အကြမ်းဖက်မှုများကို ကာကွယ်တိုက်ဖျက်ကုသမည့် အစီအစဉ် ဆောင်ရွက်မည်

အိမ်တွင်းအကြမ်းဖက်ခံရခြင်း အပါအ၀င် ကျား၊ မ အခြေခံသောအကြမ်းဖက်မှုများ  (Gender Violet) ကို ကာကွယ်တိုက်ဖျက်ကုသမည့် အစီအစဉ်အား ကျန်းမာရေးနှင့်အားကစားဝန်ကြီးဌာနက ဆောင်ရွက်မည်ဖြစ်သည်။

ယင်းအစီအစဉ်ကို လူမှုဝန်ထမ်းဦးစီးဌာနနှင့် ကျန်းမာရေးနှင့်အားကစားဝန်ကြီးဌာနတို့က ပူးပေါင်းလုပ်ဆောင်ခြင်းဖြစ်ကြောင်း ပြည်သူ့ကျန်းမာရေးဦးစီးဌာန မိခင်နှင့်မျိုးဆက်ပွားဌာနခွဲ ညွှန်ကြားရေးမှူး  ဒေါက်တာလှမြတ်သွေးအိန္ဒြာက ပြောသည်။

‘‘အခုမှ စလုပ်နေတာ။ ဂိုက်လိုင်းပြီးရင် ကျန်းမာရေးဝန်ထမ်းတွေကို သင်တန်းပေးရဦးမှာ။ ဒီ နှစ်ထဲမှာတော့ ဂိုက်လိုင်းရမှာပါ။ ကျားမခွဲခြားခြင်းဆိုင်ရာ အကြမ်းဖက်မှုတွေ အကုန်လုံးကဆေးရုံကို ရောက်တယ်လေ။ အဲဒီလို ရောက်လာရင် ကျန်းမာရေးဘက်က ချက်ချင်းကုသမှုပေးမှာ။ ပြီးတော့မှ ရဲဆီအမှုဖွင့်ချင်လည်းဖွင့် ဒါမှမဟုတ် လူမှုဝန်ထမ်းကိုတိုင်မယ်ဆိုလည်းတိုင်ပေါ့။ ဒီစီမံချက်ထဲမှာပါတဲ့ မျိုးပွားနိုင်တဲ့အရွယ် တွေမှာ မျိုးဆက်ပွားကျန်းမာရေး တွေဖြစ်ရင် ကုသမှုကိုချက်ချင်း ဆောင်ရွက်ပေးတာမျိုးကို လုပ်သွားမှာပါ’’ ဟု ၎င်းကပြောသည်။

ကျန်းမာရေးနှင့်အားကစားဝန်ကြီးဌာနသည် မျိုးပွားနိုင်သော အရွယ်ဖြစ်သည့် အသက်(၁၅)နှစ် မှ (၄၉)နှစ်အရွယ်တွင် ဖြစ်ပေါ်သော မျိုးဆက်ပွားဆိုင်ရာ ကျန်းမာရေးပြဿနာများကို ပြုစုကုသစောင့်ရှောက်မှုပေးခြင်း၊ စိတ်ကျန်းမာရေးကောင်းမွန်စေရန် ထောက်ပံ့ခြင်းစသည်တို့ကို ဆောင်ရွက်မည်ဖြစ်သည်။

အဆိုပါအစီအစဉ်တွင် အိမ်တွင်းအကြမ်းဖက်ခံရမှုအပါအ၀င် ကျား၊ မ ခွဲခြားခြင်းကို အခြေခံသော အကြမ်းဖက်မှုများကို ကာကွယ်ခြင်း၊ တိုက်ဖျက်ခြင်း၊ ကျန်းမာရေးစောင့်ရှောက်မှုပေးခြင်း၊ ကုသမှုပေးခြင်းတို့ပါဝင်သည်။

Top News