီအက်စ်ဂျီဟာ ဥရောပဘောလုံးအဖွဲ့ချုပ်ရဲ့ ဘဏ္ဍာရေး ဘက်ညီမျှတမှု သတ်မှတ်ချက်တွေနဲ့အညီ နေမာကို အရခေါ်ပြသွားတာက ဘာစီလိုနာအတွက် ပိုပြီး အခံရခက်စရာ ဖြစ်စေတယ်။ ကိုယ့်ရဲ့ အကောင်းဆုံး ကစားသမားတစ်ယောက်ရဲ့ စိမ်းစိမ်းကားကား စွန့်ခွာမှုက ဘာစီလိုနာအတွက် သိက္ခာပါ ကျစေခဲ့တာ
သေချာပါတယ်။ ဒါကြောင့်လည်း စာချုပ်သဘောတူညီမှု ဖောက်ဖျက်တယ်ဆိုပြီး နေမာကို ဘာစီလိုနာက တရားစွဲပါတော့တယ်။

ပီအက်စ်ဂျီရဲ့ ရည်မှန်းချက်ကြီးကြီး ပြင်ဆင်မှုဟာ ဒီမှာတင် ရပ်မသွားပါဘူး။ ရီးရဲလ်မက်ဒရစ်လို အသင်းမျိုးက အာသာငမ်းငမ်း အလိုရှိနေပြီး ကမ္ဘာ့ဘောလုံးလောကရဲ့ ပါရမီ အပြည့်ဝဆုံး လူငယ်တိုက်စစ်သမားလေးအဖြစ်
သတ်မှတ်ခံရတဲ့ ကိုင်လီယန်မက်ဘီကို အရခေါ်ယူခဲ့ပြန်တယ်။ ဒီခေါ်ယူမှုမှာလည်း ဘဏ္ဍာရေး ဘက်ညီမျှတမှု စည်းမျဉ်းကို ချိုးဖောက်ရာ မရောက်ရအောင် တစ်ရာသီ အငှားခေါ်ယူပြီး လာမယ့်နှစ်မှ ယူရို ၁၄၅ သန်းကနေ ယူရို သန်း ၁၈၀ ကြား ဈေးနှုန်းတစ်ရပ်နဲ့ အပြီးဝယ်ယူဖို့ မိုနာကိုနဲ့ ညှိနှိုင်းထားတယ်။ ကမ္ဘာ့ထိပ်သီး ဘောလုံးအသင်းအများအပြားက လိုလား နေတဲ့ ပြင်သစ် ဆယ်ကျော်သက်လေးကို ပီအက်စ်ဂျီက အကျဉ်းအကျပ် ကြားထဲကနေ
အရခေါ်ယူတဲ့ သဘောပါ။

နောက်ထပ် နွေရာသီ အားဖြည့်မှုအသစ်တွေ အနေနဲ့ ဘရာဇီး ဝါရင့် တောင်ပံခံစစ်မှူးကြီး ဒန်နီအဲလ်ဗက်စ်ကို အလွတ်ပြောင်းရွှေ့ကြေးနဲ့ ခေါ်ယူလိုက်တယ်။ ရီးရဲလ်ဆိုစီဒက် နောက်ခံလူ ယူရီဘာချီချီကို ယူရို ၁၆ သန်းနဲ့ ဝယ်ထားတယ်။ ဆာဂျီအော်ရီရာ၊ ဘလာစီ မာတွိုင်ဒီတို့ အပါအဝင် ကစားသမား ခုနစ်ယောက်ကို ထွက်ခွာခွင့် ပြုလိုက်တယ်။ အခုရာသီ ပီအက်စ်ဂျီရဲ့ လူစာရင်းဟာ ပိုမိုကျစ်လျစ်ပြီး ဥရောပရဲ့ ရေပေါ်ဆီ ထိပ်သီးတွေနဲ့ တန်းတူ၊ ဒါမှမဟုတ် တန်းတူနီးပါး ယှဉ်နိုင်တဲ့အဆင့်ကို ရောက်ရှိလာပါပြီ။

တိုက်စစ်မှာ နေမာနဲ့ မက်ဘီတို့ကို အီဒင်ဆန် ကာဗာနီနဲ့ တွဲဖက်ပေးထားပြီး အရန်ခုံမှာ အိန်ဂျယ်လ်ဒီမာရီယာ၊ ဂျူလီယန် ဒရိုက်ဆလာ၊ လူးကက်စ်မိုရာတို့ အဆင်သင့် ရှိနေပါတယ်။ ကွင်းလယ်မှာ မာကိုဗာရတ်တီ၊ သီယာဂိုမော့တာ၊ ဟေတမ်ဘန်အာဖာ၊ ဟာဗီးယား ပက်စ်တိုရီ၊ အက်ဒရီယန် ရာဘီယော့၊ ခရစ္စတိုဖာ အန်ကူလူတို့ ရှိနေပြီး ဘယ်လို ပြိုင်ဘက်ကိုမဆို ရင်ဆိုင်နိုင်တဲ့စုဖွဲ့မှုပါ။ သီယာဂိုဆေးလ်ဗား၊ မာကွင်ဟော့စ်၊ လေဗင်ကာဇာဝါတို့နဲ့ တောင့်တင်းပြီးသားခံစစ်ကို အဲလ်ဗက်စ် လာရောက်ပူးပေါင်းမှုက အရာရာ ပြည့်စုံသွားစေတယ်။ အရန်ခုံမှာ ပရင်စ်နဲလ် ကင်ပန်ဘီ၊ သောမတ်စ် မြူနီယာတို့အပြင် အသစ်ခေါ်ယူထားတဲ့ ဘာချီချီပါ ရှိနေတယ်။ ဂိုးသမား နေရာကလည်း ကီဗင်ထရပ်ရော၊ အယ်လ်ဖွန်ဆီ အာရီယိုလာပါ ဥရောပတန်းဝင် အဆင့်မျိုးတွေ ဖြစ်ကြတယ်။

အောင်မြင်မှုကို ငွေနဲ့ ဝယ်လို့မရဘူးဆိုတဲ့ စကားဟာ ပီအက်စ်ဂျီ အတွက်တော့ ရယ်စရာဖြစ်နေမှာပါ။ အခုရာသီမှာလည်း လီဂူးဝမ်း အဖွင့်ငါးပွဲစလုံး သက်သောင့်သက်သာ အနိုင်ရထားပြီးပြီ။ ငါးပွဲကစား၊ ငါးပွဲနိုင်ထားတဲ့အပြင်
သွင်းဂိုး ၁၉ ဂိုးနဲ့ ဇယားထိပ်မှာ ဦးဆောင်နေပါတယ်။ ဒါပေမဲ့ ဒီထက်ပိုပြီး အလေးအနက် စောင့်ကြည့်ရမှာက ချန်ပီယံလိဂ်မှာ ပီအက်စ်ဂျီဘယ်အဆင့်ထိ တက်လှမ်းမလဲဆိုတာပါပဲ။ အုပ်စုအဆင့်မှာ ဘိုင်ယန်မြူးနစ်၊ အန်ဒါလက်ခ်ျ၊ ဆဲလ်တစ်တို့နဲ့ အတူကျနေပြီး နောက်တစ်ဆင့်တက်ဖို့ကတော့ အခက်အခဲ မရှိနိုင်ပါဘူး။ ပြင်သစ်လီဂူးမှာ ဒီရာသီ ပီအက်စ်ဂျီ ချန်ပီယံဆု ပြန်ရမှာလားဆိုတာက မေးနေဖို့ကို မလိုတဲ့မေးခွန်းဖြစ်ပါလိမ့်မယ်။ ဥရောပအဆင့်မှာပါ
မထင်တာတွေ လုပ်ပြနိုင်ခဲ့မယ်ဆိုရင်တော့ ပီအက်စ်ဂျီရဲ့ ငွေခင်းတဲ့ အောင်မြင်မှုလမ်းဟာ မှန်းသလောက် ဖြစ်လာပြီလို့ အသိအမှတ် ပြုရတော့မှာပါပဲ။ ။

Top News