ဩစတြေးလျ အမျိုးသမီး တစ်ဦးက လမ်းပျောက်နေသည့် ငါးမန်းကို ဆင်းဖမ်းပြီး ပင်လယ်ထဲ ပြန်လွှတ်ပေး

ဩစတြေးလျတွင် လမ်းပျောက်နေသည့် ငါးမန်းတစ်ကောင်ကို အမျိုးသမီး တစ်ဦးက လက်ဖြင့် ဖမ်းယူ ကယ်ဆယ်ကာ ပင်လယ်ထဲ ပြန်လွှတ်ပေးခဲ့သည်။


အသက် ၅၀ အရွယ်ရှိ မယ်လစ်ဆာ ဟက်သိုင်ရာက ပင်လယ်ကမ်းခြေနှင့် ဆက်စပ်နေသည့် ကျောက်တမံတား ရေကူးကန် တစ်ခုထဲသို့ ရောက်ရှိနေပြီး ပြန်မထွက်နိုင် ဖြစ်နေသော ငါးမန်းကို သွေးအေးအေးဖြင့် ပွေ့ချီယူကာ ပင်လယ်ထဲ ပြန်လွှတ်ပေးခဲ့ခြင်း ဖြစ်သည်။

ဟက်သိုင်ရာ၏ မိခင်က ကျောက်တုံးများကြား ရေငန်ဝင်ရောက်နေသည့် ကန်ထဲ၌ ငါးမန်းဆူးတောင်ကို စတင် သတိပြုမိခဲ့ခြင်း ဖြစ်သည်။ ဟက်သိုင်ရာက ငါးမန်းကို ပွေ့ချီထုတ်ကာ ပင်လယ်ထဲ ပြန်လွှတ်နေပုံကို အနီးအနားတွင် ရှိနေသူ တစ်ဦးက မိုဘိုင်းဖုန်းဖြင့် ဗီဒီယို ရိုက်ယူထားနိုင်ခဲ့သည်။

သူမ၏အရပ် တစ်ဝက်မျှရှိသော ငါးမန်းကို ကိုယ်တိုင် ဆင်းဖမ်းပြီး ပင်လယ်ထဲ လွှတ်ပေးခဲ့သည့်နောက် ဟက်သိုင်ရာက “ကြည့်ရတာ ငါးမန်းပေါက်လေး ထင်ပါတယ်။ သူ့ကို လိုက်ဖမ်းရတာ ဘာပြဿနာမှ မရှိပါဘူး။ သူ့ဆူးတောင်ပေါ်ကနေ ဒူးနဲ့ဖိပြီး လည်ပင်းနေရာလောက်က ချုပ်ထားလိုက်တော့ ကျွန်မကို ဘာမှ ပြန်မလုပ်နိုင်ပါဘူး”ဟု ရှင်းပြခဲ့သည်။

အဆိုပါ ငါးမန်းမှာ ပို့တ်ဂျက်ဆန် ငါးမန်းမျိုးဖြစ်ပြီး ဩစတြေးလျတွင် နေထိုင်လေ့ရှိသည်။ ၎င်းတို့သည် လူအများကို ရန်မူတိုက်ခိုက်လေ့ မရှိဟု ကျွမ်းကျင်သူများက ဆိုသည်။  

မည်သို့ပင်ဖြစ်စေ ဟက်သိုင်ရာ၏ အပြုအမူနှင့် သတ္တိကို အင်တာနက်ပေါ်တွင် လူအများက ချီးကျူးဂုဏ်ပြုနေကြောင်း သိရသည်။

Ref: BBC

Top News