မိုးကုတ်မြို့ သစ်စိမ့်ကုန်းရွာ မြေသားနိမ့်ကျမှုဖြစ်စဉ် အကြောင်းရင်းသိနိုင်ရန် ကွင်းဆင်းစစ်ဆေး

မိုးကုတ်မြို့နယ် သစ် စိမ့်ကုန်းကျေးရွာတွင် အောက် တိုဘာက ဖြစ်ပေါ်ခဲ့သည့် မြေသားနိမ့်ကျမှု ဖြစ်စဉ်နှင့်ပတ်သက်၍ အကြောင်းရင်းသိရှိနိုင်ရန် မန္တလေးတိုင်းဒေသကြီးအစိုးရအဖွဲ့ အစီအစဉ်ဖြင့် ကွင်းဆင်းစစ်ဆေး နေကြောင်း မိုးကုတ်မြို့နယ် စည်ပင်သာယာရေးကော်မတီဥက္ကဋ္ဌ ဦးဝင်းတင့်က ပြောသည်။ 

‘‘ကျောက်မျက်နဲ့ Geologi-cal (ဘူမိဗေဒဆိုင်ရာ)အဖွဲ့တွေ ကွင်းဆင်းပြီး တိုင်းတယ်။ ပြတ်ရွေ့တဲ့ အနေအထားပေါ့။ ရွာရွှေ့ရမလား၊ မရွှေ့ရဘူးလားဆိုတော့ ဘာမှ အကြောင်းမပြန်သေးဘူး။ စစ်ဆေးနေတာကတော့ နည်း နည်းကြာပြီ’’ဟု ဦးဝင်းတင့်က ပြောသည်။ 

ပြီးခဲ့သည့် အောက်တိုဘာ အတွင်းက မိုးကုတ်မြို့နှင့် ၁၅ မိုင်ခန့်ကွာဝေးသည့် သစ်စိမ့်ကုန်း (လီဆူ)ရွာတွင် မြေသားနိမ့်ကျမှု များဖြစ်ပေါ်ခဲ့ပြီး နေအိမ်ရှစ်လုံး ဘေးလွတ်ရာသို့ ပြောင်းရွှေ့ခဲ့ရ သည်။ ထို့အပြင် မြေသားအက်ကွဲ ကြောင်းများ ဖြစ်ပေါ်ခြင်းကြောင့် မန္တလေး-မိုးကုတ်ကားလမ်းတစ် နေရာတွင်လည်း ကတ္တရာလမ်း နိမ့်ဆင်းခဲ့သည်။ အဆိုပါကျေးရွာ တွင် လီဆူတိုင်းရင်းသားများ နေ ထိုင်ပြီး လူဦးရေ ၂၅၀ ခန့် (အိမ်ခြေ၆၀ ခန့်)ရှိသည်။ 

‘‘တစ်အိမ်နဲ့တစ်အိမ်က ခုနစ်လက်မလောက် နိမ့်သွားတာမျိုး တွေရှိတယ်။ တချို့လမ်းပိုင်းတွေ က တစ်ပေလောက် နိမ့်ကျသွား တာရှိတယ်’’ဟု ဦးဝင်းတင့်က ပြောသည်။ 

ရွာမြေသားများ နိမ့်ကျမှုဖြစ် ပွားခဲ့ရာ မိမိတို့ကို ပြောင်းရွှေ့ပေး ရန် ကျေးရွာနေ ပြည်သူများက တောင်းဆိုခဲ့သော်လည်း လက်ရှိ တွင် မြေသားနိမ့်ကျမှု ဆက်လက် ဖြစ်ပွားခြင်း မရှိတော့သဖြင့် နေအိမ်ပြောင်းရွှေ့ရန် တောင်းဆိုမှု များမရှိတော့ဟု ၎င်းက ဆိုသည်။ 

‘‘အစကတော့ သူတို့တွေက (ဒေသခံများ) ပြောင်းချင်ကြ တယ်။ ပြောင်းရမယ့် နေရာက အတွင်းနည်းနည်းကျတယ်။ အခု တော့လည်း တည်ငြိမ်သွားပါပြီ’’ ဟု ဦးဝင်းတင့်က ပြောသည်။ 

မြေသားနိမ့်ကျမှုကြောင့် ပြောင်းရွှေ့ခဲ့ရသည့် နေအိမ်ရှစ် လုံးမှ လူဦးရေ ၂၀ ခန့်သည် လက်ရှိအချိန်အထိ ကျေးရွာခရစ်ယာန် ဘုရားကျောင်းတွင် နေထိုင်နေပြီး ကျေးရွာပြောင်းရွှေ့ရမည်၊ မ ပြောင်းရွှေ့ရမည်ကို စစ်ဆေးရေး အဖွဲ့က မှတ်ချက်ပေးခြင်း မရှိ သေးကြောင်း ဦးဝင်းတင့်က ပြောကြားသည်။ 

Top News