ပြည်တွင်းလုပ်ငန်းရှင်တစ်ဦးက ဝါးမျိုးစိတ်ပေး၍ ထွက်သမျှ မျှစ်ပြန်ဝယ်ရန် ကမ်းလှမ်းထားဟုဆို

(ဓာတ်ပုံ − မြန်မာနိုင်ငံ ၀ါးစိုက်ပျိုးရေးအသင်း)

ဝါးမျိုးစိတ်ပေး၍ ထွက်သမျှ မျှစ် ပြန်ဝယ်ရန် ပြည်တွင်းလုပ်ငန်းရှစ်တစ်ဦးက မြန်မာနိုင်ငံ ဝါးစိုက်ပျိုးရေးအသင်းကို ကမ်းလှမ်းထားသည်ဟု ယင်းအသင်းဥက္ကဋ္ဌဦးဝင်း ကျော်ဦးက ပြောသည်။

တရုတ်၊ ဂျပန်နှင့် တိုင်ပေသို့ တင်ပို့ရောင်းချရန် တရုတ်မျှစ်ချို မျိုးဖြစ်သည့် ဝါးမျိုးစိတ်ကို ဝါးစိုက်ပျိုးသူများအားပေး၍ ထွက်လာသမျှ မျှစ်များအားလုံးကို ပြန်လည်ဝယ်ယူမည်ဖြစ်ရာ မြန်မာနိုင်ငံဝါး စိုက်ပျိုးသူများအသင်းနှင့် ချိတ် ဆက်ဆောင်ရွက်မည်ဖြစ်သည်။

‘‘သူကပြည်တွင်းကကောက်ပြီး ပြည်ပကိုတင်ပို့နေတာ၊ လိုအပ်ချက်ကတော့ အများကြီးပဲ။ ဝယ်လို့မရလို့၊ ဝါးမျိုးစိတ်တွေပေးပြီး လှူပေးချင်တယ်။ ပြီးရင်မျှစ်ကိုသူ့ ဆီသွင်းပါပေါ့’’ ဟု ဦးဝင်းကျော်ဦးကပြောသည်။

သို့ရာတွင် ဝါးစိုက်ပျိုးသူများက စိုက်ပျိုးပြီး အပြင်ပေါက်ဈေးထက်လျှော့ကာ ဝယ်ယူမည်ကို စိုးရိမ်သဖြင့် ယင်းလုပ်ငန်းရှင်က ဝါးမျိုးစိတ်သွင်းကာ စိုက်ပျိုးသူများထံအရင်းအတိုင်း ရောင်းချ၍ထွက်လာမည့်မျှစ်ကို စိုက်ပျိုးသူများ စိတ်ကြိုက် ရောင်းချရန် စီစဉ်နေသည်။

‘‘ဝါးလုပ်ငန်းရှင်တွေက အ နှောင်အဖွဲ့ဖြစ်မှာစိုးလို့ ပေါက်ဈေးထက်လျှော့ဝယ်မှာလား၊ စာချုပ်ကို ဘယ်လိုချုပ်မလဲပေါ့။ ဒီတော့ ပျိုးကိုသွင်းလာခဲ့ ဈေးရင်းနဲ့ဖြန့်ပြီး သဘောကျတဲ့သူက စိုက်ပြီးရောင်းချင်လည်းရောင်း၊ စာချုပ်ချုပ်ပြီး စိုက်၊ ပျိုးပင်ယူပြီးသူ့ဘာသာစိုက်ချင်လည်း စိုက်ပေါ့’’ ဟု ဦးဝင်း ကျော်ဦးက ပြောသည်။

ယင်းဝါးမျိုးစိတ်စိုက်ပျိုးမှုကို ရာသီဥတုအေးသည့် နေပြည်တော်တောင်ပေါ်ဒေသများနှင့် ရှမ်းပြည်နယ်တို့တွင် လုပ်ဆောင်မည်ဖြစ်ရာ ဝါးစိုက်ပျိုးရေးလုပ်ဆောင်နေသူများအနေဖြင့် စိတ်ဝင်စားပါက မြန်မာနိုင်ငံဝါးစိုက်ပျိုးရေးအ သင်းသို့ ဆက်သွယ်နိုင်သည်။

ဝါးပင်များသည် မျိုးစိတ်နှင့် စိုက်ပျိုးနည်းစနစ်အပေါ်မူတည်၍ တစ်နှစ်အတွင်း (သို့မဟုတ်) သုံးနှစ်အတွင်း မျှစ်ချိုးယူနိုင်ပြီး အချို့မျှစ်များသည် တစ်ကြိမ်ထွက်သော်လည်း အချို့မှာမူ ဝါးပင်ရှိသမျှ မျှစ်ထွက်သည်ဟု ၎င်းကပြောသည်။ ကမ္ဘာပေါ်တွင် ဝါးမျိုးစု ၈၈ စု၊ ဝါးမျိုးစိတ်ပေါင်း ၁,၄၀၀ ခန့် ရှိပြီး မြန်မာနိုင်ငံ၌ ဝါးမျိုးစိတ် ၁၀၀ ခန့်ရှိသည်။

Top News