ကယ်လီဖိုးနီးယားရှိ ဝိုင်အရက်ချက်ရာ ခရိုင်တစ်ခု မီးလောင်မှု ဖြစ်ပွားပြီး ၁၀ ဦးထက်မနည်း သေဆုံး

ကယ်လီဖိုးနီးယားရှိ ဝိုင်အရက် ချက်လုပ်ရာ ဒေသတစ်ခုတွင် ပြင်းထန်ဆိုးရွားသည့် မီးလောင်ကျွမ်းမှုတစ်ခု ဖြစ်ပွားပြီး အနည်းဆုံး လူ ၁၀ ဦး သေဆုံးခဲ့ကြောင်း သိရသည်။

ဆိုနိုမာခရိုင်တွင် အောက်တိုဘာ ၉ ရက်က ဖြစ်ပွားသည့် မီးလောင်မှုကြောင့် လူပေါင်းများစွာကို အရေးပေါ် တက်သုတ်ရိုက် ရွှေ့ပြောင်းပေးခဲ့ရသလို နေအိမ်နှင့် အခြားအဆောက်အအုံ ၁၅၀၀ ကျော် ပျက်စီးခဲ့သည်။

ဆိုနိုမာ၊ နာပါနှင့် ယူဘာ ခရိုင်များမှ လူပေါင်း နှစ်သောင်းကျော်မှာ မီးဘေးကြောင့် ကတိုက်ကရိုက် ရွှေ့ပြောင်း ထွက်ပြေးခဲ့ရသည်။ အဆိုပါဖြစ်ရပ်သည် ကယ်လီဖိုးနီးယားပြည်နယ် တစ်ခုလုံးတွင် အဆိုးဆုံး မီးလောင်မှု တစ်ခု အနေဖြင့်လည်း မှတ်တမ်းဝင်ခဲ့သည်။

ကယ်လီဖိုးနီးယား ပြည်နယ် အုပ်ချုပ်ရေး ဌာနကလည်း အခင်းဖြစ်ရာ ဒေသတွင် အရေးပေါ် အခြေအနေ ထုတ်ပြန် ကြေညာခဲ့သည်။ မီးကို အပြည့်အဝ ထိန်းချုပ် ငြှိမ်းသတ်ရန် ရုန်းကန်နေရပြီး နောက်ထပ် အသက်အိုးအိမ် စည်းစိမ်များကို ခြိမ်းခြောက်နေကြောင်း အဆိုပါ အရေးပေါ် ကြေညာချက်တွင် ဖော်ပြထားသည်။

ဆိုနိုမာ ခရိုင်အပြင် မီးကူးစက်ရာ နာပါတွင် လူ ၂ ဦးနှင့် မန်ဒိုစီနိုခရိုင်တွင် လူ ၁ ဦး သေဆုံးခဲ့ကြောင်း သိရသည်။ အခြား ဒဏ်ရာရသူများ ရှိခဲ့သလို ပျောက်ဆုံးနေသူများလည်း ရှိကြောင်း ကယ်ဆယ်ရေးများက ဆိုသည်။ စပျစ်ခြံများ စိုက်ပျိုးရာ တောင်ကြားဒေသမှ မြေဧက ထောင်သောင်းချီပြီး မီးလောင် ပျက်စီးခဲ့သည်။

သန်းခေါင်ကျော် အချိန်လောက်တွင် မီးစတင်သည်ဟု ယုံကြည်ရပြီး အောက်တိုဘာ ၉ ရက် တစ်နေ့လုံး မီးရှိန်ပြင်းပြင်းနှင့် ကူးစက်ခဲ့သည်။ သို့သော် မီးစတင်ရသည့် အကြောင်းရင်းကို တိတိကျကျ မသိရသေးချေ။

စပျစ်ခင်းထဲတွင် ပိတ်မိနေသည့် အလုပ်သမား အများအပြားကို ရဟတ်ယာဉ်များဖြင့် ညတွင်းချင်း အချိန်လုပြီး ကယ်ထုတ်ခဲ့ရသည်။

အဆိုပါ ဒေသတွင် လေပြင်းများ တိုက်ခတ်ပြီး ရာသီဥတု ပူပြင်းခြောက်သွေ့ကာ လေထုစိုထိုင်းဆ လျော့နည်းနေခြင်းကြောင့်လည်း မီးကူးစက်မှု မြန်ဆန်စေရန် တွန်းအားပေးသည့်နှယ် ရှိနေကြောင်း သိရသည်။

Ref: Reuters

Top News