ခြောက်လအတွင်း ရွေ့လျားအိုင်စီတီသင်တန်းသား ၁,၀၀၀ခန့် သင်ကြားပေးမည်ဟုဆို

ဒုတိယမြောက် ရွေ့လျားအိုင်စီတီသင်တန်းခရီးစဉ်ကို သုံးခွမြို့မှ စတင်မည်ဖြစ်ပြီး ခြောက်လကျော်အတွင်း သင်တန်းသား၊ သင်တန်းသူ တစ်ထောင်ခန့်အား ကွန်ပျူတာ အခြေခံနှင့် အင်တာနက်အသုံးပြု နည်းများ သင်ကြားပေးမည်ဟု ရန်ကုန်တိုင်းဒေသကြီး ကွန်ပျူ တာပညာရှင်အသင်း ဥက္ကဋ္ဌဦးအောင်စိုးမိုးက ပြောသည်။

ရွေ့လျားအိုင်စီတီ နည်းပညာသင်တန်းသည် တစ်နေရာတွင် အချိန်တစ်လခန့်စခန်းချ၍ သင်ကြားပေးပြီး သင်တန်းဆရာ ငါးဦးနှင့်အတူကွန်ပျူတာ ၁၈ လုံး ပါဝင်သည်။ ပထမအကြိမ် ရွေ့လျားအိုင်စီတီ ခရီးစဉ်ကိုထန်းတ ပင်မြို့နယ်မှ စတင်ပြီး လူဦးရေ ၇၀၀ ခန့်ကို အခြေခံအိုင်စီတီပညာရပ်များ သင်ကြားပေးခဲ့သည်။

ရွေ့လျားအိုင်စီတီသင်တန်းအတွက် လိုအပ်သော ကွန်တိန်နာယာဉ်၊ ဆိုလာစနစ်နှင့် အသုံးချကွန်ပျူတာများကို အလှူရှင်များ နှင့်အတူ ရန်ကုန်တိုင်းဒေသကြီး ကွန်ပျူတာပညာရှင်အသင်း၊ ကွန်ပျူတာလုပ်ငန်းရှင်အသင်းတို့က အရင်းအနှီး စိုက်ထုတ်ခဲ့သည်။

‘‘ရွေ့လျားကွန်တိန်နာက စုစုပေါင်း ကျပ်သိန်း ၈၀၀ လောက် ကုန်ကျစရိတ်ရှိပါတယ်’’ ဟု ဦးအောင်စိုးမိုးက ပြောသည်။ သင်ကြားမှုအပိုင်းတွင် တစ်လလျှင် ကျပ်သိန်း ၄၀ ခန့် ကုန်ကျစရိတ်ရှိကြောင်း အဆိုပါကုန်ကျစရိတ်ကို ကွန်ပျူတာအသင်းနှစ်ခုက အချိုးကျထည့်ဝင်ထားကြောင်း ၎င်းက ပြောသည်။ ရွေ့လျားအိုင်စီတီသင်တန်း တက်ရောက်ရန်ကန့်သတ်ချက်များမရှိသော်လည်း တစ်နေရာတွင် အများဆုံးသင်ကြားပေးနိုင်သည့် လူဦးရေ ၉၆ ဦးကို ဒေသ တွင်းအုပ်ချုပ်ရေး အာဏာပိုင်များက ရွေးချယ်ပေးရသည်။

‘‘ဒုတိယမြောက်ခရီးစဉ်ထဲမှာ တိုက်ကြီးမြို့နယ်ဘက်ကိုလည်း ထည့်သွင်းသွားဖို့ရှိနေတယ်’’ ဟု ဦးအောင်စိုးမိုးက ပြောသည်။ ရွေ့လျားအိုင်စီတီပညာသင်ကြားရေးအတွက် ရေးဆွဲထားသည့် သင်ရိုးညွှန်းတမ်းတွင် ကွန်ပျူတာအခြေခံအပြင် အင်တာနက်စနစ်ကို ဘေးကင်းလုံခြုံစွာ အသုံးပြုတတ်ရန် ထည့်သွင်းထားကြောင်း ၎င်းကပြောသည်။

ရွေ့လျားအိုင်စီတီသင်တန်းသည် နည်းပညာကို စိတ်ဝင်စားသော လူငယ်များသာမက အခြေခံပညာ ကျောင်းဆရာ၊ ဆရာမများကိုလည်း ရုံးပိတ်ရက်များတွင် အိုင်စီတီပညာများ သင်ကြားပို့ချပေးသည်။ သင်ကြားရေးအစီအစဉ်သည် အခြေခံပညာရပ်များသာ ဖြစ်သော်လည်း အဆိုပါဒေသများသို့ နောက်တစ်ကြိမ် ပြန်လည်ရောက်ရှိသည့်အခါ အဆင့်မြင့်သင်ရိုးများ သင်ကြားမည်ဟု ရန်ကုန်တိုင်းဒေသကြီး ကွန်ပျူတာပညာရှင်အသင်းက ကြေညာသည်။

Top News