ပညာရေးဝန်ထမ်းများအတွက် သတိပေး ခေါင်းလောင်းသံ

ပညာသင်ယူနေသော အခြေခံပညာကျောင်းသူ၊ ကျောင်းသားလေးများ (ဓာတ်ပုံ-ကျော်ဇင်သန်း)

ကရင်ပြည်နယ် ဘားအံမြို့နယ် လှာကာအခြေခံပညာ အထက်တန်းကျောင်းမှ အထက်တန်းပြဆရာမသုံးဦးကို ပညာရေးဝန်ကြီးဌာနက အောက်တိုဘာ ၂၂ ရက်တွင် အလယ်တန်းပြရာထူးသို့ လျှော့ချခဲ့သည်။

ဒသမတန်းကျောင်းသားများအား သင်ထောက်ကူစာအုပ်များ ပြင်ပမှ ၀ယ်ယူရောင်းချခဲ့သည်ဟူသည့် တိုင်ကြားချက်ကြောင့် စုံစမ်းစစ်ဆေး၍အပြစ်ပေးအရေးယူခြင်းဖြစ်သည်။

အဆိုပါ ဆရာမများသည် သင်ထောက်ကူစာအုပ်များ ရောင်းချခဲ့ခြင်းမှန်သော်လည်း ရောင်းချသည့် အကြောင်းရင်းက ယခုကဲ့သို့ ရာထူးလျှော့ချ အပြစ်ပေးခံရလောက်သည်အထိ ထိုက်တန်မှုရှိ၊ မရှိဆိုသည်မှာ စဉ်းစားဖွယ်ရာ ဖြစ်သည်။

ပညာရေးဝန်ကြီးဌာနသည် အခြေခံပညာကျောင်းသားအားလုံးကို ပြဋ္ဌာန်းပုံနှိပ်စာအုပ်များ နှစ်စဉ်အခမဲ့ ပံ့ပိုးပေးလေ့ရှိသော်လည်း ယခုပညာသင်နှစ်တွင် အောက်တိုဘာ ၂၀ ရက်ကျော်မှသာ လှာကာကျောင်းသို့ ပုံနှိပ်စာ အုပ်များ ရောက်ရှိခဲ့သည်ဟု အရေးယူခံရသော အထက (လှာကာ)မှ ဆရာမဒေါ်သန်းသန်းဌေးက ဆိုသည်။

ဒသမတန်းကျောင်းသား၊ ကျောင်းသူ နှစ်ရာကျော်ကိုစာသင်ခန်း လေးခန်းခွဲ၍ သင်ကြားရန်စီ စဉ်ထားသော အထက(လှာကာ)တွင် ယခင်နှစ်က ကျောင်းသား ဟောင်းများထံမှ အလှူခံထား သော ပုံနှိပ်စာအုပ်ခြောက်ဆယ် ခန့်သာ ရှိသည်။ တစ်ခန်းနှင့်တစ် ခန်း စာသင်ချိန်အကူးတွင် ပုံနှိပ်စာအုပ်ခြောက်ဆယ်ကို သယ်ယူသင်ကြားပေးနေရခြင်းကြောင့် သင်ကြားရေးတွင် နှောင့်နှေးကြန့်ကြာမှုနှင့် ကြုံတွေ့နေရသည်။ ထို့ ကြောင့် အောင်ချက်မြင့်မားရေး သင်တန်းတက်စဉ်က ဆရာကြီး တစ်ဦးပို့ချခဲ့သော သင်ထောက် ကူစာအုပ်ကို ကိုယ်ပိုင်ငွေဖြင့် မိတ္တူကူးကာ ပုံနှိပ်စာအုပ်အစား အသုံးပြုခဲ့သည်။ ယင်းစာအုပ်များ ကို ကျောင်းသားများက ကိုယ်ပိုင် လိုချင်သည်ဟု တောင်းဆိုသော ကြောင့် တစ်အုပ်လျှင်တစ်ထောင်ကျပ်ဖြင့် ရောင်းချပေးခြင်းဖြစ်သည်ဟု ဒေါ်သန်းသန်းဌေးက ဆိုသည်။

‘‘စေတနာနဲ့ လုပ်လိုက်တဲ့ လုပ်ရပ်ဖြစ်လို့ ကျွန်မတို့ကို ခေါ်စစ်တဲ့အချိန်ထိတောင် ဘာမှမဖြစ်လောက်ဘူးလို့ ထင်ခဲ့တာ’’ဟု ပညာရေးဝန်ထမ်းလုပ်သက် နှစ် ၃၀ ရှိနေပြီဖြစ်သည့် ဆရာမ ဒေါ်သန်းသန်းဌေးက ဆိုသည်။

ပညာရေးဝန်ကြီးဌာန၏ ဌာနဆိုင်ရာ အပြစ်ပေးအရေးယူမှုအရ အဆိုပါ ဆရာမသုံးဦးအနက် နှစ်ဦးသည် ကရင်ပြည်နယ်အတွင်းရှိ အခြေခံပညာကျောင်းများတွင် အလယ်တန်းပြအဖြစ် ပြောင်းရွှေ့တာဝန်ထမ်းဆောင်ရ မည်ဖြစ်ပြီး တစ်ဦးသည် လှာကာ အခြေခံပညာ အထက်တန်း ကျောင်း၌ပင် အလယ်တန်းပြ အဖြစ် ရာထူးလျှော့ချခံရမည်ဖြစ် သည်။ သို့သော် ဆရာ၊ ဆရာမ မလုံလောက်သော လှာကာကျောင်းတွင် သင်ကြားရေးမထိခိုက်စေရန် ယခု ပညာသင်နှစ်မကုန်မီအထိ တာဝန်ထမ်းဆောင်ရဦးမည်ဖြစ် သည်။

ပညာရေးဝန်ကြီးဌာန စီမံခန့် ခွဲရေးကော်မတီ၏ စက်တင်ဘာအတွင်း ကျင်းပသောအစည်းအဝေး ဆုံးဖြတ်ချက်အရ အခြေခံ ပညာဦးစီးဌာနအောက်ရှိ ပညာရေးဝန်ထမ်းအချို့ကို ဌာနဆိုင်ရာ အပြစ်ပေးအရေးယူမှုများ ဆောင် ရွက်သည့်ဖြစ်စဉ် သုံးခုသည် ပညာ ရေးအသိုင်းအ၀ိုင်းကြား ရိုက်ခတ်မှုကြီးမားပြီး ဝေဖန်မှုများလည်း ထွက်ပေါ်လာခဲ့သည်။

နှစ်ပေါင်းများစွာ အကျင့်ပျက်ခြစားမှုကြောင့် ပညာရေးအပါအ၀င် နယ်ပယ်အသီးသီးတွင် ယိုယွင်းလျက်ရှိသော ယန္တရားများ၊ လူပုဂ္ဂိုလ်(၀န်ထမ်း)များကို ပြင်ဆင် အပြစ်ပေးအရေးယူမှုများ ထိရောက်စွာပြုလုပ်လာခြင်းကို ကြိုဆိုသော်လည်း တစ်ဖက်၌လည်း အထက်အောက်မည်သူ့ကိုမဆို တစ်ပြေးညီမျှတစွာ အပြစ်ပေးရန်လိုကြောင်း ထောက်ပြမှုများလည်း ရှိသည်။

လှာကာအခြေခံပညာအထက်တန်းကျောင်းမှ အထက်တန်းပြဆရာမသုံးဦးကို အရေးယူသည့်အပြင် အဆိုပါကျောင်းမှ ကျောင်းအုပ်ဆရာမကြီးကိုလည်း ၂၀၁၇-၁၈ ပညာသင်နှစ်ကျောင်းအပ်နှံ ရေးသီတင်းပတ်တွင် ကျောင်း သား၊ ကျောင်းသူများအား ဗလာစာအုပ်ရောင်းချခဲ့ခြင်း၊ သင်ထောက်ကူစာအုပ်များကို ပြင်ပမှ ၀ယ်ယူရောင်းချခွင့်ပြုခဲ့ခြင်းတို့ ကြောင့် အောက်တိုဘာ ၂၀ ရက် တွင် ရာထူးမှ ထုတ်ပယ်ခဲ့သည်။

ယင်းအပြင် မန္တလေးတိုင်း ဒေသကြီး ငါန်းဇွန်မြို့နယ် ပညာရေးမှူးရုံးစာရင်းကိုင်က ကျပ်သိန်းသုံးရာကို လိမ်လည်ထုတ်ယူ၍ တိမ်းရှောင်သွားခြင်းကြောင့် မြို့နယ်ပညာရေးမှူးနှင့် ဒုတိယမြို့နယ်ပညာရေးမှူးကို တစ်ဆင့်နိမ့် ရာထူးသို့ လျှော့ချကာနယ်ပြောင်း ရွှေ့တာဝန်ထမ်းဆောင်စေခဲ့သည်။ စာရင်းကိုင်ကိုယ်စား ၎င်းတို့နှစ်ဦးက အဆိုပါ ကျပ်သိန်းသုံးရာကို လျော်ပေးရန်လည်း ပညာရေးဝန်ကြီးဌာနက အောက်တိုဘာ ၁၃ ရက်တွင် အမိန့်စာ ထုတ်ပြန်ခဲ့သည်။

မကွေးတိုင်းဒေသကြီး ဂန့် ဂေါခရိုင် ထီးလင်းမြို့နယ်ပညာ ရေးမှူးကိုမူ ငွေကြေးသုံးစွဲမှုကွာဟပြီး ငွေစာရင်းရှင်းတမ်း မတင်ပြ နိုင်ခြင်း၊ လက်အောက်ဝန်ထမ်းများအပေါ် ရိုင်းပျစွာပြုမူပြောဆို ဆက်ဆံခြင်း၊ စိစစ်ကွပ်ကဲအုပ် ချုပ်မှုညံ့ဖျင်းခြင်းတို့ကြောင့် ပညာ ရေးဝန်ကြီးဌာနက အောက်တိုဘာ ၁၇ ရက်တွင် ရာထူးမှထုတ် ပယ်ခဲ့သည်။

သို့သော် ပညာရေးဝန်ကြီးဌာန စီမံခန့်ခွဲရေးကော်မတီက အ ခြေခံပညာဝန်ထမ်းအချို့ကို ရာထူးလျှော့ချခြင်း၊ ရာထူးမှ ထုတ်ပယ်ခြင်းစသည့် အပြစ်ပေးအရေးယူခြင်းများ ဆောင်ရွက်နေသော်လည်း ငွေကြေးကောက်ခံသုံးစွဲမှု ကွာဟချက်များ ရှိနေသည်ဟု တိုင်းဒေသကြီးအဆင့် စစ်ဆေး တွေ့ရှိထားသည့် တက္ကသိုလ်အဆင့်မြင့် အရာရှိတစ်ဦးကိုမူ လစာ နှုန်းတူရာထူးဖြင့် ဌာနပြောင်းရွှေ့ခန့်ထားခြင်းမျိုးသာ ဆောင်ရွက်ခဲ့သည်။

‘‘အခြေခံဘက်ကဖြစ်ဖြစ်၊ အဆင့်မြင့်ဘက်ကဖြစ်ဖြစ် ပြစ်မှု တစ်ခုခုလုပ်ရင်၊ အလွဲသုံးစားလုပ်တာမျိုးဖြစ်ရင် ဘယ်သူဖြစ်ဖြစ် အရေးယူရမှာပဲ။ အရှေ့မှာ ဖြစ်ခဲ့တဲ့ ကိစ္စတွေ၊ ဆရာတို့သိထားတဲ့ ကိစ္စတွေအရ တချို့ကအဆင့်မြင့် ဘက်မှာ အပြစ်ပေးအရေးယူမှုက သိသိသာသာ သက်ညှာမှုတွေ တွေ့ရတယ်။ နစ်နစ်နာနာကြီး အရေးယူစေချင်တာမဟုတ်ဘူး။ ဒါပေမဲ့ ဥပဒေအရှိအတိုင်းတော့ တန်းတူညီမျှ ဖြစ်စေချင်တယ်။ အခြေခံဆိုရင် လိုအပ်တာထက် ပြစ်မှုနဲ့  ပြစ်ဒဏ်မမျှဘဲ ပိုပြီးတော့ ပြစ်ဒဏ်ချမှတ်တာတွေ ကြုံနေရပေမယ့် အဆင့်မြင့်ဘက်က အရာရှိကြီးတွေ ဖြစ်လိုက်တိုင်း ကျောင်းပြောင်း၊ ဌာနပြောင်း လောက်နဲ့ပဲ ပြီးပြီးသွားတယ်။ အဲ ဒါတွေက မမျှတဘူးလို့ ဆရာ၊ ဆရာမအသိုင်းအ၀ိုင်းမှာ ပြောနေတာတွေ၊ ကြားနေရတယ်’’ ဟု ကျောက်ဆည်တက္ကသိုလ်မှ ကထိက ဒေါက်တာဇော်မျိုးလှိုင်ပြော ကြားသည်။

ပညာရေးဝန်ကြီးဌာနသို့ တိုင်ကြားလာသော တိုင်ကြားချက်များအနက် စုံစမ်းစစ်ဆေးပြီးသော အမှုကိစ္စများကိုသာ ယခုကဲ့သို့အရေးယူ ဆောင်ရွက်ခဲ့ခြင်းဖြစ်ပြီး စစ်ဆေးအရေးယူရန် တိုင်ကြားချက်များစွာ ကျန်နေသေးသည်ဟု ပညာရေးဝန်ကြီးဌာန အခြေခံ ပညာဦးစီးဌာန၊ ခေတ္တညွှန်ကြား ရေးမှူးချုပ် ဒေါက်တာအောင်နိုင် စိုးက ဆိုသည်။

‘‘အခု အစိုးရသက်တမ်းအ တွင်း အရေးယူမှုတွေ ခပ်စိပ်စိပ် တွေ့လာရတယ်ဆိုတာက လောလောဆယ်လုပ်နေတဲ့ အနေအထားလေးတွေကတာ့ အရွေ့တစ်ခုရွေ့ဖို့ ကြံတာပေါ့လေ။ ဆရာတို့ ပညာရေးက အများကြီးအပြောခံ ခဲ့ရတာတွေ ရှိတယ်။ အကြောင်း အရာများစွာနဲ့ကို အပြောခံခဲ့ရတာ။ ဒါက ဆရာ၊ ဆရာမတွေ အပေါ်မှာ အများကြီးအခြေခံတယ်’’ဟု ဒေါက်တာအောင်နိုင်စိုး က ပြောသည်။

အခြေခံပညာကျောင်းများ၊ ပညာရေးမှူးရုံးများတွင် တွေ့ကြုံ ရသော လာဘ်ပေး၊ လာဘ်ယူမှုများ၊ အလွဲသုံးစားပြုမှုများ၊ အမိန့် နှင့် ညွှန်ကြားချက်ဖောက်ဖျက်မှုများ၊ လုပ်ငန်းခွင်စည်းကမ်းဖောက်ဖျက်မှုများ၊ တာဝန်မကျေပွန်ခြင်း များနှင့်ပတ်သက်ပြီး တိုင်ကြား ချက်များ နေ့စဉ်အမှု ငါးခုထက်မနည်း ရှိနေသည်ဟု ၎င်းကဆိုသည်။

ပညာရေးဝန်ကြီးဌာန ၀န်ကြီး ရုံး၊ အခြေခံပညာဦးစီးဌာန၊ တိုင်း ဒေသကြီးနှင့် ပြည်နယ်၊ ခရိုင်၊ မြို့ နယ်ပညာရေးမှူးများသို့ ဖုန်းဖြင့်သော်လည်းကောင်း၊ စာဖြင့် သော်လည်းကောင်း၊ လူကိုယ်တိုင်သော်လည်းကောင်း တိုင်ကြားလာသည့် တိုင်ကြားချက်များကို စုံစမ်းစစ်ဆေးရေးအဖွဲ့ဖွဲ့ကာ ရှေးဦးစုံစမ်းစစ်ဆေးမှု၊ ဌာနဆိုင်ရာစုံ စမ်းစစ်ဆေးမှုဟူ၍ အဆင့်နှစ်ဆင့် ဖြင့် စစ်ဆေးသည်။ စစ်ဆေးတွေ့ ရှိချက်များပေါ် မူတည်ကာ ပညာ ရေးဝန်ကြီးဌာန စီမံခန့်ခွဲရေးကော်မတီက အရေးယူရန်ဆုံးဖြတ် ခြင်းဖြစ်သည်။

ပညာရေးဝန်ကြီးဌာနအနေ ဖြင့် နိုင်ငံ့ဝန်ထမ်းဥပဒေ၊ နည်းဥပဒေများအရ ဌာနဆိုင်ရာ အရေးယူမှုများ ဆောင်ရွက်ခြင်းဖြစ် ပြီး အခြေခံပညာဦးစီးဌာန၏ဌာန ဆိုင်ရာ ပြစ်မှုပြစ်ဒဏ်သတ် မှတ်ချက်များအရ ပြစ်ဒဏ်ချမှတ် ခြင်းဖြစ်သည်ဟု ဒေါက်တာအောင်နိုင်စိုးက ဆိုသည်။

အခြေခံပညာဦးစီးဌာန၏ ဌာနဆိုင်ရာ ပြစ်မှုပြစ်ဒဏ်များကို ဆရာ၊ ဆရာမတိုင်း မသိရှိထားခြင်းကလည်း လုပ်ငန်းဆောင်ရွက်ရာတွင် စေတနာလွန်ကဲကာ သတ်မှတ်ဥပဒေမူဝါဒများကို  ကျော် လွန်ဆောင်ရွက်မိခြင်းမျိုးက ဥပဒေကို မထင်မှတ်ဘဲ ချိုးဖောက်မှုနှင့် ကြုံရတတ်ကြောင်း အခြေခံပညာဆရာ၊ ဆရာမအချို့က ပြောကြားသည်။

‘‘ခက်တာက ဒီပြစ်မှုပြစ်ဒဏ် တွေက ကျောင်းတွေမှာ ပေးမထားဘူး။ ကျောင်းအုပ်ကြီးတွေက အစည်းအဝေးတွေကနေ သိပေမယ့် တချို့က ကိုယ့်ကျောင်းမှာ ပြန် ပြောပြတာရှိတယ်။ တချို့ကကျ တော့ မပြောဖြစ်တော့ ဆရာ၊ ဆရာမတွေက မသိကြဘူး။ ကိုယ်တိုင်ရှာဖတ်သူမှပဲသိတာ’’ဟုအလက (၂)မိတ္ထီလာမှ အလယ်တန်းပြ ဆရာမတစ်ဦးက ပြောသည်။

ပညာရေးဝန်ကြီးဌာနအနေ ဖြင့် ကောင်းမွန်သော ရည်ရွယ်ချက်ဖြင့် ပညာရေးဝန်ထမ်းများအပေါ် ယခုကဲ့သို့ အပြစ်ပေးအရေး ယူခြင်းကို ကြိုဆိုသော်လည်း အပြစ်ပေးအရေးယူသည့် ပြစ်ဒဏ်များပြင်းထန်နေသည်ဟု ဆရာ၊ဆရာမများအကြား ဝေဖန်သုံးသပ်မှုများ ရှိနေသည်။

ငွေကိုင်စာရေး ငွေလိမ်လည်မှုကြောင့် ငါန်းဇွန်မြို့နယ်ပညာ ရေးမှူးနှင့် ဒုတိယမြို့နယ်ပညာ ရေးမှူးတို့ကို ကိုယ်စားငွေပေး လျော်စေသည့် ပညာရေးဝန်ကြီးဌာန၏ အရေးယူမှုကို ပြန်လည်စဉ်းစားပေးရန် ငါန်းဇွန်ဒေသခံ ၅၀၀ ကျော်က အောက်တိုဘာ ၂၈ ရက်က ဆန္ဒဖော်ထုတ်တောင်းဆိုရသည်အထိ ရှိလာခဲ့သည်။

‘‘အရေးယူမှုတွေ ရှိလာရင် အဂတိမှုတွေလည်း နည်းလာမယ်။ အလွဲသုံးစားမှုတွေလည်း မရှိတော့ဘူးဆိုတာ ဖြစ်လာနိုင်တော့ ကောင်းပါတယ်။ ဒါပေမဲ့ အခု တွေ့နေရတဲ့ အရေးယူလိုက်တဲ့ကိစ္စတွေက အပြစ်အကြီးကြီးတွေ မဟုတ်ဘူး။ အပြစ်တော့ရှိတယ်။ ဒါပေမဲ့ ကိုယ်လုပ်လိုက်တဲ့အမှု နဲ့ ပေးတဲ့ပြစ်မှုက မတန်ဘူးဖြစ်နေတယ်။ ဥပမာ -စာအုပ်ရောင်းလို့ ပေးတဲ့အပြစ်မျိုးပေါ့။ အဲဒီထက်ကြီးတဲ့ အလွဲသုံးစားမှုတွေက သိပ်မထွက်လာဘူး’’ဟု ပဲခူးတိုင်းဒေသကြီး က၀မြို့နယ် အထကခွဲ (အေးမွန်) ကျောင်းအုပ်ကြီး ဦးအောင်ကျော်သူက ဆိုသည်။

ပညာရေးဝန်ကြီးဌာနက အောက်တိုဘာအတွင်း ဆောင်ရွက်ခဲ့သော အမှုဖြစ်စဉ်သုံးခုတွင် အပြစ်ပေးအရေးယူခံခဲ့ရသော ပညာရေးဝန်ထမ်းများသည် လုပ်သက် ၁၅ နှစ်အထက် ၀န်ထမ်း များဖြစ်သည်။ ၎င်းတို့ကျူးလွန် သော ပြစ်မှုများသည်တာဝန်ထမ်းဆောင်ခဲ့သည့် လုပ်သက်အရ ပြစ် ဒဏ်လျှော့ပေါ့စဉ်းစားပေးနိုင်သည့် ပြစ်မှုများဖြစ်သည်ဟု ဝေဖန်မှုများရှိသည်။

‘‘အရေးယူမှုတွေက အခုမှ သေချာစကိုင်တဲ့ အနေအထားမှာ အရင်ကပြစ်ချက်မရှိခဲ့ဖူးတဲ့ လုပ်သက်များတဲ့ ဆရာ၊ ဆရာမတွေကိုတော့ ပြစ်ဒဏ်လျှော့ပေါ့ပေးတာမျိုး လုပ်ပေးသင့်တယ်။ ကြီးတဲ့အမှုငယ်အောင်၊ ငယ်တဲ့အမှု ပပျောက်အောင်ပေါ့’’ဟု ဦးအောင်ကျော်သူက ပြောသည်။

ရာထူးလျှော့ချခြင်းခံရသူများအနေဖြင့် ဂုဏ်သိက္ခာ၊ ရာထူးတစ်ခုရရန် ရင်းနှီးခဲ့ရသော အချိန်ကာလများ ဆုံးရှုံးရသကဲ့သို့ ရာထူးမှ ထုတ်ပယ်ခြင်းခံရသူများသည် ၀န်ထမ်းအဖြစ်မှ ရပ်စဲခံရသည့်အပြင် နှစ်ပေါင်းများစွာ ၀န်ထမ်းအဖြစ် လုပ်ကိုင်ခဲ့သော်လည်း ပင်စင်ကြေးပင် ခံစားခွင့်မရတော့ပေ။

‘‘အထက်တန်းကျောင်းအုပ် မပြောနဲ့၊ ဆရာ၊ ဆရာမတစ် ယောက်ဖြစ်ဖို့တောင် မလွယ်ဘူး။ ၀င်ခွင့်တွေအလီလီဖြေ၊ သင်တန်းတွေတက်ပြီးမှ ဒီလိုနေရာရောက်တာ။ စိတ်စေတနာ အရင်းခံမရှိ ရင်လည်း ဒီလောက်ထိ မဖြစ်ဘူး ပေါ့နော်။ တချို့ကျတော့ပင်စင် ရခါနီးမှ ဒီလိုထုတ်ပစ်၊ ထုတ်ပယ်ဆိုတော့ ပင်စင်လေးတောင် ခံစားခွင့်မရှိတော့ဘူး။ ထုတ်ပစ်၊ ထုတ်ပယ်ကတော့ မလုပ်သင့်တဲ့အရေးယူမှုလို့ ထင်ပါတယ်’’ဟု ကရင် ပြည်နယ်ပညာရေးမှူးရုံး ဒုတိယ ညွှန်ကြားရေးမှူးဦးငွေစိုးက ပြောကြားသည်။

နိုင်ငံ့ဝန်ထမ်းနည်းဥပဒေအခန်း(၂၀)တွင် ဌာနဆိုင်ရာအရေးယူမှု၌ ၀န်ထမ်းဆိုင်ရာ ပြစ်ဒဏ်များနှင့် စပ်လျဉ်း၍လည်းကောင်း၊ အမိန့်ဆုံးဖြတ်ချက်နှင့် စပ်လျဉ်း၍လည်းကောင်း မကျေနပ်ပါက အယူခံ တင်သွင်းခွင့်ရှိသည်ဟု ဖော်ပြထားသည်။

‘‘ဌာနဆိုင်ရာ အရေးယူမှု ဘယ်အမှုမဆို အယူခံတော့ဝင်ပိုင်ခွင့်ရှိတယ်။ ဒါပေမဲ့ အခုဖြစ်သွားတာတွေက အယူခံကိုမရှိဘဲ ဆုံးဖြတ်လိုက်တာတွေ ဖြစ်နေတယ်’’ ဟု မြန်မာနိုင်ငံလုံးဆိုင်ရာဆရာ၊ ဆရာမများအဖွဲ့ချုပ် ဒုဥက္ကဋ္ဌ ဦးအောင်ကျော်သူက ပြောသည်။

အခြေခံပညာရေးဦးစီးဌာနအောက်ရှိ ပညာရေးဝန်ထမ်းများကို ဌာနဆိုင်ရာက အပြစ်ပေးရာတွင် ပြစ်မှုပြစ်ဒဏ်များ မပြင်းထန်ဘဲ မျှတစေရေး မြန်မာနိုင်ငံလုံးဆိုင်ရာ ဆရာ၊ ဆရာမများ အဖွဲ့ချုပ်အနေဖြင့် အကြံပြုစာတမ်း တစ်စောင်ရေးဆွဲကာ ပညာရေးဝန်ကြီးဌာနသို့ တင်ပြရန် စီစဉ်နေသည်။

‘‘အပြစ်ရှိလို့ အပြစ်ပေးတာကို လက်ခံတယ်။ ဒါပေမဲ့ လုပ်တဲ့အပြစ်နဲ့ ပေးတဲ့ပြစ်ဒဏ်ထိုက်တန်ဖို့ လိုတယ်’’ဟု ဦးအောင်ကျော်သူက ဆိုသည်။

Top News