ဆုံးဖြတ်ချက်မမှားဖို့ အပေါင်းအသင်းမှန်ပါစေ

ကမ္ဘာ့နိုင်ငံ အများစုရဲ့ ပြည်တွင်း နိုင်ငံရေးဖြစ်စဉ်တွေဟာ ထိလွယ်ရှလွယ် ရှုပ်ရှုပ်ထွေးထွေး တွေများ ပါတယ်။ စီးပွားရေးဖွံ့ဖြိုးတိုးတက်တဲ့ နိုင်ငံအချို့က လွဲရင် နိုင်ငံအများစုဟာ လုံးလည်ချာလည်လိုက်နေဆဲလို့ ဆိုနိုင်ပါတယ်။ မြန်မာနိုင်ငံလို အာဏာရှင်စနစ်ကနေ ဒီမိုကရေစီစင်္ကြံလမ်း ပေါ် အကူးအပြောင်းလုပ်နေရတဲ့ နိုင်ငံတွေမှာတော့ ပိုလို့တောင်ခက်ခဲ ကျပ်တည်းနေတယ်လို့ သုံးသပ်နိုင်ပါတယ်။ အဲဒီလို အခက်အခဲတွေ၊ အကျပ်အတည်းတွေ၊ စိန်ခေါ်ချက်တွေ များလေလေ၊နိုင်ငံရေးခေါင်းဆောင်တွေ၊ အထူးသဖြင့် နိုင်ငံ့စပ်ကူးမပ်ကူးကို ဦးစီးဦးဆောင်နေတဲ့ ခေါင်းဆောင်အစုအဖွဲ့တစ်ခုလုံးအနေနဲ့ ဆုံးဖြတ်ချက်မှန်ဖို့အရေး ကြီးလေလေ ဖြစ်ပါတယ်။

 အတိတ်ကခြေရာတွေကို ပြန်ကောက်ကြည့်မိပါတယ်။ မြန်မာ့နိုင်ငံရေးမှာ သုခမိန်တွေ၊ လူကြီးသူမတွေ၊ ရပ်မိရပ်ဖတွေလို့ ပြောလို့ရတဲ့သူတွေနဲ့ လွန်ခဲ့တဲ့ နှစ်သုံးဆယ်နီးနီးလောက်တုန်းက အတော်နီးနီးကပ်ကပ် နေခဲ့ရဖူးတယ်။ နှစ်နဲ့ချီ နေလာခဲ့ရတော့ သူတို့ပြောတဲ့၊ သူတို့ဆွေးနွေးတဲ့ စကားတွေ၊ အမြင်တွေ၊ သဘောထားတွေဟာ ကျွန်တော့်ရဲ့နားထဲ မှာ စွဲမြဲကျန်နေရစ်တယ်လို့ ဆိုနိုင်ပါတယ်။ အဲဒီပုဂ္ဂိုလ်ကြီးတွေအ များစုက နိုင်ငံတော်နဲ့ နိုင်ငံသားတွေကို တကယ်ချစ်တဲ့သူတွေ၊ တကယ် တိုးတက်ပြောင်းလဲစေချင်တဲ့ သူတွေဆိုတာ စကားဦးသန်းထားချင်ပါတယ်။ အဲဒီပုဂ္ဂိုလ်ကြီးတွေထဲက တချို့ဆိုရင် အိုးပစ်အိမ်ပစ်၊ မိသားစုပစ်ကာ အာဏာရှင်စနစ်ကို ဆန့်ကျင်အာခံခဲ့တဲ့အ တွက် အကြိမ်ကြိမ်အဖမ်းခံရ၊ အကြိမ်ကြိမ်ထောင်ချခံရတဲ့ သူတွေပါ။ အခုအချိန် နိုင်ငံရေးဝေဖန် ချက် ဆောင်းပါးတွေ ရေးတဲ့ အချိန်ကျမှ အဲဒီနိုင်ငံရေးသမားဟောင်းကြီးတွေဟာ ကျွန်တော့်ရဲ့သင်ဆရာ၊ မြင်ဆရာ၊ ကြားဆရာတွေဖြစ်မှန်းမသိဖြစ်နေတာကို ဆင်ခြင် သတိပြုမိလိုက်ပါတယ်။

လတ်တလော နိုင်ငံရေးအခင်းအကျင်းနဲ့လည်း လိုက်လျောညီထွေဖြစ်တဲ့၊ နာယူမှတ်သားခဲ့ ဖူးတဲ့ ဆွေးနွေးဆုံးမ စကားလေးကို မျှဝေလိုပါတယ်။ အဲဒီဆွေးနွေးစကားကတော့ နိုင်ငံရေးလုပ်တဲ့နေရာမှာ ခေါင်းဆောင်တွေရဲ့ ဆုံးဖြတ်ချက်တွေဟာ အင်မတန်မှ အရေးကြီးတယ်ဆိုတဲ့ အကြောင်းပါ။ နိုင်ငံရေးခေါင်းဆောင်တွေရဲ့ ဆုံးဖြတ်ချက်တွေမှားရင်၊ လွဲရင် အဲဒီဒဏ်ကို သူ့ရဲ့ရဲဘော်တွေ၊ လုပ်ဖော်ကိုင်ဖက်တွေ တင်မကဘူး၊ ပြည်သူလူထုတစ်ရပ် လုံးပါခံရတတ်တယ်ဆိုတာကို ဆွေးနွေးပြခဲ့ပါတယ်။ နိုင်ငံရေးမှာ ဆုံးဖြတ်ချက်မှားပြီဆိုတာနဲ့ အကုန်ဆက်တိုက် ဆုံးရှုံးလိုက်ရနိုင်တယ်ဆို တာ အနီးဆုံး မြန်မာ့ခေတ်သစ်နိုင် ငံရေး သမိုင်းစာမျက်နှာတွေကို ကြည့်ရင်တောင် သိနိုင်ပါတယ်။ အဲဒါကြောင့် နိုင်ငံရေးမှာ ဆုံးဖြတ်ချက်မှားလို့ မရနိုင်ဘူးဆိုတာ စွဲစွဲမြဲမြဲမှတ်ထားဖို့ လိုပါတယ်။

နိုင်ငံရေး ခေါင်းဆောင်ဆို တဲ့ သူတွေဟာ နိုင်ငံရေးသမားစစ် စစ်တွေဖြစ်ဖို့ ကိုယ့်ကိုယ်ကိုယ် တည်ဆောက်သင့်တယ်လို့လည်း ဆွေးနွေးခဲ့တာကို အမှတ်ရမိပါတယ်။ နိုင်ငံရေးသမားကောင်းတွေ၊ နိုင်ငံရေးပါတီကောင်းတွေနဲ့မှ ဒီမိုကရေစီနိုင်ငံရေး အပြောင်းအလဲဆို တာ မြိုင်မြိုင်ဆိုင်ဆိုင် ဖြစ်နိုင်တာပါ။ ၁၉၆၂ နောက်ပိုင်း ဒီမိုကရေစီနိုင်ငံရေး သားကြောဖြတ်ခံခဲ့ရ တော့ မျိုးဆက်တွေပြတ်တောက်၊ နိုင်ငံရေးသမား စစ်စစ်တွေရှားဆိုတဲ့ အကျိုးဆက်တွေကို ကျွန်တော်တို့ လူ့အဖွဲ့အစည်းဟာ ခါးစည်းခံခဲ့ရပါတယ်။ ၁၉၈၈ နောက်ပိုင်းမှာ တော့ အကန့်အသတ်တွေ၊ အတားအဆီးတွေ၊ ဖိနှိပ်ချုပ်ချယ်တာတွေ ရှိနေပေမယ့်လည်း နိုင်ငံရေးမျိုးဆက်တွေဟာ ပြန်လည်ရှင်သန်နိုင်ဖို့ သူ့နည်းသူ့ဟန်နဲ့ ခြေလှမ်းပြင်လာခဲ့ကြတယ်လို့ ဆိုရမှာ ဖြစ်ပါတယ်။ အဲဒီလို နိုင်ငံရေးပါတီတွေ၊ နိုင်ငံရေးသမားတွေ အားကောင်း မောင်းသန်လာဖို့ အစိုးရနဲ့ လွှတ်တော်တွေအနေနဲ့ ၀ိုင်းကူနိုင်ရင် ပိုလို့တောင် ကောင်းမယ်လို့ထင်မိပါတယ်။

ဆုံးဖြတ်ချက်မမှားဖို့ ဆိုတဲ့အကြောင်းကို ပြန်ကောက်ရရင် အပေါင်းအသင်း မမှားဖို့က အတော့်ကို အရေးကြီးတယ်လို့ ဆိုနိုင်ပါတယ်။ အပေါင်းအသင်းမှားရင် ဆုံးဖြတ်ချက်မှားမယ်။ သူများပြဿနာက ကိုယ့်ပြဿနာဖြစ်လာမယ်။ အကျပ်အတည်း၊ ပြဿနာကို ဖြေရှင်းဖို့ကြိုးစားရင်း ပိုပိုရှုပ်ထွေးလာတတ်၊ ခက်ခဲလာတတ်တယ်ဆိုတာ ဦးနှောက်ကြီး ကြီးနဲ့ သတိကြီးကြီးထားဖို့ လိုမယ်ထင်ပါတယ်။ နိုင်ငံရေးနယ်ပယ်မှာတော့ ရဲဘော် ရဲဘက်၊ လုပ်ဖော်ကိုင်ဖက်၊ မဟာမိတ်ဆိုတာ အပေါင်းအသင်းကို ရည်ညွှန်းတာ ပါ။ နိုင်ငံရေးမှာ ဘယ်သူဟာ ရဲဘော်ရဲဘက်လဲ၊ လုပ်ဖော်ကိုင်ဖက်လဲ၊ အပေါင်းအသင်းလဲဆို တာ ကွဲကွဲပြားပြားသိနိုင်ဖို့က အတော့်ကို အရေးကြီးပါတယ်။ နိုင်ငံရေးမောဟဖုံးကာ အသိမှားရင် အပေါင်းအသင်းမှားဖို့ဆိုတာ နိုင်ငံရေးမှာ အတော့်ကို လွယ်ကူလွန်းလှပါတယ်။

နိုင်ငံရေးမှာ မိတ်ဆွေကို မိတ်ဆွေမှန်းမသိရင် အပေါင်းအသင်း မှားဖို့ အလားအလာများနေပြီလို့ဆိုနိုင်ပါတယ်။ နိုင်ငံရေးမှာ အားလုံးဟာ မိတ်ဆွေပဲဆိုတဲ့ အယူအဆဟာ စိတ်ကူးယဉ်ဆန်ပါတယ်။ တကယ်တော့ မိတ်ဆွေမဖွဲ့သင့်တဲ့သူတွေ၊ အပေါင်းအသင်းမလုပ်သင့်တဲ့ သူတွေဆိုတာ နိုင်ငံရေးတင်မက နေရာတိုင်းမှာ ရှိနေပါတယ်။ မိတ်ရင်းဆွေရင်းတွေ၊ ရဲဘော်ရဲဘက်ကို ကျောခိုင်းတာ၊ မသိကျိုးကျွန်ပြုတာ၊ မိတ်ဆွေဖွဲ့သင့်တဲ့သူတွေကို မိတ်ဆွေမဖွဲ့တာဟာ အင်မတန်အကျည်းတန်တဲ့ လုပ်ရပ်တွေပဲ ဖြစ်ပါတယ်။ အဆိုးဆုံးကတော့ မိုးထဲရေထဲမှာ ဒုက္ခဆင်းရဲတွေကို  ကြံ့ကြံ့ခံရင်း ရင်ဘတ်ချင်း တစ်ထပ်တည်းကျ၊ ကျောချင်းကပ်ခဲ့ကြတဲ့ ရဲဘော်ရဲဘက်တွေကို အသိအမှတ်မပြု တာပဲ ဖြစ်ပါတယ်။ သက်ရောက်မှုတိုင်းမှာ ယင်းနဲ့ပမာဏတူညီပြီး၊ လားရာဘက်ဆန့်ကျင်တဲ့ တန်ပြန်သက်ရောက်မှုရှိတယ်ဆိုတာ ငြင်းမရတဲ့အမှန်တရားပါ။ အဲဒီအမှန်တရားဟာ နိုင်ငံရေးအပေါ်မှာလည်း  သက်ရောက်နိုင်တယ် ဆိုတာကို သတိချပ်စေချင်ပါ တယ်။

ဘယ်အလုပ်လုပ်လုပ် အပေါင်းအသင်းမမှားဖို့က အတော့်ကို အရေးကြီးပါတယ်။ နိုင်ငံရေးမှာတော့ ပိုလို့တောင် အရေးကြီးတယ်ဆိုတာ အထူးပြောစရာလို မယ် မထင်ပါဘူး။ မျက်မှောက်ခေတ် မြန်မာ့နိုင်ငံရေးပတ်ဝန်းကျင်မှာလည်း နိုင်ငံရေးခေါင်းဆောင်တွေ၊ နိုင်ငံရေးသမားတွေအနေနဲ့ အပေါင်းအသင်းမမှားဖို့ အသက်တမျှ အရေးကြီးတဲ့ အကြောင်း ဆော်သြလိုပါတယ်။ နိုင်ငံရေးခေါင်းဆောင်တွေဟာ မိတ်ဆွေစစ်တွေ၊ ရဲဘော်ရဲဘက် စစ်တွေကိုအနီးအနားမှာခေါ်ထားနိုင်ဖို့၊ အပေါင်းအသင်းလုပ်နိုင်ဖို့၊ သူတို့ရဲ့အသံတွေ၊ သူတို့ရဲ့အကြံဉာဏ်တွေကို နားစွင့်နိုင်ဖို့ အမြော်အမြင်ရှိရှိ ဖော်ဆောင်သင့်တယ် လို့ တိုက်တွန်းလိုပါတယ်။ နိုင်ငံရေးမှာ ကျားသေကို အသက်သွင်းမိတာမျိုး ဖြစ်မယ်ဆိုရင် တစ်ပူပေါ်နှစ်ပူဆင့်ဆိုတာမျိုး ဖြစ်သွား နိုင်တာကို ဆင်ခြင်သင့်ပါတယ်။

အကယ်စင်စစ် လူ့ဘောင်လူ့လောကဆိုတာ ပရိယာယ်တွေ၊မာယာတွေက များလွန်းလှပါ တယ်။ အဲဒီလိုပဲ နိုင်ငံရေးလောကဆိုတာကလည်း ပရိယာယ်တွေ၊မာယာတွေနဲ့ မွန်းကျပ်နေလေ့ရှိတဲ့ ပတ်ဝန်းကျင်တစ်ခုဖြစ်ပါ တယ်။ ဆိုလိုတာက မိတ်ဆွေတု၊ မိတ်ဆွေယောင်တွေကို မိတ်စစ်ဆွေစစ်လို့ ထင်ယောင်ထင်မှားဖြစ်ဖို့ လွယ်သလို အယုံသွင်းဖို့လည်း မခက်ခဲတဲ့ အခြေအနေတွေရှိနေတာကို သတိကပ်နိုင်ဖို့ လိုပါတယ်။ အပေါင်းအသင်းမှားရာကနေ ဆုံးဖြတ်ချက်တွေ မှားရုံတင်မကဘဲ ပူးသတ်ခံရမယ်ဆိုရင် အရှုံးပေါ်အရှုံးတွေ ဆင့်သလို ဖြစ်မှာကလည်း တွေးပူစရာ ရှိပါတယ်။ အဆိုးဆုံးကတော့ အဲဒီလိုမိတ်ဆွေတု၊ မိတ်ဆွေယောင်တွေဟာ အခွင့်အရေးရမယ်ဆိုရင်၊ အခွင့်အရေးမရတဲ့တိုင် အခွင့်အရေးရအောင်လုပ် ကာ နောက်ကျောကို ဓားနဲ့ ထိုးတတ်တယ်ဆိုတာ မပြတ်ဆင်ခြင် သတိပြုသင့်ပါတယ်။

အချုပ်အနေနဲ့ ပြောရရင် မြန်မာ့နိုင်ငံရေး ဘဂေးကြီးတွေရဲ့ ဆွေးနွေးဆုံးမစကားအပိုင်းအစ တွေကနေ ဆင့်ပွားတွေးမိလာတဲ့ စိုးရိမ်ပူပန်တာတွေကို အမြော်အမြင်ရှိရှိ သတိကပ်ဆင်ခြင်နိုင်ဖို့ မီးမောင်းထိုးပြလိုက်ရတာပါ။ လွန်ခဲ့တဲ့ နှစ်သုံးဆယ်နီးပါးတုန်း က ဘ၀တက္ကသိုလ်ထဲက အခန်းကျဉ်းလေးတွေထဲမှာ နာယူခဲ့ရဖူးတဲ့ ဆုံးမစကားဆိုပေမယ့် ဒီနေ့ဒီအချိန် မြင်နေ၊ တွေ့နေ၊  ကြားနေ၊ သိနေရတဲ့ခေတ်ပြိုင်နိုင်ငံရေး အခင်းအကျင်းနဲ့ဆက်စပ်လို့ အတော်ကလေးကို တစ်ထပ်တည်းနီးပါး ကျနေတာမို့ အစိုးရိမ်ပိုမိ တာလည်း ဖြစ်ကောင်းဖြစ်နိုင်ပါ တယ်။

  မည်သို့ပင်ဖြစ်စေ နိုင်ငံတော်နဲ့ နိုင်ငံသားတွေရဲ့အကျိုးကိုရှေးရှုကာ နိုင်ငံရေးခေါင်း ဆောင်တွေ၊ နိုင်ငံရေးသမားတွေ ဟာ ပြည်သူနဲ့၊ ပြည်သူ့ဆန္ဒနဲ့တစ်သားတည်းရပ်တည်နိုင်ဖို့ အလွန်အမင်း အရေးကြီးပါကြောင်း၊ ဆုံးဖြတ်ချက်မမှားဖို့၊ အပေါင်းအသင်းမှန်ဖို့ ဆင်ခြင်သတိကပ် သင့်ပါကြောင်း သုံးသပ်တင်ပြ လိုက်ရပါတယ်။   ။

(ဖော်ပြပါ ဆောင်းပါးသည် စာရေးသူ၏ အာဘော်သာဖြစ်ပါသည်)

Top News