ခေါင်ရည်သောက်ပြီး အိမ်ပြန်လာသော အမျိုးသမီးတစ်ဦး အဓမ္မပြုကျင့်ခံရ

ဟုမ္မလင်းမြို့နယ်၊ ကတ် သာ  ကျေးရွာတွင် ခေါင်ရည် သောက်ပြီး နေအိမ်သို့  ပြန်လာ သော အမျိုးသမီးတစ်ဦး အဓမ္မပြုကျင့်ခံရကြောင်း ဟုမ္မလင်းမြို့ မြို့မရဲစခန်းမှူး ဒုရဲမှူး ကြည်စိုးက ပြောသည်။

‘‘အရင်ကတည်းက တစ်ရွာတည်းရင်းနှီးတဲ့သူတွေ ခေါင်ရေသောက်ကြတာပါ။ ခေါင်ရေ သောက်တဲ့သူထဲမှာ တခြားအမျိုး သမီးတွေလည်း ပါတယ်။ အဲဒီ အမျိုးသမီးက ခေါင်ရည်သောက် ပြီး အိမ်ပြန်တဲ့အချိန် အမျိုးသား တစ်ဦးက နောက်ကနေ လိုက်လာ ပြီး သားမယားပြုကျင့်တယ်လို့ သိရပါတယ်။ အမှုဖွင့်တာက မနေ့က (နိုဝင်ဘာ ၆ ရက်) ရဲစခန်းလာတိုင်တယ်။ ဖြစ်တာ နိုဝင်ဘာ ၂ ရက်နေ့ကပါ’’ဟု ဒုရဲမှူး ကြည်စိုးက ပြောသည်။

  အဓမ္မ ပြုကျင့်ခံရသည့် အမျိုးသမီးသည် အသက် (၂၁) နှစ်ရှိပြီး တစ်ရွာတည်းနေ အမျိုးသမီးတစ်ဦး၏ နေအိမ်သို့ သွားရောက်လည်ပတ်စဉ် ပျော်ပွဲစားရန် ခေါင်ရည်ဝယ်ယူကာ အမျိုးသားနှစ်ဦး၊ အမျိုးသမီး  သုံးဦးနှင့်အတူ သောက်ခဲ့သည်။ ထို့နောက်  ၎င်းအမျိုးသမီးသည် သတိလက်လွတ် ဖြစ်ချင်လာသ ဖြင့် နေအိမ်သို့ ပြန်လာရာ အိမ်အနီးရှိ စာကြည့်တိုက်အရောက် အမျိုးသား တစ်ဦးက နောက်မှ လိုက်လာပြီး ခြိမ်းခြောက်ပြော ဆိုကာ ချင်းတွင်းမြစ်ကမ်းဘေးရှိ ညောင်ပင်အောက်သို့ ခေါ်ဆောင် ပြီး အလိုမတူဘဲ အဓမ္မ ပြုကျင့်နေစဉ် တစ်ရွာတည်းနေ အမျိုးသားနှစ်ဦးက ဆိုင်ကယ်ဖြင့် ရောက်ရှိလာ၍ ကျူးလွန်သူ အမျိုးသားသည် ထွက်ပြေးသွားကြောင်း ရဲမှတ်တမ်းတွင် ဖော်ပြသည်။

ယင်းအမျိုးသားကို အရေးယူပေးရန် တိုင်ကြားသဖြင့် ဟုမ္မလင်းမြို့မြို့မရဲစခန်းက အဓမ္မပြုကျင့်မှု ရာဇသတ်ကြီး ဥပဒေပုဒ်မ ၃၇၆ အရ အမှုဖွင့်စစ်ဆေးနေသည်။

Top News