ဘင်္ဂလားဒေ့ရ်ှတွင် အဖမ်းခံရသော မြန်မာဓာတ်ပုံသတင်းထောက်နှစ်ဦး အာမခံရ

ဘင်္ဂလားဒေ့ရ်ှနိုင်ငံတွင် ဖမ်းဆီးထိန်းသိမ်းခံထားရသည့် မြန်မာဓာတ်ပုံသတင်းထောက် နှစ်ဦးကို စက်တင်ဘာ ၂၂ ရက်က တရားရုံးအာမခံပေးခဲ့ပြီး အကျဉ်းထောင်မှ လွတ်မြောက်ပြီဖြစ်ကြောင်း မြန်မာနိုင်ငံဆိုင်ရာဘင်္ဂလားဒေ့ရ်ှသံရုံးက ထုတ်ပြန်သည်။

ဘင်္ဂလားဒေ့ရ်ှအာဏာပိုင် များက နိုင်ငံတကာမီဒီယာအဖွဲ့ အစည်းများ၏ တောင်းဆိုမှုများ နှင့် သတင်းထောက်နှစ်ဦး၏ မိသားစုဝင်များထံမှ အသနားခံမှု များကို ထည့်သွင်းစဉ်းစားပြီး အ လျှော့၊အတင်းပြုလုပ်ခဲ့ခြင်းဖြစ်ကြောင်း သံရုံးက စက်တင်ဘာ ၂၃ ရက်တွင် ထုတ်ပြန်သည်။

ဘင်္ဂလားဒေ့ရ်ှအစိုးရက သောကြာနေ့က တရားရုံးဖွင့်လှစ် ကာ ၎င်းတို့နှစ်ဦးလွတ်မြောက်ရေး အထူးအစီအစဉ်တစ်ရပ် ပြုလုပ် ပြီး အာမခံပေးမည့်သူမပါဘဲ စီစဉ်ပေးခြင်းဖြစ်ကြောင်း ဘင်္ဂလားဒေ့ရ်ှသံရုံးက ဆိုသည်။

သို့သော် အာမခံဖြင့် လွတ်မြောက်လာသော်လည်း ၎င်းတို့နှစ်ဦးသည် အမှုမပြီးပြတ်မချင်း ဘင်္ဂလားဒေ့ရ်ှတွင်သာနေထိုင်ပြီး တရားဆက်လက်ရပ်ဆိုင်ရမည် လား (သို့မဟုတ်) မြန်မာနိုင်ငံသို့ ပြန်လာခွင့်ရမည်လားဆိုသည့်အ ချက်မှာ ရှင်းလင်းစွာ မသိရသေးပေ။

ဘင်္ဂလားဒေ့ရ်ှတရားရုံးက ကာလရှည်ထောင်ဒဏ်ကျခံရနိုင် သော စွပ်စွဲချက်များ၏ ပြင်းထန်မှု ကို သက်ရောက်စေခြင်းမရှိစေရန် အထူးလိုက်လျောမှုဖြင့် ၎င်းတို့ အမှုကို စဉ်းစားခဲ့ကြောင်းလည်း ထုတ်ပြန်ချက်တွင် ပါရှိသည်။

ဂျာမနီမဂ္ဂဇင်း GEO အ တွက် ရခိုင်ပြည်နယ်မှ ဘင်္ဂလား ဒေ့ရ်ှနိုင်ငံသို့ ထွက်ပြေးသည့် ဘင်္ဂါလီများကို သတင်းဓာတ်ပုံ ရိုက်ကူးရန် စက်တင်ဘာ ၆ ရက် က ဘင်္ဂလားဒေ့ရ်ှသို့ သွားရောက် သည့် မြန်မာဓာတ်ပုံသတင်း ထောက် ကိုမင်းဇေယျာဦးနှင့် ၎င်း ၏ လက်ထောက် ကိုခွန်လတ်တို့ ကို စက်တင်ဘာ ၇ ရက်ကတည်း က ဘင်္ဂလားဒေ့ရ်ှက ဖမ်းဆီး၍ တရားစွဲဆိုထားခြင်းဖြစ်သည်။

စက်တင်ဘာ ၁၄ ရက်က ၎င်းတို့နှစ်ဦးကို တရားရုံးထုတ် စဉ်က အာမခံလျှောက်ထားသော် လည်း တရားရုံးက ပယ်ချခဲ့သည်။ သို့သော် ၁၅ ရက်ကြာ ဖမ်းဆီးထိန်းသိမ်းခံရပြီးနောက် စက်တင်ဘာ ၂၂ရက်တွင် တရားရုံးက  အာမခံပေးခဲ့ကြောင်း ၎င်းတို့ကို  ဘင်္ဂလားဒေ့ရ်ှသို့စေလွှတ်ခဲ့သည့် ဂျာမနီမဂ္ဂဇင်း GEO ကလည်း  ထုတ်ပြန်သည်။

မြန်မာ ဓာတ်ပုံသတင်း ထောက်နှစ်ဦးက ၎င်းတို့ မည်သူ မည်ဝါဖြစ်ကြောင်း ထိန်ချန်ထား ရန် ကမ္ဘာလှည့်ဗီဇာကို ရယူခဲ့ခြင်း ဖြစ်ကြောင်းလည်း ဘင်္ဂလားဒေ့ရှ်  သံရုံးက စွပ်စွဲထားသည်။ ပြီးခဲ့ သည့် သီတင်းပတ်အနည်းငယ်က တည်းက ဘင်္ဂလားဒေ့ရ်ှသို့ လာ ရောက်ရန် စိတ်ဝင်စားကြောင်း ဖော်ပြသည့် သတင်းထောက်အား လုံးနီးပါးကို ဘင်္ဂလားဒေ့ရ်ှအစိုးရ က ခွင့်ပြုပေးခဲ့ပြီး ၎င်းတို့ သဘော ကျသင့်တော်သော ဗီဇာကို ထုတ် ပေးခဲ့သည်ဟု ဖော်ပြထားသည်။ သို့သော် မြန်မာသတင်းထောက် နှစ်ဦးသည် မှန်ကန်သည့် ဗီဇာအမျိုးအစား လျှောက်ထားခဲ့ခြင်းမရှိဘဲ ၎င်းတို့၏ တကယ့်ရည်ရွယ်ချက်ကို ကွယ်ဝှက်ထားခဲ့ကြောင်း စွပ်စွဲဖော်ပြထားသည်။

မြန်မာ ဓာတ်ပုံသတင်း ထောက်နှစ်ဦးသည် သတင်း ထောက်ဗီဇာအစား ကမ္ဘာလှည့်ခရီးသွားဗီဇာကိုသာ လျှောက်ထားပြီး သတင်းကိစ္စများ ဆောင်ရွက်ခြင်းကြောင့် ဘင်္ဂလားဒေ့ရ်ှက ဖမ်းဆီးခြင်းဖြစ်သည်။ ၎င်းတို့ကို ပြန်လွှတ်ပေးရန် မြန်မာအပါအ ၀င် နိုင်ငံအများအပြားမှ လူ့အခွင့် အရေးဆိုင်ရာ အဖွဲ့အစည်းများ နှင့် သတင်းမီဒီယာအဖွဲ့အစည်း များက တောင်းဆိုထားသည်။

GEO မဂ္ဂဇင်းအယ်ဒီတာချုပ် Dr.Christoph Kuklick ကလည်း ဓာတ်ပုံသတင်းထောက်နှစ်ဦး လွတ်မြောက်ရေး လူသိရှင်ကြားဆောင်ရွက်ခဲ့သူများနှင့် နောက်ကွယ်မှ ပံ့ပိုးခဲ့သူများကို ကျေးဇူးတင်ကြောင်း ထုတ်ပြန်ချက်မှတစ်ဆင့် ပြောကြားသည်။

More in News Section