မြန်မာအိမ်အကူအမျိုးသမီး သေနတ်ဖြင့် ပစ်သတ်ခံရသည့်အချက်များ ထိုင်းရဲတပ်ဖွဲ့တွေ့ရှိဟုဆို

သတ်သေသည်ဟုဆိုကာ အမှုပိတ်ပြီး သုံးလကြာမှ အခင်းဖြစ်အိမ်ကို ဝင်စစ်
မြန်မာအိမ်အကူအမျိုးသမီးသေဆုံးသည့်နေအိမ်တွင် ထိုင်းရဲတပ်ဖွဲ့က ယမန်နေ့က သရုပ်ပြစစ်ဆေးနေစဉ် (ဓာတ်ပုံ − ရဲမင်း)

ထိုင်းနိုင်ငံ၌ သေနတ်ဒဏ်ရာဖြင့် သေဆုံးခဲ့သော အိမ်အကူ မြန်မာအမျိုး သမီးအမှုနှင့်ပတ်သက်၍ ထိုင်းရဲတပ်ဖွဲ့က အခင်းဖြစ်ပွားသည့် နေအိမ်ကို နိုဝင်ဘာ ၇ ရက်တွင် ပြန်လည်စစ်ဆေးခဲ့သည်။

အိမ်အကူ အသက်(၁၇)နှစ်အရွယ် မညိုညိုအေး သေဆုံးခဲ့သည့် နေအိမ်ကို ပြန် လည်စစ်ဆေးရာတွင် သေနတ်ဖြင့် ပစ်သတ် ခံရသည့်အချက်များကို ထိုင်းရဲတပ်ဖွဲ့က တွေ့ရှိခဲ့ကြောင်း သွားရောက်စစ်ဆေးရာ တွင် ထိုင်းရဲတပ်ဖွဲ့နှင့်အတူ လိုက်ပါသွား ပြီး ယင်းအမှု၌ ကူညီဆောင်ရွက်ပေးနေသော AAC မဟာမိတ်အဖွဲ့မှ ကိုရဲမင်းက ပြော သည်။

အသုံးပြုသည့် သေနတ်သည် ထိုင်းအိမ် ရှင်၏ အိမ်အပေါ်ထပ်ရှိ ဗီရိုထဲ၌ ထားရှိ ခြင်း၊ ကျည်ဆန်ပစ်ချက်တစ်ခုသည် ဘေး အိမ်၏ ခြံစည်းရိုးကို ထိမှန်ထားသလို နောက် ထပ်ကျည်ဆန်တစ်ခုသည် အိမ်အတွင်းရှိ မှန်ပေါင်တစ်ခုကို ထိမှန်ခြင်းတို့ကို တွေ့ရှိ ရကြောင်း ကိုရဲမင်းက ပြောသည်။

‘‘ပထမ ထိုင်းရဲတွေ ပြောထားတာက ကိုယ့်ကိုယ်ကိုယ် သတ်သေတယ်ပေါ့။ ထိုင် လျက်အနေအထားနဲ့ နှစ်ချက်ပစ်ပြီး သတ်သေတာလို့ ပြောခဲ့တာ။ အခုအနေအထား က ရုန်းရင်းဆန်ခတ်ဖြစ်ပြီး ကျည်ထွက်တဲ့ အနေအထားဖြစ်နေတယ်။ အခုတော့ ထိုင်းရဲတွေက ကိုယ့်ကိုယ်ကိုယ်သတ်သေတာလို့တော့ မပြောတော့ဘူး။ ဆေးရုံက ဆေးစစ် ချက်အဖြေပဲ စောင့်မယ်လို့ ပြောတယ်’’ဟု ကိုရဲမင်းက ပြောကြားသည်။

ယမန်နေ့က အခင်းဖြစ်ပွား သော နေအိမ်ကို စစ်ဆေးအပြီး တွင် သေဆုံးသူ၏ မိသားစုဝင်များ က ထိုင်းနိုင်ငံဆိုင်ရာ မြန်မာသံရုံးသို့ သွားရောက်၍ သံအမတ်ကြီး နှင့် တွေ့ဆုံကာ အကူအညီပေး ရန် တောင်းဆိုခဲ့ကြောင်း ကိုရဲမင်းက ဆက်လက်ပြောကြားသည်။

ထိုင်းလူမျိုးအိမ်ရှင်ထံတွင် အိမ်အကူအလုပ် လုပ်ကိုင်စဉ် သေနတ်ဒဏ်ရာဖြင့် သေဆုံးသောမညိုညိုအေး၏ ရုပ်အလောင်းကို ဂူသွင်းမြှုပ်နှံထားရာ ယခုအခါ အ လောင်းကို ပြန်လည်စစ်ဆေးရန် ထိုင်းနိုင်ငံမှုခင်းတိုက်ဖျက်ရေး အထူးရဲအဖွဲ့ (CSD)က နိုဝင်ဘာ၂ ရက် ညနေတွင် ပြန်ဖော်ခဲ့ သည်။

ထိုင်းနိုင်ငံ ရာ့ခ်ျပူရီခရိုင် ဘန်ပုံနယ်မြေရှိ ထိုင်းလူမျိုးအိမ် ရှင်ထံ အိမ်အကူအလုပ်လုပ်ကိုင် နေသော မညိုညိုအေးသည် ဩဂုတ် ၆ ရက်ည၌ သေနတ်ဒဏ် ရာနှစ်ချက်ဖြင့် သေဆုံးခဲ့ပြီး သုံး ရက်အကြာတွင် ဂူသွင်းခဲ့သည်။ မညိုညိုအေးသည် ထိုင်းအိမ်ရှင် ၏ အခန်းအတွင်း သေဆုံးနေပြီး ယင်းဖြစ်ရပ်ကို ထိုင်းနယ်မြေခံ ရဲတပ်ဖွဲ့က သေကြောင်းကြံစည် မှုအဖြစ် သတ်မှတ်ကာ အမှုပိတ် သိမ်းခဲ့သည်။

ယင်းဖြစ်ရပ်ကို ကူညီပေး နေသော AAC မဟာမိတ်အဖွဲ့က မညိုညိုအေး သေဆုံးသည့် အမှု ဖြစ်စဉ်ကို ထိုင်းနိုင်ငံအမျိုးသား မှုခင်းစစ်ဆေးရေးဌာန ဥက္ကဋ္ဌ ဒေါက်တာဖွန်သစ်ထံ သွားရောက် အကူအညီတောင်းခံရာ ဒေါက် တာဖွန်သစ်က သေနတ်ဒဏ်ရာ သည် သေကြောင်းကြံစည်မှု မဟုတ်ကြောင်း ပြောဆိုခဲ့ရာမှ အမှုကို ပြန်လည်စစ်ဆေးပေးရန် အောက်တိုဘာ ၃၁ ရက်က တောင်းဆိုခဲ့၍ ထိုင်းနိုင်ငံ မှုခင်း တိုက်ဖျက်ရေး အထူးအဖွဲ့ (CSD)က ရုပ်အလောင်းကို ပြန်လည်တူး ဖော်ပြီး စစ်ဆေးရန် ဆောင်ရွက် ခဲ့သည်။

မညိုညိုအေးကို ဩဂုတ် ၈ ရက်က ထိုင်းနိုင်ငံ လှဘော်လီမြို့ နယ် ဆွန်ဖီးအရပ်တွင် ဂူသွင်း သင်္ဂြိုဟ်ခဲ့သည်။

More in News Section