တယ်လီနောက ကျောင်းသားနှင့် မိဘ ခုနစ်ထောင်ခန့်အား အင်တာနက်အသိပညာပေးမည်

၂၀၁၇ လက်ကျန် နှစ်လ ကျော်အတွင်း ကျောင်းသားလူငယ်များနှင့် ကျောင်းသား မိဘ၇,၀၀၀ ခန့်အား ဘေးကင်းစွာ အင်တာနက် အသုံးပြုတတ်စေရေးအသိပညာပေးမည်ဟု တယ်လီနောက အောက်တိုဘာ ၁၂ရက်၌ ကြေညာသည်။

‘‘သိပြီးသားလူတွေ အမှတ်ရအောင်၊ မသိရသေးတဲ့လူတွေ လိုက်နာဆောင်ရွက်အောင် ပညာပေးဖို့လိုနေပါတယ်’’ဟု တယ်လီနော ပြန်ကြားရေး တာဝန်ခံ ကိုအဲလစ်က ပြောသည်။ ဘေးကင်းစွာ အင်တာနက် အသုံးပြုစေရေး အသိပညာပေးမှုတွင် အချက်အလက်ခိုးယူခံရခြင်းများ၊ ဒစ်ဂျစ်တယ် နည်းပညာအသုံးပြု၍ အနိုင်ကျင့်မှုများ၊ အင်တာနက်အခြေပြုလိင်ပိုင်းဆိုင်ရာ ခေါင်းပုံဖြတ်မှုများ၊ ညစ်ညမ်းသော အချက်အလက်ပေးပို့ခြင်းများ၊ အမုန်းစကားဖြန့်ဖြူးခြင်းများ ပါဝင်သည်။


တယ်လီနောသည် ဘေးကင်းစွာ အင်တာနက် အသုံးပြုစေရေး အသိပညာပေးခြင်းကို ၂၀၁၆ သြဂုတ်မှ စတင်လုပ်ဆောင်ခဲ့ပြီး ပြိုင်ဘက် ဆက်သွယ်ရေး အော်ပရေတာ မြန်မာ့ဆက်သွယ်ရေးလုပ်ငန်းက ၂၀၁၇ အောက်တိုဘာက လုပ်ငန်းစတင်ခဲ့သည်။

မြန်မာ့ဆက်သွယ်ရေးလုပ် ငန်းကလည်း ခြောက်လအတွင်း စာသင်ကျောင်းများ၊ တက္ကသိုလ်များတွင် ဆွေးနွေးပွဲတစ်ရာကျော် ကျင်းပမည်ဟု သတင်းထုတ်ပြန်ထားသည်။ တယ်လီနောသည် အစိုးရ စာသင်ကျောင်းများနှင့် ပုဂ္ဂလိကစာသင်ကျောင်းများတွင် လူငယ် ၇,၀၀၀ ခန့်အား ပညာပေးနိုင်ရန် စီစဉ်ထားကြောင်း သတင်းထုတ်ပြန်ချက်တွင် ဖော်ပြထားသည်။

 လက်ရှိတွင် အိန္ဒိယ အပါအ၀င် နိုင်ငံအချို့၌ ဆိုရှယ်မီဒီယာကြောင့် နိုင်ငံရေးမတည်ငြိမ်မှုများ ရင်ဆိုင်နေရကြောင်း၊ မြန်မာနိုင်ငံအနေဖြင့်လည်း အလားတူကြုံတွေ့ရကြောင်း စက်တင်ဘာ ၁၇ ရက်က ရန်ကုန်မြို့တွင် ကျင်းပသော ‘ဆိုရှယ်မီဒီယာစိန်ခေါ်မှုများအောက်က မြန်မာလူ့အဖွဲ့အစည်း’ဖိုရမ်တွင် အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) အကြံပေး ဒေါက်တာအောင်ထွန်းသက်က ပြောသည်။

၂၀၁၆ အတွင်း တယ်လီနောသည် ကျေးလက်ဒေသရှိ လူငယ်၂,၀၀၀ ကျော်အား အသိပညာပေးနိုင်ခဲ့ပြီး ၂၀၁၇ ဇန်န၀ါရီမှ သြဂုတ်အတွင်း မြို့ကြီးများရှိ လူငယ် ၂,၀၀၀ ခန့်အား အသိပညာပေးလုပ်ဆောင်နိုင်ခဲ့သည်။