ငရဲခန်းမှအပြန်

ARSA အကြမ်းဖက်သမားများ ဖမ်းဆီးခေါ်ဆောင်သွားပြီးနောက် မြန်မာနိုင်ငံသို့ ပြန်လည်ရောက်ရှိလာသည့် ဟိန္ဒူဘာသာဝင်အမျိုးသမီးများနှင့် ကလေးငယ်များကို တွေ့ရစဉ် (ဓာတ်ပုံ − Information Committee)

ရုပ်ရည်ချောမောခြင်းနှင့် မုသားစကားပြောဆိုခြင်းက လူ ၁၆ ဦး၏ အသက်ကို ကယ်တင်ပေးနိုင်မည်ဟု မရာခ်ျကူမာရီတစ်ယောက် ဘယ်တုန်းကမှ မတွေးထားခဲ့ဖူး ပေ။ သို့သော် ဩဂုတ်လကုန်၏ တစ်ခုသော နံနက်ခင်းတွင် ကံကြမ္မာဆိုးက သူနေထိုင်ရာ ရွာလေးဆီသို့ ရက်စက်ကြမ်းကြုတ်စွာ ရောက်ရှိလာခဲ့သည်။

ထိုကံကြမ္မာဆိုးကြောင့်ပင် မည်သူမဆို အသက်ဘေးနှင့် ကြုံလာလျှင် မုသားစကားမဆိုထား နှင့်၊ သူတို့ခိုင်းသမျှ လုပ်ဆောင်ပေးရမည်ဟု သဘောပေါက်ခဲ့ရကြောင်း အသက် (၂၀)အရွယ် ဟိန္ဒူအမျိုးသမီးငယ် မရာခ်ျကူမာရီက စီးကျလာသည့် မျက်ရည်စများကိုသုတ်ရင်း ဝမ်းနည်းနာကျင်စွာ ပြောသည်။

မရာခ်ျကူမာရီသည် ၂၀၁၇ ဩဂုတ် ၂၅ ရက်က မောင်တောခရိုင်ရှိ နယ်ခြားစောင့်ရဲစခန်း ၃၀ ကျော်ကို ARSA အကြမ်းဖက်သမားများ တိုက်ခိုက်ခဲ့သည့် ဖြစ်စဉ်တွင် အကြမ်းဖက်သမားများက ဘင်္ဂလားဒေ့ရ်ှနိုင်ငံသို့ ဖမ်းဆီးခေါ်ဆောင်ခံခဲ့ရသူ ဟိန္ဒူဘာသာဝင် အမျိုးသမီးရှစ်ဦးထဲမှ တစ်ဦးဖြစ်သည်။ ထိုသို့ ဖမ်းဆီးခေါင်းဆောင်ခံခဲ့ရသော်လည်း မောင်တောဒေသသို့ ဘေးမသီရန်မခဘဲ ကံကောင်းထောက်မစွာဖြင့် မရာခ်ျကူမာရီအပါအဝင် ဟိန္ဒူဘာသာဝင် အမျိုးသမီးရှစ်ဦးနှင့် ကလေးရှစ်ဦး ပြန်လည်ရောက်ရှိလာသည်။

သူ့ကို အသက်ဘေးကလွတ်အောင် ကယ်တင်လိုက်သည်က အမေမွေးကတည်းက ချောမောလှပခဲ့သော သူ၏ရုပ်ရည်က အဓိကဖြစ်သည်။

အကြမ်းဖက်သမားများ၏ လက်ထဲမှလွတ်မြောက်လာသူ ဟိန္ဒူအမျိုးသမီးရှစ်ဦးအနက် မရာခ်ျကူမာရီသည် နာတံသွယ်သွယ်၊  မျက်လုံးဝိုင်းဝိုင်း၊ အသားညိုညိုဖြစ်ပြီး  ကိုယ်လုံးကိုယ်ပေါက်ကလည်း အမျိုးသမီးတစ်ဦးတွင် ရှိသင့်သည့် အင်္ဂါရပ်နှင့် ပြည့်စုံသူဖြစ်သည်။ ဟိန္ဒူဘာသာဝင်များ၏ ရုပ်ရည်သွင်ပြင်သည် ဘင်္ဂါလီများနှင့် သွင်ပြင်လက္ခဏာချင်းဆင်သဖြင့် ခွဲခြားသိနိုင်ရန် ဦးခေါင်း (ငယ်ထိပ်) နဖူးတည့်တည့်တို့တွင် ဆေးနီတို့၍ အမှတ်အသားပြုလုပ် ထားသည်။ ထို့အပြင် ဟိန္ဒူအမျိုးသမီးများသည် ၎င်းတို့၏ ရိုးရာဝတ်စုံဖြစ်သော ဆာရီကို အမြဲဝတ်ဆင်ထားသည်။

မရာခ်ျကူမာရီသည် အကြမ်းဖက်သမားများ ဖမ်းဆီးခေါ်ဆောင်ခဲ့သော ဟိန္ဒူအမျိုးသမီးများအနက်တစ်ဦးတည်းသော အပျိုဖြစ်သော်လည်း အခြားအိမ်ထောင်သည်များသည်လည်း မရာခ်ျကူမာရီကဲ့သို့ ရုပ်ရည်ချောမောလှပကြသည်။

ဩဂုတ် ၂၅ ရက် (သောကြာ နေ့)က ARSA အကြမ်းဖက်သမားများနှင့် ဒေသတွင်းရှိ အစွန်းရောက်ဘင်္ဂါလီများသည် မရာခ်ျကူမာရီတို့နေထိုင်သည့် မောင်တောမြို့နယ် ခမောင်းဆိပ်မြို့ ရဲဘော်ကျကျေးရွာနှင့် တမန်းသားကျေးရွာရှိ ဟိန္ဒူဘာသာဝင်များ၏ နေအိမ်များသို့ အကြမ်းဖက်စီးနင်းတိုက်ခိုက်ခဲ့သည်။ အကြမ်းဖက်သမားများသည် ဘင်္ဂါလီများမှလွဲ၍ ရွာအတွင်းရှိ တွေ့သမျှလူကိုသတ်ကာ ရှိသမျှပစ္စည်းဥစ္စာများ လုယက်ခဲ့ကြသည်။

ယင်းသို့ အကြမ်းဖက်စီးနင်းတိုက်ခိုက်ရာတွင် ရွာရှိယောက်ျားသားများနှင့် သက်ကြီးအမျိုးသမီးများ၊ အိမ်ထောင်သည်များအပါအဝင် တစ်ရွာလုံးကို မရာခ်ျကူမာရီတို့ မျက်စိရှေ့မှာတင် သတ်ဖြတ်လိုက်ခြင်းဖြစ်ကြောင်း ဟိန္ဒူအမျိုးသမီးရှစ်ဦးက တညီတညွတ်တည်း ပြောသည်။


ARSA အကြမ်းဖက်အဖွဲ့၏ ဖမ်းဆီးခြင်းခံခဲ့ရသည့် ဟိန္ဒူဘာသာဝင်များ မြန်မာနိုင်ငံသို့ ပြန်လည်ရောက်ရှိလာစဉ် (ဓာတ်ပုံ − Information Committee)

‘‘ဟိန္ဒူရွာသားအားလုံးကို ရိုက်နှက်ပါတယ်။ ရိုက်နှက်ပြီး တော့ ကျွန်မတို့ကို တစ်နေရာမှာ တန်းစီပြီးတော့ ထိုင်ခိုင်းထားတယ်။ ယောက်ျား၊ မိန်းမခွဲထားပြီးတော့ ထိုင်ခိုင်းတယ်။ ကျွန်မတို့တွေကို အများကြီးရိုက်ပါတယ်။ မိဘတွေကို သတ်ပစ်လိုက်ပါတယ်။ အဖေ၊ အမေ၊ အစ်မအပါအဝင် တစ်ရွာလုံးကို သတ်ပစ်လိုက်ပါတယ်။ သူတို့မှာ တုတ်၊ ဓား၊ သေနတ်တွေပါတယ်။ သူတို့က သေနတ်ဖောက်တယ်။ ကျွန်မတို့ကို သေနတ်ပြပြီး ခြိမ်းခြောက် တယ်’’ဟု မရာခ်ျကူမာရီက ပြောသည်။

အဖြစ်ဆိုးကြီးတွင် မရာခ်ျကူမာရီ၏ မိဘနှစ်ပါးနှင့် အစ်မတစ်ဦး အသတ်ခံရပြီး မဂူရဘူနီတွင် ခင်ပွန်း၊ မောင်တစ်ဦးနှင့် ၎င်းတို့အိမ်၌ အလုပ်လုပ်ကိုင်နေသည့် အမျိုးသားတစ်ဦး အသတ်ခံရသည်။

ယင်းသို့ မိဘဆွေမျိုးသားချင်းများ သတ်ဖြတ်ခံနေရခြင်းကို မြင်ခဲ့ရသည့် မရာခ်ျကူမာရီနှင့် ကျန်အမျိုးသမီးခုနစ်ဦးက အကြမ်းဖက်သမားများ ပြောသမျှကို မငြင်းဆန်ရဲတော့ဘဲ ခေါင်းညိတ်ခဲ့ရသည်။

‘‘သူတို့ (အကြမ်းဖက်သမားများနှင့် အစွန်းရောက်ဘင်္ဂါလီများ)ကို လက်ထပ်မလားမေးတော့ ဟိန္ဒူအမျိုးသမီးတွေက အသက်ရှင်လိုစိတ်နဲ့ လက်ထပ်မယ်လို့ ပြောတယ်’’ဟု အသက်ရှင်သန်ရေးအတွက် ခေါင်းညိတ်ခဲ့ရပုံကို ၎င်းက ပြန်ပြောပြသည်။

အကြမ်းဖက်သမားများ၏ သတ်ဖြတ်မှုကြောင့် ခမောင်းဆိပ်မြို့ ရဲဘော်ကျနှင့် တမန်းသားကျေးရွာမှ ဟိန္ဒူဘာသာဝင်အမျိုးသား၊ အမျိုးသမီး၊ သက်ကြီးရွယ်အိုနှင့် ကလေးငယ် စုစုပေါင်း ၉၃ ဦး သေဆုံးခဲ့ရပြီး လုံခြုံရေးတပ်ဖွဲ့ ဝင်များနှင့် ဟိန္ဒူဘာသာရေးခေါင်းဆောင်များ၏ စုံစမ်းဖော်ထုတ်ချက်အရ အခင်းဖြစ်ပွားရာနေရာအနီးရှိ တောထဲတွင် မြှုပ်နှံထားသည့် ဟိန္ဒူအလောင်း ၄၅ လောင်းကို စက်တင်ဘာလကုန်က တွေ့ရှိခဲ့ကာ ၂၅ ဦးကို မိသားစုဆွေမျိုး များက အတည်ပြုနိုင်ခဲ့သည်။

အကြမ်းဖက်သမားများပြောသမျှ လုပ်ပေးရသူများထဲတွင် မရာခ်ျကူမာရီနှင့်အတူ အသက် (၁၉)နှစ်အရွယ် မဂူရဘူနီလည်း တစ်ဦးအပါအဝင်ဖြစ်သည်။

ထိုနေ့က အကြမ်းဖက်မှုများ နှင့်ပတ်သက်၍ ၎င်းမြင်တွေ့ရပုံများကို မဂူရဘူနီက ယခုကဲ့သို့ ပြောသည်။

‘‘မနက် ၈ နာရီမှာ ကျွန်မတို့အိမ်ထဲကို အကြမ်းဖက်ဘင်္ဂါလီတွေက ဝင်ပြီးတော့ မျက်စိတွေကို ပိတ်လိုက်တယ်။ လက်ကိုလည်း ကြိုးနဲ့ချည်ပြီးတော့ တစ်နေရာကို ခေါ်သွားပြီး ထိုင်ခိုင်းလိုက်တယ်။ ကျွန်မတို့မိသားစုတွေကို ဓားနဲ့ ခုတ်ပြီး သတ်လိုက်တယ်။ ကျွန်မတို့ကို တောထဲက တောင်ခြေမှာ ထိုင်ခိုင်းတယ်။ ကျွန်မတို့ရောက်နေတာက ဘက်တလာရွာကို ရောက်နေတယ်။ ဘက်တလာရွာကိုရောက်ပြီးတော့ ယောက်ျားတွေက တစ်ဖက်၊ မိန်းမတွေကတစ်ဖက်ထားပြီး သတ်လိုက်တယ်။ ပြီးတော့ တွင်းထဲကို ထည့်လိုက်တယ်’’ဟု ဆိုသည်။

အကြမ်းဖက်သမားများနှင့် အစွန်းရောက်ဘင်္ဂါလီများသည် ဟိန္ဒူအမျိုးသမီးများကို ၎င်းတို့ဘာသာသို့ ဝင်ရမည်ဟုဆိုကာ အမျိုးသမီးများက ဝတ်ဆင်ထားသည့် ဆာရီကို ဆုတ်ဖြဲ၍ ဦးခေါင်းတွင် ပတ်ခိုင်းပြီး ၎င်းနှင့်အတူပါလာသည့် သားဖြစ်သူကို မြောင်းထဲကရေကို သောက်ခိုင်းသည်ဟု မဂူရဘူနီက ပြောပြသည်။


ဖမ်းဆီးခံရသည့် ဖြစ်စဉ်များ ပြန်လည်ပြောပြနေသော ဟိန္ဒူအမျိုးသမီးငယ် မရာခ်ျကူမာရီ (ဓာတ်ပုံ − တပ်မတော်ကာကွယ်ရေးဦးစီးချုပ်ရုံး)

ယင်းသို့ အကြမ်းဖက်သမားများ ပြောသမျှ၊ လုပ်ခိုင်းသမျှကိုလိုက်နာ၍ နေထိုင်ခဲ့သူ ဟိန္ဒူအမျိုးသမီးရှစ်ဦးနှင့် ကလေးငယ်ရှစ်ဦးတို့သည် နောက်တစ်နေ့တွင် ဘင်္ဂလားဒေ့ရ်ှနိုင်ငံ ကူတူပါလောင်ရှိ ဒုက္ခသည်စခန်းသို့ အကြမ်းဖက်သမားများနှင့် အတူရောက်ရှိခဲ့သည်။

၎င်းတို့ကို ကူတူပါလောင် ဒုက္ခသည်စခန်းရှိ အဆောင်တစ်ခုတွင် ထားရှိပြီး ၎င်းတို့ရွာသားများကို သတ်ဖြတ်သူများသည် ရခိုင်များနှင့် လုံခြုံရေးတပ်ဖွဲ့ဝင်များဖြစ်ကြောင်း မီဒီယာများရှေ့၌ မဟုတ်မမှန်ထွက်ဆိုခိုင်းခဲ့သည်ဟု ပြန်လည်လွတ်မြောက်လာသော အသက် (၁၈)နှစ်အရွယ် မရူစနာက ပြောသည်။

‘‘ကျွန်မတို့ကို ဘင်္ဂလားဒေ့ရ်ှကို ခေါ်သွားတယ်။ ဒုက္ခသည်စခန်းက အိမ်တစ်လုံးမှာထားတယ်။ မင်းတို့ကို ဘယ်သူသတ်တာလဲ။ ရခိုင်တွေက သတ်တယ်လို့ ပြောရတယ်။ ဒါပေမဲ့ ကျွန်မတို့က နှုတ်ဖြင့်ပြောပေမယ့် စိတ် ထဲကပါလို့ ပြောခြင်းမဟုတ်ဘူး။ ဘင်္ဂါလီတွေက အတင်းပြောခိုင်းလို့ ပြောရခြင်းဖြစ်ပါတယ်။ ကျွန်မတို့ကို အတင်းအကျပ်ပြောခိုင်းတာပါ။ ကျွန်မလည်း အသတ်ခံရမှာကြောက်လို့ ပြောရခြင်းဖြစ်ပါတယ်’’ဟု မရူစနာက ပြောသည်။

ဟိန္ဒူဘာသာဝင်များ အစုလိုက်၊ အပြုံလိုက် အသတ်ခံရသည့် ခမောင်းဆိပ်မြို့ ရဲဘော်ကျ ကျေးရွာအနီးရှိ ကျေးရွာများသည် ဘင်္ဂါလီများနေထိုင်သည့် ကျေးရွာများဖြစ်ပြီး တိုင်းရင်းသားကျေးရွာများသည် အဆိုပါကျေးရွာများနှင့် ခြောက်မိုင် ကျော် ခုနစ်မိုင်ခန့်အကွာတွင် တည်ရှိသည်။ သို့သော် အဆိုပါ တိုင်းရင်းသားရွာများသည်လည်း အနည်းအကျဉ်းသာရှိသည်။

ခမောင်းဆိပ်မြို့တွင် တာဝန်ကျနေသည့် မြို့အုပ်ချုပ်ရေးမှူးအပါအဝင် ဌာနဆိုင်ရာဝန်ထမ်းများသည် ခမောင်းဆိပ်နှင့် နှစ်မိုင်ခန့်ကွာဝေးသည့် မင်းခမောင်း တိုင်းရင်းသားကျေးရွာတွင် နေထိုင်၍ ရုံးတက်နေရသည်ဟု ခမောင်းဆိပ်မြို့ အထွေထွေအုပ်ချုပ်ရေးဦးစီးဌာန၌ တာဝန်ထမ်းဆောင်နေသည့် ရပ်ကျေးစာရေး ဦးမောင်ထွန်းဝင်းက ပြောသည်။

သို့အတွက်ကြောင့် ဟိန္ဒူဘာသာဝင်များ သေဆုံးခြင်းသည် ရခိုင်တိုင်းရင်းသားများ၊ လုံခြုံရေးတပ်ဖွဲ့ဝင်များနှင့် ဆက်စပ်မှု လုံးဝမရှိနိုင်ဟု ဦးမောင်ထွန်းဝင်းက ဆိုသည်။

ARSA အကြမ်းဖက်သမားများ ရွာအတွင်းသို့ ဝင်ရောက်စီးနင်းသည့်နေ့က ဖြစ်ပျက်ခဲ့သော အိပ်မက်ဆိုးကို ငရဲခန်းမှ လွတ် မြောက်လာသူတစ်ဦးဖြစ်သော အသက် (၂၂)နှစ်အရွယ် မဘီနာဖာလာက အောက်ပါအတိုင်း ပြောပြသည်။

‘‘အကြမ်းဖက်သမားတွေဟာ အော်ဟစ်ပြီးတော့ အိမ်ထဲကို ဝင်လာခဲ့တယ်။ လက်ထဲမှာ လက်နက်မျိုးစုံကိုင်ထားကြတယ်။ မိသားစုတွေကို အိမ်ကနေထွက်ခိုင်းတယ်။ တချို့က ဘုရားကျောင်းတွေကို ဖျက်ဆီးတယ်။ ပြီးတော့ နင်တို့ဘာသာက ဘာမှမဟုတ်ဘူး။ ငါတို့ဘာသာက အကြီးဆုံး ဖြစ်တယ်လို့ပြောတယ်။ ကျွန်မတို့ရွာသားတွေကို ဗဒလာရွာ (ရဲဘော်ကျကျေးရွာအနီးမှ ဘင်္ဂါလီရွာ)ကို ခေါ်သွားတယ်။ ပြီးတော့ တွင်းတူးတယ်။ ပြီးရင် နင်တို့ ဟိန္ဒူတွေကို ငရဲတွင်းထဲကျသလို တွင်းထဲကိုထည့်လိုက်မယ်လို့ ပြောတယ်’’ဟု အဖြစ်ဆိုးကို ပြန်ပြောင်းပြောပြ၏။

ဆက်လက်၍ ဟိန္ဒူမိသားစုဝင်များကို ၎င်း၏ မျက်စိရှေ့တွင် ရက်ရက်စက်စက်သတ်ဖြတ်ခဲ့ပုံကို မဘီနာဖာလာက ဝမ်းနည်းနာကျင်စွာ ပြောပြသည်။

မရူစနာ၏ မိဘနှစ်ပါးနှင့် ခင်ပွန်းတို့ အသတ်ခံရပြီး မဘီနာဖာလာ၏ မိဘနှစ်ပါး၊ ခင်ပွန်းနှင့် အစ်ကိုတစ်ဦး အသတ်ခံခဲ့ရသည်။

‘‘အကြမ်းဖက်တွေက ကျွန်မတို့ မျက်စိရှေ့မှာတင် တွင်းတူးနေတာ။ တွင်းက သုံးတွင်း။ ပြီးတော့ ကျွန်မတို့ရွာသားတွေကို ကျွန်မရှေ့မှာ လည်လှီးပြီးတော့ တွင်းထဲကို ချလိုက်တယ်။ တွင်းထဲက လူတွေကို ဓာတ်ဆီလောင်း ပြီး မီးရှို့မယ်လို့ပြောတယ်။ နင်တို့က အစ္စလာမ်ဘာသာဝင်ကို ဝင်ရမယ်။ ပြီးတော့ ငါတို့ကို ယူရမယ်လို့ပြောတယ်။ ကျွန်မတို့နဲ့ကလေးတွေကို သတ်တော့မယ့်အချိန်မှာ ကျွန်မတို့က အစ္စလာမ်ဘာသာကို ကူးမယ်လို့ ပြောလိုက်ပါတယ်’’ ဟု ပြောသည်။

မရာခ်ျကူမာရီသည် ဟိန္ဒူ အမျိုးသမီးရှစ်ဦးအနက် အိမ်ထောင်မရှိသူ အပျိုတစ်ဦးဖြစ်ပြီး အကြမ်းဖက်သမားများ ဖမ်းဆီးခေါ်ဆောင်ခဲ့သည့် ဘင်္ဂလား ဒေ့ရ်ှနိုင်ငံ ကူတူပါလောင် ဒုက္ခသည်စခန်းတွင် ဘင်္ဂါလီလူမျိုး မော်လဝီဆရာတစ်ဦးနှင့် လက်ထပ်ရန်စီစဉ်ခြင်းခံရသည်။

ယင်းသို့ ဘင်္ဂါလီလူမျိုး မော်လဝီဆရာတစ်ဦးနှင့် လက်ထပ်ရန်စီစဉ်ခြင်းက မရာခ်ျကူမာရီတို့ လူစုအကြမ်းဖက်သမားများလက်ထဲမှ ပြန်လည်လွတ်မြောက်ရန် လမ်းစဖြစ်ခဲ့သည်။

‘‘ကျွန်မတို့ကိုထားတဲ့ ဒုက္ခသည်စခန်းမှာ အလုပ်လုပ်နေတဲ့ ဟိန္ဒူအမျိုးသားတစ်ဦးရှိပါတယ်။ ဒုက္ခသည်စခန်းမှာ မော်လဝီဆရာတစ်ဦးနဲ့ လက်ထပ်ပေးမယ်လို့ စီစဉ်တာကို ဟိန္ဒူအမျိုးသားကို ပြောပြရာကနေ အဲဒီဟိန္ဒူအမျိုးသားက ဘင်္ဂလားဒေ့ရ်ှနိုင်ငံမှာရှိတဲ့ ဟိန္ဒူဘာသာရေးအကြီးအကဲကို ဆက်သွယ်ပြောကြားခဲ့ပါတယ်။ အဲဒီလို အဆက်အသွယ်ရပြီး ဟိန္ဒူလူကြီးတွေနဲ့ ဘင်္ဂလားဒေ့ရ်ှနယ် ခြားစောင့်တပ် (BGB)တို့ ကျွန်မ တို့ရှိတဲ့နေရာကို ရောက်လာပြီးတော့ ထွက်ပေါက်ရခဲ့တာဖြစ်ပါတယ်’’ဟု မရာခ်ျကူမာရီက ပြန်လည်လွတ်မြောက်ရန် အဆက်အသွယ်ရရှိခဲ့ပုံကို ပြောပြသည်။

အကြမ်းဖက်သမားများ ဖမ်းဆီးခေါ်ဆောင်သွားမှုကြောင့် ဘင်္ဂလားဒေ့ရ်ှနိုင်ငံရှိ ဒုက္ခသည်စခန်းသို့ ရောက်သွားချိန်တွင် ၎င်းတို့ကို အခြားသူများနှင့် အဆက်အသွယ်မလုပ်ရအောင် အစောင့်အကြပ်များနှင့် ထားရှိခဲ့ပြီး စားသောက်ရေးအတွက် ဟိန္ဒူဘာသာဝင်တစ်ဦးက ဆောင်ရွက်ပေးကြောင်း ဆိုသည်။

၎င်းတို့ကို တစ်ဖက်နိုင်ငံရှိ ဒုက္ခသည်စခန်းတွင် ဘင်္ဂါလီများကဲ့သို့ ပြုမူနေထိုင်ရန် သင်ကြားခံခဲ့ရပြီး ယင်းအတိုင်းသာနေထိုင်ခဲ့ရကြောင်း ဆိုသည်။

‘‘ဒုက္ခသည်စခန်းကနေ ဘယ်မှမသွားရဘူး။ ထမင်းကိုလည်း သူတို့လာပေးတဲ့အချိန်မှာ စားရတယ်။ ထမင်းစားဖို့ ဟင်းကတော့ ပဲရည်ကလွဲပြီး ဘာမှမရဘူး။ ကျွန်မကတော့ ဒီအမှောင်ကမ္ဘာထဲက ဘယ်အချိန်လွတ်မြောက်မလဲဆိုတာကိုပဲ တွေးနေတယ်။ ဘာမှလည်း မစားချင်ဘူး။ ရှေ့ဆက် ဘာဖြစ်မလဲ၊ ဒီအထဲက ဘယ်လိုလွတ်မြောက်အောင် လုပ်မလဲဆိုတာကိုပဲ တိုင်ပင်နေခဲ့ကြတယ်’’ဟု ဒုက္ခသည်စခန်းတွင် တစ်လခန့် ဒုက္ခကြုံတွေ့ခဲ့ပုံကို မရာခ်ျကူမာရီက စိတ်ပျက်လက်ပျက်ပြောသည်။

ထူးဆန်းသည်မှာ ဘင်္ဂလား ဒေ့ရ်ှနိုင်ငံ ဒုက္ခသည်စခန်းမှ ဟိန္ဒူ ဘာသာဝင်၏ အကူအညီဖြင့် ဟိန္ဒူဘာသာဝင်အကြီးအကဲများနှင့် BGB တပ်ဖွဲ့ဝင်များ ရောက်လာသည့်အချိန်ကစတင်ကာ အကြမ်းဖက်သမားများသည် ၎င်းတို့ထံသို့ ရောက်လာခြင်းမရှိတော့ဘဲ ပျောက်ခြင်းမလှ ပျောက်သွားခဲ့ကြကြောင်း ဟိန္ဒူအမျိုးသမီးများက အံ့ဩစွာဖြင့် ပြောသည်။

ဟိန္ဒူအမျိုးသမီးများနှင့် ကလေးငယ်များကို အကြမ်းဖက်သမားများ ဖမ်းဆီးခေါ်ဆောင်ထားသည်ကို သိရှိခဲ့သည့် BGB သည် ၎င်းတို့ကို ဒုက္ခသည်စခန်းတွင် ဆက်လက်မထားတော့ဘဲ BGB စခန်းသို့ ခေါ်ဆောင်၍ ထိန်းသိမ်းခဲ့သည်ဟု လွတ်မြောက်လာသူများက ပြောသည်။

‘‘ဘင်္ဂလားဒေ့ရ်ှစစ်သားတွေ (BGB) သူတို့စခန်းမှာ ခေါ်ထားတဲ့အချိန် ဟိန္ဒူဘုန်းတော်ကြီးတစ်ပါးက ကျွန်မတို့ကို လာခေါ်ပါတယ်။ ပြီးတော့ အဲဒီဘုန်းတော်ကြီးနေအိမ်မှာ ထားပါတယ်။ လေးရက်လောက်ကြာတော့ ဘင်္ဂလား ဒေ့ရ်ှစစ်သားတွေ ပြန်ခေါ်လာပြီးတော့ ဒုက္ခသည်စခန်းက ကြက်ခြံတစ်ခြံမှာ ထားခဲ့ပါတယ်။ ဒါပေမဲ့ ကျွန်မတို့က မောင်တောမှာရှိတဲ့ ဟိန္ဒူဘာသာရေးခေါင်းဆောင် ဦးနီမောလ်နဲ့ ဖုန်းအဆက်အသွယ် ရရှိထားပြီးဖြစ်ပါတယ်’’ဟု မဂူရဘူနီက ဘင်္ဂလားဒေ့ရ်ှနိုင်ငံတွင် ကြုံတွေ့ခဲ့ရသည့် ဖြစ်စဉ်များကို ပြန်ပြောင်းပြောပြသည်။

ယင်းသို့ အကြမ်းဖက်သမားများ ဖမ်းဆီးခေါ်ဆောင်ခဲ့သူ ဟိန္ဒူ အမျိုးသမီးများနှင့် မောင်တော ဒေသရှိ ဟိန္ဒူဘာသာရေးခေါင်း ဆောင်တို့ အဆက်အသွယ်ရရှိခဲ့ပြီးနောက် ပျောက်ဆုံးနေသည့် ဟိန္ဒူဘာသာဝင်များကို ရှာဖွေရန် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က သက်ဆိုင်ရာတာဝန်ရှိသူများကို ညွှန်ကြားခဲ့သည်။

မြန်မာ-ဘင်္ဂလားဒေ့ရှ် နှစ်နိုင်ငံနယ်စပ်ရှိ ဒုက္ခသည်စခန်းတွင် အသက်မသေဘဲ ရောက်ရှိနေသည်ဟု သတင်းထွက်ပေါ်နေသော ဟိန္ဒူဘာသာဝင်အမျိုးသမီးများနှင့် ကလေးငယ်တို့အား မြန်မာနိုင်ငံသို့ ပြန်လည်ခေါ်ယူနိုင်ရေး နယ်ခြားစောင့်တပ်များ အချင်းချင်းတောင်းခံထားပြီးဖြစ်သော်လည်း သံတမန်လမ်းကြောင်းမှတစ်ဆင့်လည်း ထပ်မံတောင်းခံရန်နိုင်ငံတော်၏ အတိုင်ပင်ခံပုဂ္ဂိုလ်က ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည်ဖော်ဆောင်ရွက်ရေး ကော်မတီဝင်များအား စက်တင်ဘာ ၂၂ ရက်တွင် နေပြည်တော်ရှိ နိုင်ငံတော်သမ္မတအိမ်တော်အစည်းအဝေးခန်းမ၌ တွေ့ဆုံ၍ လမ်းညွှန်ခဲ့သည်။

ယင်းသို့ နိုင်ငံတော်၏ အတိုင်ပင်ခံပုဂ္ဂိုလ်၏ လမ်းညွှန်ချက်အရ နိုင်ငံခြားရေးဝန်ကြီးဌာနက သံတမန်လမ်းကြောင်းမှတစ်ဆင့် မြန်မာနိုင်ငံသို့ ပြန်လည်လွှဲပြောင်းပေးရန် တောင်းခံခဲ့သည့်အပြင် ဘင်္ဂလားဒေ့ရ်ှနိုင်ငံသို့ အောက်တိုဘာ ၂ ရက်နှင့် ၃ ရက်တွင် သွားရောက်ခဲ့သော နိုင်ငံတော်အတိုင်ပင်ခံရုံးဝန်ကြီးဌာန ပြည်ထောင်စုဝန်ကြီး၏ ခရီးစဉ်အတွင်း ဘင်္ဂလားဒေ့ရ်ှနိုင်ငံမှ နိုင်ငံခြားရေးဝန်ကြီး နှင့် တွေ့ဆုံစဉ် ဘင်္ဂလားဒေ့ရ်ှနိုင်ငံရှိ ဒုက္ခသည်စခန်း၌ ရောက်ရှိနေသော ဟိန္ဒူဘာသာဝင် အမျိုးသမီးများအား မြန်မာနိုင်ငံသို့ ပြန်လည်လွှဲပြောင်းပေးရန် တောင်းဆိုခဲ့သည်။

ထို့ကြောင့် ARSA အစွန်းရောက်အကြမ်းဖက်သမားများက တစ်ဖက်နိုင်ငံသို့ ဖမ်းဆီးခေါ်ဆောင်သွားသည့် ဟိန္ဒူဘာသာဝင် အမျိုးသမီးရှစ်ဦးနှင့် ကလေးငယ်ရှစ်ဦး စုစုပေါင်း ၁၆ ဦးသည် လုံခြုံရေးတပ်ဖွဲ့ဝင်များ၏ အကူအညီဖြင့် ဘင်္ဂလားဒေ့ရ်ှနိုင်ငံ ကူတူပါလောင် ဒုက္ခသည်စခန်းမှ မြန်မာနိုင်ငံသို့ စက်တင်ဘာလကုန်နှင့် အောက်တိုဘာလဆန်းတွင် ပြန်လည်ရောက်ရှိလာခဲ့ပြီ ဖြစ်သည်။

အကြမ်းဖက်သမားများ၏ လက်ထဲမှ ပြန်လည်လွတ်မြောက်လာခဲ့ပြီး မောင်တောဒေသသို့ ရောက်ရှိလာသည့် ဟိန္ဒူအမျိုးသမီးများနှင့် ကလေးငယ်များက ၎င်းတို့၏ မိသားစုဝင်များကို အစုလိုက်၊ အပြုံလိုက် သတ်ဖြတ်ခဲ့သည်မှာ ARSA အကြမ်းဖက်သမားများနှင့် ဒေသတွင်းရှိ အစွန်းရောက်ဘင်္ဂါလီများဖြစ်ကြောင်း သက်သေထွက်ဆိုခဲ့သည်။

‘‘ကျွန်တော်တို့ လုံးဝစိတ်မကောင်းဘူး။ ဘာကြောင့်လဲဆိုတော့ ကျွန်တော်တို့က လူနည်းစု ဖြစ်တယ်။ လူနည်းစုဖြစ်ပေမယ့်လည်း ဘယ်ဘာသာကိုမှ မစော်ကားဘူး၊ ဘယ်ဘာသာကိုမှ အ နှောင့်အယှက်မပေးဘူး၊ အေး အေးချမ်းချမ်းနေတဲ့ ဟိန္ဒူတွေဟာ အဲဒီလို ရက်ရက်စက်စက်ခံရတာကို ကိုယ်ချင်းစာကြည့်ပါ’’ဟု ဟိန္ဒူ ဘာသာရေးခေါင်းဆောင် ဦးနီမောလ်က ပြောသည်။

အကြမ်းဖက်သမားများ၏လက်ထဲတွင် စေလိုရာစေ၊ ခိုင်းလိုရာခိုင်းဖြင့် မည်သည့်အချိန်တွင် သတ်ဖြတ်ခံရမည်ကိုမသိခဲ့ဘဲ တစ်လကျော်ကြာ နေထိုင်ခဲ့ရသူ မရာခ်ျကူမာရီတို့ မောင်တော ဒေသသို့ ပြန်လည်ရောက်ရှိလာပြီ ဖြစ်သော်လည်း ၎င်းတို့၏ လုံခြုံရေးအတွက် တာဝန်ရှိသူများက အမြဲတာဝန်ယူပေးရန် လိုလားနေသည်။

အလားတူ အဖြစ်အပျက်မျိုး ထပ်မံမကြုံတွေ့လိုတော့သော မရာခ်ျကူမာရီက ယခုကဲ့သို့ ပြောသည်။

‘‘ရှေးဘဝကုသိုလ်ကံကြောင့် ဖြစ်ခဲ့တယ်ဆိုရင်လည်း ဒီတစ်ကြိမ်တစ်ခါတည်းနဲ့ ကျေပါစေတော့’’

Top News