နိုင်ငံတကာဆန်းစစ်မှုတွေ ရှိလာရင်လည်း မြန်မာနိုင်ငံ အနေနဲ့ ကြောက်ရွံ့နေမှာ မဟုတ်ဘူးလို့ ဒေါ်အောင်ဆန်းစုကြည်ပြော

ဓာတ်ပုံ- ရိုက်တာ

ဘာသာရေး ယုံကြည်မှုတွေ၊ တိုင်းရင်းသား မျိုးနွယ်စု ခွဲခြားသတ်မှတ်ချက်တွေနဲ့ သွေးကွဲနေတဲ့ နိုင်ငံမျိုး မဖြစ်စေလိုကြောင်း နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားလိုက်ပါတယ်။

စက်တင်ဘာ ၁၉ ရက်က နေပြည်တော်မှာ ပြောကြားတဲ့ နိုင်ငံတော် အခြေပြ မိန့်ခွန်းမှာ ဒေါ်အောင်ဆန်းစုကြည်က လက်ရှိ ဖြစ်ပွားနေတဲ့ ရခိုင်ပြည်နယ် အရေးနဲ့ ဘင်္ဂါလီ ပြဿနာတွေ၊ နိုင်ငံတကာ ဖိအားပေးမှုတွေ၊ အစိုးရရဲ့ ကိုင်တွယ်လုပ်ဆောင်မှုတွေနဲ့ ပတ်သက်ပြီး စုံစုံလင်လင် ထည့်သွင်း ရှင်းလင်းသွားပါတယ်။

လတ်တလော ပြဿနာတွေမှာ အမုန်းတရားနဲ့ အကြောက်တရားက အဓိက ဖိစီးမှု အကြောင်းရင်းတွေ ဖြစ်နေကြောင်း၊ မြန်မာနိုင်ငံကို ဘာသာရေး ယုံကြည်မှုတွေနဲ့ တိုင်းရင်းသားမျိုးနွယ် ခွဲခြားမှုတွေကြောင့် သွေးကွဲတဲ့ နိုင်ငံတစ်ခု ဖြစ်လာမှာ မလိုလားကြောင်း ဒေါ်အောင်ဆန်းစုကြည်က ပြောပါတယ်။

အစိုးရအနေနဲ့ ရခိုင်ပြည်နယ်က လူ့အဖွဲ့အစည်း အသီးသီးရဲ့ ငြိမ်းချမ်းရေးနဲ့ တည်ငြိမ်ရေးအတွက် အစွမ်းရှိသမျှ ကြိုးစား လုပ်ဆောင်နေကြောင်း၊ မတည်ငြိမ်မှုတွေကြောင့် နေရပ်စွန့်ခွာ ထွက်ပြေးမှုတွေရဲ့ အကြောင်းရင်းကို အရင်းစစ်ဖို့ လိုကြောင်း၊ နေရပ်စွန့်ခွာ ထွက်ပြေးသူတွေကို စုံစမ်းဆွေးနွေးဖို့ ဖြစ်လာနိုင်ကြောင်း မြန်မာအစိုးရအဖွဲ့ ခေါင်းဆောင်က ဆိုပါတယ်။

နိုင်ငံတကာ ဝေဖန်မှုတွေနဲ့ ပတ်သက်ပြီး ဒေါ်အောင်ဆန်းစုကြည်က အခုပြဿနာနဲ့ ပတ်သက်ပြီး နိုင်ငံတကာက ဆန်းစစ်မှုတွေ ရှိလာရင်လည်း မြန်မာနိုင်ငံ အနေနဲ့ ကြောက်ရွံ့နေမှာ မဟုတ်ကြောင်း၊ ရခိုင်ပြည်နယ် အရေးကို ဖြေရှင်းဖို့ တည်တည်ငြိမ်ငြိမ် ဆက်လက် လုပ်ဆောင်သွားမှာဖြစ်ကြောင်း တုံ့ပြန်ခဲ့ပါတယ်။

“စွပ်စွဲမှုတွေနဲ့ တန်ပြန်စွပ်စွဲမှုတွေ ရှိနေတယ်။ ကျွန်မတို့က ဒါတွေ အားလုံးကို နားထောင်ရမယ်။ တစ်ခုခု အရေးယူ မကိုင်တွယ်ခင်မှာ ဒီစွပ်စွဲမှုတွေဟာ ခိုင်မာတဲ့ အထောက်အထားတွေပေါ်မှာ အခြေခံထားတာလား ဆိုတာကို သေချာအောင် ဆန်းစစ်ရမယ်”လို့ ဒေါ်အောင်ဆန်းစုကြည်က ပြောပါတယ်။

ဒါ့အပြင် ဒီဖြစ်ရပ်တွေဟာ စစ်သွေးကြွ အကြမ်းဖက်သမားတွေက လုံခြုံရေး တပ်ဖွဲ့ စခန်းတွေကို တိုက်ခိုက်ခဲ့မှုကနေ စတင်လာတာကိုလည်း ဒေါ်အောင်ဆန်းစုကြည်က ထောက်ပြသွားပါတယ်။ 

ပြီးတော့ လက်ရှိ ပြဿနာတွေဟာ မြန်မာနိုင်ငံနဲ့သာ တိုက်ရိုက် သက်ဆိုင်တယ်လို့ ခံယူကြောင်းလည်း ဒေါ်အောင်ဆန်းစုကြည်က ပြောပါတယ်။ 
“ဒီနိုင်ငံမှာ ရှိနေသူတွေမှာသာ တကယ်တမ်း တာဝန်ရှိတယ်လို့ ကျွန်မ ယုံကြည်တယ်။ ဒါပေမဲ့ ကျွန်မတို့ရဲ့ အားထုတ်ကြိုးစားမှုမှာ မိတ်ဆွေတွေကလည်း လာပူးပေါင်းစေချင်ပါတယ်။ ရှင်တို့ လုံခြုံရေးကို ကျွန်မတို့ တာဝန်ယူပါ့မယ်”လို့လည်း ဒေါ်အောင်ဆန်းစုကြည်က ဖိတ်ခေါ်ခဲ့ပါတယ်။

ရခိုင်ပြည်နယ် အရေးကို ဖြေရှင်းရာမှာ ကိုဖီအာနန် ကော်မရှင်ရဲ့ ထောက်ခံ အကြံပြုမှုတွေက ရေရှည်အတွက် ကောင်းကျိုး ဖြစ်ထွန်းစေနိုင်တယ် ဆိုတာကိုလည်း ဒေါ်အောင်ဆန်းစုကြည်က အခိုင်အမာ ပြောကြားသွားပါတယ်။

ဒါ့အပြင် နိုင်ငံတကာ အမြင်မှာ မြန်မာနဲ့ ပတ်သက်ရင် နိုင်ငံတစ်ခုလုံးရဲ့ အနေအထားကို ခြုံကြည့်စေလိုကြောင်း၊ ပဋိပက္ခ ဖြစ်ပွားနေတဲ့ ဧရိယာလေး တစ်ခုလောက်ကိုသာ ကြည့်နေတာမျိုး မဖြစ်စေချင်ကြောင်းလည်း ဒေါ်အောင်ဆန်းစုကြည်က တိုက်တွန်းခဲ့ပါတယ်။

“ကျွန်မတို့ဟာ သက်တမ်းနုနယ်ပြီး ထိလွယ်ရှလွယ်ရှိတဲ့ နိုင်ငံတစ်ခုပါ။ ပြဿနာပေါင်း မြောက်မြားစွာကို ရင်ဆိုင်နေရပါတယ်။ ဒါပေမဲ့ ကျွန်မတို့က ဒါတွေ အကုန်လုံးကို ရင်ဆိုင် ကျော်ဖြတ်သွားပါမယ်”လို့လည်း ဒေါ်အောင်ဆန်းစုကြည်က ပြောကြားသွားပါတယ်။ 

စကားလုံးတွေနဲ့ဖြစ်စေ၊ လက်နက်တွေနဲ့ဖြစ်စေ၊ ယုတ်စွအဆုံး စိတ်ခံစားချက်တွေနဲ့ဖြစ်စေ အချင်းချင်းရန်လို တိုက်ခိုက်နေခြင်းဟာ ဘာအထောက်အကူမှ မဖြစ်နိုင်ပါဘူး။

More in Tourism Section

Top News