ရုရှားဟက်ကာများကိစ္စ စုံစမ်းမှုတွင် အမေရိကန် အာဏာပိုင်များကို ကူညီရန် Facebook သဘောတူ

အမေရိကန် ရွေးကောက်ပွဲ ရလဒ်ကို ရုရှားက စွက်ဖက်နှောင့်ယှက်ခဲ့ကြောင်း စွပ်စွဲမှုများကို စုံစမ်းစစ်ဆေးရာ၌ အာဏာပိုင်များကို ပါဝင် ကူညီသွားမည်ဟု Facebookက ထုတ်ပြန်ခဲ့သည်။

၂၀၁၆ ရွေးကောက်ပွဲ ကာလနှင့် ပတ်သက်၍ Facebookတွင် ရုရှားအေဂျင်စီ တစ်ခုက နိုင်ငံရေး ဝါဒဖြန့် ကြော်ငြာမှုများ ပြုလုပ်ခဲ့သည့် Link ၃၀၀၀ ကျော်ကို အမေရိကန် လွှတ်တော်၏ စုံစမ်းစစ်ဆေးမှု ကော်မတီထံ လွှဲပေးသွားရန် Facebookက သဘောတူခဲ့သည်။

ကမ္ဘာ့အကြီးဆုံး လူမှုကွန်ရက် မီဒီယာကြီး၏ အကြီးအကဲဖြစ်သော မာ့ခ်ဇူကာဘာ့ဂ်က Facebook အနေဖြင့် လွှတ်တော်၊ ထောက်လှမ်းရေးဌာနများနှင့် ပူးပေါင်းပြီး ယခုကိစ္စကို ကိုင်တွယ် ဖြေရှင်းသွားမည်ဟု ဆိုသည်။ Facebookသည် အမေရိကန် ရွေးကောက်ပွဲနှင့် ဆက်စပ်ပြီး ရုရှားမှ ငွေစာရင်းများဖြင့် ကြော်ငြာငွေ ပေးချေမှု ဒေါ်လာ တစ်သိန်းဖိုးမျှ ရှိခဲ့ကြောင်းလည်း ထုတ်ပြန်ထားသည်။

ဇူကာဘာ့ဂ်က “ကျွန်တော်တို့ရဲ့ စနစ်ထဲက ဆိုးသွမ်းဖောက်ပြန်နေတဲ့ အရာအားလုံးကို လိုက်ဖမ်းနေမယ်လို့တော့ မပြောပါဘူး။ ကျွန်တော်တို့က လူတွေ လုပ်ဆောင်သမျှကို သူတို့ လက်တွေ့ မလုပ်ခင် လိုက်စစ်ဆေးနေမှာလည်း မဟုတ်ပါဘူး။ ဒါပေမဲ့ ကျွန်တော်တို့ရဲ့ လူမှုစံနှုန်းတွေကိုဖြစ်စေ၊ ဥပဒေကိုဖြစ်စေ ချိုးဖောက်ရင်တော့ နောက်ဆက်တွဲ အကျိုးဆက်တွေနဲ့ ကြုံရမှာပါပဲ”ဟု ပြောကြားခဲ့သည်။

၎င်းက “ကျွန်တော်တို့က လူတိုင်းကို ချက်ချင်းလိုက်ဖမ်းဖို့တော့ မဖြစ်နိုင်ဘူး။ ဒါပေမဲ့ အခုလို အခြေအနေမျိုးနဲ့ ပတ်သက်ရင် ဝင်ရောက်စွက်ဖက် နှောင့်ယှက်ဖို့ ပိုခက်သွားအောင်တော့ လုပ်နိုင်ပါတယ်”ဟုလည်း ဆိုသည်။

ဇူကာဘာ့ဂ်က အာဏာပိုင် အဖွဲ့အစည်းများကို ဆက်သွယ်ကူညီရန် ဆုံးဖြတ်ထားသော်လည်း အသေးစိတ် အချက်အလက်များကိုမူ လူသိရှင်ကြား ထုတ်ပြန်ရန် အစီအစဉ် မရှိဟု အတည်ပြုခဲ့သည်။

ရွေးကောက်ပွဲ ကာလအတွင်း ရလဒ်ပိုင်းကို ခြယ်လှယ်ရန် ရုရှားဟက်ကာများက ကြိုးပမ်းခဲ့သည့် အထောက်အထားများ ရှိနေကြောင်း အမေရိကန် ထောက်လှမ်းရေးများက အတည်ပြုထားသော်လည်း ရုရှားက ယင်းစွပ်စွဲချက်များကို အစဉ်တစိုက် ငြင်းဆန်ထားသည်။

Ref: The Verge