အနည်းဆုံးလုပ်ခလစာ တစ်ရက် ၄,၀၀၀ နှင့် ၄,၈၀၀ ကျပ်ကြား အတည်ပြုရန် အကြမ်းဖျင်းသတ်မှတ်ဟု ပြည်ထောင်စုဝန်ကြီးပြော

အနည်းဆုံး အခကြေးငွေ သတ်မှတ်ရေးဆိုင်ရာ အမျိုးသားကော်မတီ အစည်းအဝေးကို အောက်တိုဘာ ၂ ရက်က ပြုလုပ်နေစဉ် (ဓာတ်ပုံ − ရဲနိုင်)

အနည်းဆုံးအခကြေးငွေကို တစ်ရက်လျှင် ၄,၀၀၀ နှင့် ၄,၈၀၀ ကျပ်ကြား အတည်ပြုရန် အကြမ်းဖျင်းသတ်မှတ်ခဲ့ကြောင်း အလုပ် သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည် ထောင်စုဝန်ကြီး ဦးသိန်းဆွေက ပြောကြားသည်။

အနည်းဆုံးအခကြေးငွေသတ်မှတ်ရေးဆိုင်ရာ အမျိုးသားကော်မတီအစည်းအဝေးကို နေပြည်တော်၌ အောက်တိုဘာ ၂ ရက်တွင် အလုပ် သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနခန်းမ၌ပြုလုပ်ပြီးနောက် ၀န်ကြီးက သတင်းထောက်များအား ပြောကြားသည်။

‘‘၄,၀၀၀ နဲ့ ၄,၈၀၀ အကြမ်းဖျင်းပြောသော်လည်း အောက်ခြေ ကနေ ဒီထက်ပိုကောင်းတာတွေရရင် လက်ခံဖို့အသင့်ပါ’’ ဟု ၎င်းက ပြောသည်။ထိုသို့ ကျပ် ၄,၀၀၀ နှင့် ၄,၈၀၀ ကြားအတွင်း နှုန်းထား သတ်မှတ်ခြင်းသည် အလုပ်သ မားများအတွက် ရွေးချယ်ခွင့် ဘောင်ကျဉ်းစေသည်ဆိုကာ အမျိုးသားကော်မတီအဖွဲ့ဝင် အ လုပ်သမားကိုယ်စားလှယ် ဦး နော်အောင်က ကန့်ကွက်သည်။

‘‘အလုပ်သမားတွေ တောင်း ဆိုမျှော်မှန်းနေတဲ့နှုန်းနဲ့ ကွာဟနေလို့ ကျွန်တော် ကန့်ကွက်ခဲ့ တာပါ’’ဟု ၎င်းကဆိုသည်။

 အမျိုးသားကော်မတီအဖွဲ့ ၀င်၊ အလုပ်ရှင်အဖွဲ့အစည်းကိုယ်စားလှယ် ဒေါ်ခိုင်ခိုင်နွယ် က လက်ရှိ အကြမ်းဖျင်းသတ်မှတ်သောနှုန်းထားနှင့် ပတ်သက်၍ မှတ်ချက်မပေးလိုကြောင်း ပြောသည်။

ယင်းအစည်းအဝေး၌ ယခင် က သတ်မှတ်ခဲ့သည့် လုပ်သား ၁၅ ဦးအထက် လုပ်ငန်းခွင်များ သည် အနည်းဆုံးအခကြေးငွေ သတ်မှတ်ချက်နှင့် အကျုံးဝင် သည်ဆိုသည့်အစား အလုပ်သ မား ၁၀ ဦးအထက် လုပ်ငန်းခွင် များဟု ပြင်ဆင်အသုံးပြုနိုင်ရေး သက်ဆိုင်ရာ အသေးစား၊  အ လတ်စား လုပ်ငန်းရှင်များနှင့် ပြန်လည်ညှိနှိုင်းရန်ဆိုသည့် အချက် ကို ဆုံးဖြတ်ခဲ့သည်။

ထို့အပြင် အဆိုပါအနည်း ဆုံးလုပ်ခကို ဒေသအလိုက်ခွဲခြား ခြင်းမရှိဘဲ တစ်နိုင်ငံလုံးတစ်ပြေး ညီသတ်မှတ်ရန် ဆိုသည့်အချက် နှင့် အစိုးရ၊ အလုပ်သမား၊ အ လုပ်ရှင်ကိုယ်စားလှယ်များ၊လွှတ် တော်ကိုယ်စားလှယ်များ ပါဝင် သည့် ဖိုရမ်တစ်ခုကို ဒီဇင်ဘာတွင် နောက်ဆုံးထားပြုလုပ်၍ ပြည်ထောင်စုအစိုးရထံ တင်ပြရန် နှုန်းထားတစ်ခု ရွေးချယ်သတ်မှတ်ရန်ဆိုသည့် အချက်ကို သဘောတူညီမှု ရရှိခဲ့ကြောင်း အမျိုးသားကော်မတီ အဖွဲ့ဝင်များက ပြောကြားသည်။

ယင်းဖိုရမ်၌ အစိုးရက အ ကြမ်းဖျင်းသတ်မှတ်သည့် နှုန်း ထားအပါအ၀င် တိုင်းဒေသကြီး နှင့် ပြည်နယ်များက တင်ပြလာသည့် အဆိုပြုနှုန်းများနှင့် ပတ်သက်၍ ပြန်လည်သုံးသပ်ဆွေး နွေးမည်ဖြစ်ကြောင်း ဦးနော် အောင်ကဆိုသည်။

‘‘ကျွန်တော်က နှုန်းထားတစ် ခုသတ်မှတ်ဖို့ကိစ္စကို ဖိုရမ်မှာ ပါဝါအပြည့်ပေးဖို့ တောင်းဆိုခဲ့တယ်။ ဒါကို အစည်းအဝေးမှာ လက်ခံခဲ့တယ်။ ဒါကြောင့် ဖိုရမ်မှာ သတ်မှတ်မယ့်နှုန်းထားကို ပြည်ထောင်စုအစိုးရကို တင်ပြရမှာဖြစ်ပြီး ပြည်ထောင်စုအစိုးရ အဖွဲ့ရဲ့ ခွင့်ပြုချက်နဲ့ အမျိုးသားကော်မတီက အတည်ပြုပေးသွား မှာ ဖြစ်ပါတယ်။ အဲဒီအချိန်မှာ အစိုးရက အကြမ်းဖျင်းသတ်မှတ်တဲ့နှုန်းထဲက ဖြစ်ချင်မှဖြစ်တော့ မှာပါ’’ဟု ၎င်းကပြောသည်။

အဆိုပါ အစည်းအဝေး၌ တိုင်းဒေသကြီး၊ ပြည်နယ် အနည်းဆုံးအခကြေးငွေ သတ်မှတ်ရေးဆိုင်ရာ ကော်မတီများက အဆိုပြုနှုန်းထားများ တင်ပြရာ ရှမ်းပြည်နယ်က အနိမ့်ဆုံးအဖြစ် ကျပ် ၄,၀၀၀ အဆိုပြုခဲ့ပြီး ရန် ကုန်တိုင်းဒေသကြီးက အမြင့်ဆုံး နှုန်းထားအဖြစ် ကျပ် ၆,၄၀၀ အ ဆိုပြုတင်ပြခဲ့သည်။

ထိုသို့ အမျိုးသားကော်မတီ ၏ ဆုံးဖြတ်ချက်ကြောင့် အနည်း ဆုံးအခကြေးငွေ ပြင်ဆင်ရန်နှင့် နှုန်းထားအသစ်အတည်ပြုနိုင်ရန် ဒီဇင်ဘာအထိ စောင့်ဆိုင်းရဖွယ် ရှိနေကြောင်း အလုပ်သမားအဖွဲ့ အစည်းခေါင်းဆောင် ဦးသိန်းမြင့် က ဆိုသည်။

မြန်မာနိုင်ငံတွင် လုပ်ငန်း ကဏ္ဍအားလုံးအတွက် တစ်ရက် လုပ်ခအနည်းဆုံးအခကြေးငွေကို ၂၀၁၅ စက်တင်ဘာက ပထမဆုံး သတ်မှတ်ခဲ့သည်။

ထိုစဉ်က တစ်ရက်လုပ်ခကို ကျပ် ၃,၆၀၀ သတ်မှတ်ခဲ့ပြီး ၂ နှစ်လျှင် တစ်ကြိမ် ပြန်လည်သုံးသပ်နိုင်သည်ဟူသော အနည်းဆုံးအခကြေးငွေဥပဒေအရ နှုန်းကို ပြင်ဆင်သုံးသပ်ရန် ဆောင်ရွက် နေသည်။

သို့သော် အဆိုပါ နှုန်းထား သတ်မှတ်ခဲ့ရာ ၂ နှစ်ကျော် ကြာ  မြင့်လာပြီဖြစ်၍ သတ်မှတ်ကာလ ထက် ကျော်လွန်နေပြီဖြစ်သည်။

More in News Section

Top News