မကွေးတိုင်းဒေသကြီးတွင် ရပ်ကျေးအုပ်ချုပ်ရေးမှူးများ အသစ်ပြန်လည်ရွေးချယ်နိုင်ရန် ကြီးကြပ်ရေးအဖွဲ့များ စဖွဲ့

ရပ်ကျေးအုပ်ချုပ်ရေးမှူး ရွေးကောက်ပွဲအတွက် အသိပေးစာများ ကပ်နေစဉ်

 မကွေးတိုင်းဒေသကြီးရှိ မြို့နယ်အချို့တွင် ရပ်ကျေးအုပ်ချုပ်ရေးမှူးများ အသစ်ပြန်လည်ရွေးချယ်နိုင်ရန် ရပ်ကွက်နှင့် ကျေးရွာအုပ်စုအလိုက် ကြီးကြပ်ရေးအဖွဲ့များပြန်လည် ဖွဲ့စည်းမှုများစတင် ဆောင်ရွက်နေပြီဖြစ်ကြောင်း ဒေသအာဏာပိုင်များက ပြောသည်။

မကွေးတိုင်း တောင်တွင်း ကြီးမြို့တွင် ရပ်ကျေးအုပ်ချုပ်ရေး မှူးများအသစ်ပြန်လည်ရွေးချယ် နိုင်ရန် ရပ်ကျေးကြီးကြပ်ရေးအဖွဲ့များကို နိုဝင်ဘာ ၁၀ ရက်က စတင်ဖွဲ့စည်းနေကြောင်း အထွေထွေအုပ်ချုပ်ရေးဦးစီးဌာနမှ တာဝန်ရှိသူတစ်ဦးက ပြောသည်။

 ‘‘တိုင်းကို မေးရင်တော့ ပို ပြည့်ပြည့်စုံစုံသိရမှာပါ။ မြို့နယ် တွေ အားလုံးလုပ်ရမှာ ဖြစ်ပါတယ်’’ဟု တောင်တွင်းကြီးမြို့နယ် အုပ်ချုပ်ရေးမှူးဦးသိန်းဇော်ဝင်းကပြောသည်။

 မင်းတုန်းမြို့နယ်အတွင်း ရပ်ကျေး အုပ်ချုပ်ရေးမှူးများ အသစ်ပြန်လည်ရွေးချယ်နိုင်ရန် ကြီးကြပ်ရေးအဖွဲ့များကို နိုဝင်ဘာ ၁၅ ရက်တွင် စတင်ဖွဲ့စည်းမည်ဖြစ်ပြီး ဌာနဆိုင်ရာများကို ရပ်ကျေးအလိုက် တာဝန်ခွဲဝေမှုများဆောင်ရွက်ထားပြီး ဖြစ်ကြောင်း မင်းတုန်းမြို့နယ် တိုင်းဒေသကြီးလွှတ်တော်ကိုယ်စားလှယ် ဦးအေးလှိုင်ဦးကပြောကြားသည်။

ကံမမြို့နယ်တွင် ရပ်ကျေး အုပ်ချုပ်ရေးမှူးအသစ်ပြန်လည် ရွေးချယ်နိုင်ရန် ပြင်ဆင်နေပြီဖြစ်ပြီး ယခုလအတွင်း ကြီးကြပ်ရေးအဖွဲ့များစတင်ဖွဲ့စည်းမည်ဖြစ်ကြောင်း ကံမမြို့နယ် တိုင်းလွှတ်တော်ကိုယ်စားလှယ် ဦးဇော်ဝင်းက ပြောသည်။

သရက်မြို့နယ်တွင်မူ ရပ် ကျေးအုပ်ချုပ်ရေးမှူးအသစ်ပြန် လည်ရွေးချယ်နိုင်ရန် ကြီးကြပ်ရေးအဖွဲ့များကို လာမည့်နိုဝင်ဘာ ၁၅ ရက်တွင် စတင်ဖွဲ့စည်းမည်ဖြစ်ပြီး ယင်းအဖွဲ့ဖွဲ့စည်းပြီးပါက ဆယ်ရက်အတွင်း အုပ်ချုပ်ရေးမှူးများရွေးချယ်နိုင်ရန် လျာထားကြောင်း သရက်မြို့နယ် တိုင်းဒေသကြီးလွှတ်တော်ကိုယ်စားလှယ် ဦးဇော်မိုးအောင်က ပြောကြားသည်။

အလားတူ မြိုင်မြို့နယ်တွင် ယခုရက်ပိုင်းအတွင်း ရပ်ကျေးအုပ်ချုပ်ရေးမှူးများအသစ် ပြန်လည်ရွေးချယ်နိုင်ရန် မြို့နယ်အဆင့်ဌာနဆိုင်ရာများက အစည်းအဝေးများပြုလုပ်ကာ စီမံချက်များချမှတ်နေပြီဟု မြိုင်မြို့နယ်တိုင်းလွှတ်တော် ကိုယ်စားလှယ် ဦးသက်နိုင်က ပြောသည်။

 မကွေးတိုင်း ၀န်ကြီးချုပ် ဒေါက်တာ အောင်မိုးညိုကမူ တိုင်းအတွင်းမြို့နယ်များတွင် ရပ်ကျေးအုပ်ချုပ်ရေးမှူးများကို ယခုလအ တွင်းစတင်ရွေးချယ်ပြီး လေးလတွင်း အပြီးရွေးချယ်မည်ဟု ပြောကြားထားသည်။

ရွေးကောက်ပွဲအပြီးတွင် ရပ်ကျေးအုပ်ချုပ်ရေးမှူး အသစ်များပြန်လည်ရွေးချယ်ခဲ့သော်လည်း တတိယအကြိမ်ပြင်ဆင်ခဲ့သည့် ရပ်ကျေးအုပ်ချုပ်ရေး ဥပဒေသစ်အရ ရပ်ကျေးအုပ်ချုပ်ရေးမှူးတစ်ဦး၏ သက်တမ်းသည် နိုင်ငံတော်သမ္မတ၏ သက်တမ်းအတိုင်းဖြစ်ကြောင်း ပြဋ္ဌာန်းခဲ့သဖြင့် ယခုကဲ့သို့ အသစ်ပြန်လည်ရွေးချယ်ရခြင်းဖြစ်ကြောင်း တာဝန်ရှိသူများက ဖြေကြားသည်။

Top News