ရပ်ကျေးအုပ်ချုပ်ရေးမှူး ရွေးချယ်ပွဲ တရားမျှတစေရန် ဒီချုပ်အမတ်များ ကူညီမည်

ဒီချုပ်သုံးပွင့်ဆိုင်တွေ့ဆုံပွဲသို့ ယမန်နေ့က တက်ရောက်လာသူ ပါတီဝင်အချို့ကို တွေ့ရစဉ် (ဓာတ်ပုံ − စိုင်းဇော်)

ရန်ကုန်တိုင်းအတွင်း ရပ်ကျေး အုပ်ချုပ်ရေးမှူးရွေးချယ် ပွဲများ ကျင်းပရာတွင် တရားမျှတ မှုရှိစေရေးနှင့် သက်ဆိုင်ရာ ဥပ ဒေပြဋ္ဌာန်းချက်များနှင့်အညီကျင်းပနိုင်ရေး စောင့်ကြည့်ကူညီမည် ဖြစ်ကြောင်း ဒီချုပ်လွှတ်တော် ကိုယ်စားလှယ်များကပြောသည်။


အမျိုးသားဒီမိုကရေစီအဖွဲ့ ချုပ် ဗဟိုအလုပ်အမှုဆောင်ကော် မတီဝင်များ၊ ရန်ကုန်တိုင်းဒေသ ကြီး အစိုးရအဖွဲ့နှင့် ရန်ကုန်တိုင်း ဒေသကြီးမှ ဒီချုပ်လွှတ်တော် ကိုယ်စားလှယ်များ သုံးပွင့်ဆိုင် တွေ့ဆုံပွဲကို ဗဟန်းမြို့နယ် ရွှေဂုံ တိုင်ရှိ ပါတီရုံးချုပ်၌ နိုဝင်ဘာ ၁၂ ရက်က ပြုလုပ်ခဲ့ပြီး ရပ်ကျေးအုပ် ချုပ်ရေးမှူး ရွေးချယ်ပွဲများတွင် ပူးပေါင်းဆောင်ရွက်နိုင်ရေး ဆွေး နွေးသည်။

‘‘အားလုံး ဥပဒေအတိုင်း လုပ်ဖို့ပါပဲ။ ဥပဒေအတိုင်း လုပ် မယ်ဆိုရင် ပြဿနာမရှိနိုင်ပါဘူး။ လွှတ်တော်ကိုယ်စားလှယ်ရဲ့ တာ ဝန်နဲ့ လုပ်ပိုင်ခွင့်ကိုလည်း ပေး ထားပြီးသား။ အထွေထွေအုပ် ချုပ်ရေးရဲ့ တာဝန်နဲ့ လုပ်ပိုင်ခွင့် ကလည်း ရှိပြီးသား။ အားလုံးက ပေါင်းစပ်ပြီး လုပ်မယ်ဆိုရင် ပြ ဿနာမရှိနိုင်ဘူး’’ဟု မင်္ဂလာ တောင်ညွန့်မြို့နယ် ပြည်သူ့လွှတ် တော်ကိုယ်စားလှယ် ဒေါ်ဖြူဖြူ သင်းက ပြောသည်။

ထိုသို့ ပေါင်းစပ်ဆောင်ရွက် ရမည့် ကိစ္စရပ်များနှင့်ပတ်သက်၍ တွေ့ဆုံပွဲတွင် အပြန်အလှန်ဆွေး နွေးခဲ့ကြောင်း ၎င်းကပြောသည်။ တွေ့ဆုံပွဲတွင် ရပ်ကျေးအုပ်ချုပ် ရေးမှူး ရွေးချယ်ပွဲများဒီမိုကရေစီ နည်းလမ်းတကျ ကျင်းပနိုင်ရန် ဆွေးနွေးခဲ့ကြောင်း အမျိုးသား ဒီ မိုကရေစီအဖွဲ့ချုပ် ဗဟိုအလုပ်အ မှုဆောင် အတွင်းရေးမှူးအဖွဲ့ဝင် ဦးဉာဏ်ဝင်းကပြောသည်။

‘‘ဝိုင်းပြီးတော့ ဆွေးနွေးကြ တာ။ အဓိကကတော့ လူကောင်း လူတော်၊ ရပ်ကွက်အတွက် ကိုယ် စားပြုနိုင်တဲ့သူကို ဘယ်လိုရွေး ကြမလဲဆိုတဲ့ အချက်တွေပြောကြ တာပေါ့’’ဟု ဆွေးနွေးပွဲသို့တက် ရောက်ခဲ့သည့် ရန်ကုန်မြို့တော် ဝန် ဦးမောင်မောင်စိုးက ပြော သည်။

အဆိုပါတွေ့ဆုံပွဲသို့ ပါတီ ဗဟိုအလုပ်အမှုဆောင်များဖြစ် သည့် ဦးဉာဏ်ဝင်း၊ ပြည်သူ့လွှတ် တော်ဥက္ကဋ္ဌ ဦးဝင်းမြင့်၊ ရန်ကုန် တိုင်းဒေသကြီးဝန်ကြီးချုပ် ဦးဖြိုး မင်းသိန်း၊ ဒေါက်တာမျိုးညွန့်နှင့် ရန်ကုန်တိုင်း ဒီချုပ်ဥက္ကဋ္ဌဦးမြင့် ဌေးတို့ တက်ရောက်သည်။

လက်ရှိ လွှတ်တော်က ပြင် ဆင်အတည်ပြုထားသည့် ရပ် ကျေးအုပ်ချုပ်ရေး ဥပဒေကို တတိယအကြိမ် ပြင်ဆင်ထား သည့် ဥပဒေအရ ရပ်ကျေး အုပ် ချုပ်ရေးမှူး ရွေးချယ်ပွဲများကို တစ်နိုင်ငံလုံးတွင် ပြန်လည်ကျင်း ပရန် နိုင်ငံတော်သမ္မတရုံးက ညွှန် ကြားထားသည်။

အဆိုပါ ရွေးချယ်ပွဲများကျင်း ပနိုင်ရေး ဆောင်ရွက်ရာတွင် ဒေသအချို့၌  ဥပဒေနှင့်ညီညွတ်မှု မရှိသည့် ဆောင်ရွက်မှုများရှိနေ ကြောင်း ဒီချုပ်ကိုယ်စားလှယ်များ ကပြောသည်။ ရပ်ကျေးအုပ်ချုပ် ရေးမှူး ရွေးချယ်နိုင်ရန် ကြီးကြပ် ရေးအဖွဲ့ ဖွဲ့စည်းရာတွင်ရပ်ကွက် ကျေးရွာ အုပ်စုအတွင်း နေထိုင် သူများက ရွေးချယ်ပေးသူများနှင့် ဖွဲ့စည်းရန် ပြဋ္ဌာန်းထားသည်။

သို့သော် လက်ရှိအုပ်ချုပ် ရေးမှူးအချို့က ကြီးကြပ်ရေးအ ဖွဲ့ ဖွဲ့စည်းရေး ဆောင်ရွက်ရာတွင် အိမ်ထောင်စု စာရင်းရှိသူများ သာ တက်ရောက်ရွေးချယ်နိုင် သည်ဟု ပြောဆိုဆောင်ရွက်နေ ကြောင်း လှိုင်သာယာမြို့နယ် ပြည်သူ့လွှတ်တော် ကိုယ်စား လှယ် ဦးဝင်းမင်းက ပြောသည်။

ရပ်ကျေး အုပ်ချုပ်ရေးမှူး ရွေးချယ်ပွဲများကို အမြန်ဆုံး ကျင်းပရန်နှင့် ဥပဒေနှင့်အညီ ဖြစ် စေရန်တို့ကို ရန်ကုန်တိုင်းဒေသ ကြီး ဝန်ကြီးချုပ် ဦးဖြိုးမင်းသိန်းက ညွှန်ကြားထားပြီး မြို့နယ်အချို့ တွင် လိုအပ်ချက်အရ သီးသန့် ညွှန်ကြားချက်ဖြင့် ဆောင်ရွက်ရန် ရှိကြောင်း တွေ့ဆုံပွဲတက်ရောက် သည့် ပြည်သူ့လွှတ်တော်ကိုယ် စားလှယ်တစ်ဦးကပြောသည်။

‘‘၁၄ ရက်နေ့မှာ ကျွန်မတို့ ထပ်တွေ့ပြီးတော့ ဝန်ကြီးချုပ်ရဲ့ ညွှန်ကြားချက်တွေကို ဘယ် လောက်အထိ လုပ်ပြီးပြီလဲ၊ ဘာ တွေအခက်အခဲရှိလဲဆိုတာ ပြန် ပြောကြတယ်။ ပြဿနာရှိတဲ့မြို့ နယ်တွေကိုတော့ ရပ်ဆိုင်းမယ်။ ပြန်ကြည့်မယ်ပေါ့။ လိုအပ်ရင် ဝန်ကြီးချုပ်ရုံးကနေပဲ ဆင်းပြီး တော့ တိုက်ရိုက်လုပ်ပေးမယ့်ဟာ တွေရှိမယ်’’ဟု ဒေါ်ဖြူဖြူသင်းက ပြောသည်။

ရပ်ကွက်အုပ်ချုပ်ရေးမှူး များသည် အုပ်ချုပ်ရေးယန္တရား၏ အခြေခံအကျဆုံး အစိတ်အပိုင်း ဖြစ်ပြီး မြို့နယ် အထွေထွေအုပ် ချုပ်ရေးမှူးရုံး၏ ကွပ်ကဲမှု အောက်တွင်ရှိသည်။ အထွေထွေ အုပ်ချုပ်ရေးဦးစီးဌာနသည် ပြည် ထဲရေးဝန်ကြီးဌာန လက်အောက် တွင်ရှိသည်။

Top News