ဗီဒီယို အကြိုခံစားခြင်း

ဂျာကြီး

ဒီနေ့ရဲ့ ဗီဒီယိုအညွှန်းကဏ္ဍမှာတော့ အချစ်ဒရာမာ ဇာတ်ကားလေးကို ညွှန်းပေးလိုက်ပါတယ်။


ကျော်စိုးပိုင်နဲ့ မိုးကလျာတို့က ချစ်သူတွေပါ။ ကျော်စိုးပိုင်က  ကေတီဗီတစ်ခုမှာ မန်နေဂျာ ရာထူးနဲ့ အလုပ်လုပ်တာပါ။ မိုးကလျာကတော့ ကုမ္ပဏီဝန်ထမ်းပါ။ ကေတီဗီဆိုရင် လူတွေက အမြင်စောင်းတတ်ကြတာကြောင့် ကျော်စိုးပိုင်က မိုးကလျာကို ကုမ္ပဏီတစ်ခုမှာ အလုပ်လုပ်တယ်လို့ပဲ လိမ်ထားခဲ့ပါတယ်။ 

ကျော်စိုးပိုင် အလုပ်လုပ်တဲ့ဆိုင်က စည်းကမ်းကြီးပါတယ်။ သန့်လည်းသန့်ပါတယ်။ ကောင်မလေးတွေကိုလည်း အမြဲတမ်းဆုံးမလေ့ရှိပါတယ်။ အဲဒါကြောင့် ကျော်စိုးပိုင်ကို သူ့ဆိုင်က အလုပ်သမားတွေက အရမ်းချစ်ကြပါ တယ်။ ကျော်စိုးပိုင်ကလည်း ကေတီဗီမှာအလုပ်လုပ်တဲ့ ကောင်မလေးတွေဆိုပြီး နှိမ်ပြီးမဆက်ဆံပါဘူး။ အမြဲတမ်း ညီမတွေလိုသဘောထားပြီး သူတို့အိမ်တွေရဲ့အခက်အခဲတွေကိုလည်း အမြဲတမ်းမေးလေ့ရှိပါတယ်။

မိုးကလျာ ခေါ်လိုက်တိုင်း ကျော်စိုးပိုင်က မအားတာများပါတယ်။ အဲဒါကြောင့် မိုးကလျာ ခဏခဏ စိတ်ကောက် ရပါတယ်။  မိုးကလျာချိန်းတဲ့အချိန်တွေက ညနေပိုင်းတွေများတာကြောင့်  ကျော်စိုးပိုင် အလုပ်တကယ်ရှုပ်တဲ့အချိန်နဲ့ အမြဲတိုးပါတယ်။ အဲဒါကြောင့် သူတို့နှစ်ယောက်က တစ်ပတ်ကို တစ်ခါတွေ့ဖို့တောင် မလွယ်ပါဘူး။ အဲဒီလိုနဲ့ တစ်ရက်မှာတော့ မိုးကလျာက သူတို့နှစ်ယောက် ဘယ်တော့လက်ထပ်ကြမလဲဆိုတာ ကျော်စိုးပိုင်ကို မေးခဲ့ပါတယ်။ ကျော်စိုးပိုင်ကတော့ မိုးကလျာကို တင့်တောင့်တင့်တယ် လက်ထပ်ချင်တာကြောင့် တစ်နှစ်လောက်အချိန်ယူဦးမယ်လို့ပြောခဲ့ပါတယ်။ အချိန်အတိအကျနဲ့ပြောတာဖြစ်တဲ့အတွက် မိုးကလျာလည်း စိတ်ကျေနပ်သွားခဲ့ပါတယ်။

ကျော်စိုးပိုင်တို့ အလုပ်ထဲမှာ အလုပ်ကြိုးစားတဲ့ကောင်မလေးတစ်ယောက်ရှိပါတယ်။ အဲဒီကောင်မလေးနာမည်က သက်တန့်ကဗျာပါ။ သက်တန့်ကဗျာက ကျန်းမာရေးမကောင်းတဲ့ အမေအိုကြီးကို လုပ်ကျွေးနေတာပါ။ နောက်ပြီး သူကဆိုင်မှာ လုပ်အားအကောင်းဆုံးသူတစ်ယောက်ပါ။အဲဒါကြောင့် ကျော်စိုးပိုင်တို့ကအမြဲတမ်း သူ့ကို ချီးကျူးလေ့ရှိပါတယ်။ သက်တန့်ကဗျာကလည်း ကျော်စိုးပိုင်အပေါ်မှာ အစ်ကိုတစ်ယောက်လို အရမ်းအားကိုးပါ တယ်။ ဒါပေမဲ့ တစ်ရက်မှာတော့ သက်တန့်ကဗျာအလုပ်ကို အချိန်မီရောက်မလာခဲ့ပါဘူး။ သူနဲ့အတူ တူနေတဲ့ အခန်းဖော်ကောင်မလေးကိုမေးတဲ့အချိန်မှာတော့ အမျိုးသားတစ်ယောက်နဲ့ထွက်သွားတယ်ဆိုတာသိခဲ့ရပါ တယ်။အဲဒါကြောင့် လိုက်ရှာတဲ့အချိန်မှာတော့ တည်းခိုခန်းတစ်ခုကနေထွက်လာတဲ့ သက်တန့်ကဗျာကို တွေ့ခဲ့ပါတယ်။ သူတို့စည်းကမ်းအရ သက်တန့်ကဗျာကိုအလုပ်ထုတ်ဖို့ပြောခဲ့ပေမယ့် သူ့အမေဆေးဖိုးလိုတာကြောင့် လုပ်ရတာဖြစ်ပြီးနောက်မလုပ်တော့ပါဘူးလို့ အာမခံတာကြောင့် အလုပ်တော့မထုတ်ဖြစ်ခဲ့ပါဘူး။

အဲဒီလိုနဲ့တစ်ရက်မှာတော့ ကျော်စိုးပိုင်တို့ဆိုင်မှာ မိုးကလျာတို့သူငယ်ချင်းတွေ သီချင်းလာဆိုရင်း ကျော်စိုးပိုင် ကေတီဗီမှာ အလုပ်လုပ်တာကို သိသွားခဲ့ပါ တယ်။ အဲဒီလိုသိသွားတဲ့အချိန် သူတို့နှစ်ယောက်ဇာတ်လမ်း ဘာတွေ ဆက်ဖြစ်လာမလဲဆိုတာကို တော့ Power 9 ထုတ်လုပ်ရေးကနေ ဖြန့်ချိထားတဲ့ ဂျာကြီးဆိုတဲ့ဇာတ်ကားမှာ ဆက်လက်ရှုစားပေးပါ။

ဒီဇာတ်ကားမှာ ကျော်စိုးပိုင်အဖြစ် လူမင်းနဲ့ မိုးကလျာအဖြစ် ယုသန္တာတင်တို့ကပါဝင်သရုပ်ဆောင်ထားပြီး ဒီရေလှိုင်းရဲ့ဇာတ်လမ်း၊ ဇာတ်ညွှန်းကို ဒါရိုက်တာ တင်အောင်ကျော် ရိုက်ကူးပုံဖော်ထားပါတယ်။

Top News