ရပ်ဆိုင်းထားသည့် စက်ရုံများအနက် အဝတ်အထည်နှင့် ရော်ဘာအခြေခံပစ္စည်းစက်ရုံအချို့ ပြန်လည်ပတ်ရန် စက်မှုဝန်ကြီးစီစဉ်

မြစ်သား အထည်စက်ရုံကို တွေ့ရစဉ် (ဓာတ်ပုံ − စက်မှုဝန်ကြီးဌာန)

စက်မှုဝန်ကြီးဌာန အောက်ရှိ ရပ်ဆိုင်းထားသည့် စက်ရုံများအနက် အဝတ်အထည် နှင့် ရော်ဘာအခြေခံပစ္စည်းထုတ် လုပ်သည့် စက်ရုံ အချို့ကို အစိုးရက ဆက်လက်လုပ်ကိုင်ရန် စီစဉ် နေသည်။

လက်ရှိတွင် ယာယီရပ်ဆိုင်း ထားသော စက်ရုံများအနက် အဝတ်အထည်ရက်လုပ်သည့် စက်ရုံ ၁၂ ရုံ၊ ရော်ဘာ အခြေခံ ပစ္စည်းထုတ်လုပ်သည့် စက်ရုံ အချို့ကို ဝန်ကြီးဌာနက ပြန်လည် လုပ်ကိုင်ရန် စီစဉ်နေကြောင်း စက်မှုဝန်ကြီးဌာန ပြည်ထောင် စုဝန်ကြီး ဦးခင်မောင်ချိုက ပြော ကြားသည်။

ပြည်တွင်း၌ အဝတ်အထည် ဝယ်လိုအား ကောင်းခြင်းကြောင့် စက်မှုဝန်ကြီးဌာန အနေဖြင့် အထည်ရက်လုပ်သည့် စက်ရုံ များကို ဦးစားပေး ပြန်လည်လုပ် ကိုင်လိုကြောင်း စက်မှုဝန်ကြီး ဌာန အမြဲတမ်းအတွင်းဝန် ဦးကို ကိုလွင်က ပြောသည်။

ယာယီရပ်ဆိုင်းထားသော နိုင်ငံပိုင်စက်ရုံ ၂၈ ရုံအနက် ၂၄ ရုံကို ပြန်လည်လုပ်ကိုင်ရန် စက်မှု ဝန်ကြီးဌာနက စီစဉ်နေခြင်းဖြစ် သည်။ အဆိုပါစက်ရုံများကို ပုဂ္ဂလိကလုပ်ငန်းရှင်များနှင့် ပူး ပေါင်းပြီး ဆက်လက်လုပ်ကိုင်ရန် ပြည်ထောင်စုဝန်ကြီးက ဆန္ဒရှိ သည်။ ‘‘ပုဂ္ဂလိကရဲ့ ဆန်းသစ်တဲ့ စီမံခန့်ခွဲမှုနဲ့ဆိုရင် ဒီစက်ရုံတွေက ပိုအောင်မြင်နိုင်မယ်’’ဟု ပြည် ထောင်စုဝန်ကြီး ဦးခင်မောင်ချိုက ပြောသည်။

ပြန်လည် လည်ပတ်လုပ် ကိုင်မည့် စက်ရုံ ၂၄ ရုံအနက် ၁၂ ရုံကို စက်မှုဝန်ကြီးဌာနက တိုက် ရိုက် စီမံခန့်ခွဲဆောင်ရွက်ရန် စီ စဉ်ထားပြီး ကျန် ၁၂ ရုံကို ပုဂ္ဂလိ ကနှင့် ပူးပေါင်းဆောင်ရွက်ရန် စီစဉ်နေကြောင်း  ဦးကိုကိုလွင်က ပြောသည်။

စက်မှုဝန်ကြီးဌာနအောက်ရှိ စက်ရုံ၊ အလုပ်ရုံများသည် နှစ်စဉ် ကျပ်ငွေဘီလီယံ ထောင်ချီ၍ အရှုံးပေါ်နေခြင်းကြောင့် ပုဂ္ဂလိ ကကို လုပ်ပိုင်ခွင့် လွှဲပြောင်းပေး ရန် စီမံကိန်းနှင့် ဘဏ္ဍာရေးဝန် ကြီးဌာန ပြည်ထောင်စုဝန်ကြီး ဦးကျော်ဝင်းက ဒုတိယသမ္မတနှင့် စီးပွားရေးလုပ်ငန်းရှင်များ တွေ့ ဆုံပွဲများတွင် မကြာခဏ ထုတ် ဖော်ပြောကြားသည်။

ကုန်ထုတ်လုပ်ငန်း လုပ်ကိုင် မည့် စက်ရုံ၊အလုပ်ရုံများကို အစိုး ရက တိုက်ရိုက်ကိုင်တွယ်ပြီး စီမံ ခန့်ခွဲမှု မပြုလုပ်သင့်ဟု အကြံပြု ခဲ့ကြောင်း အမျိုးသားလွှတ်တော် ကိုယ်စားလှယ် ဦးစောမိုးမြင့်က ပြောကြားသည်။

ယခုနှစ် မတ်လအတွင်းကပြုလုပ်သည့် ပြည်ထောင်စုလွှတ် တော်  အစည်းအဝေးတွင် နိုင်ငံ ပိုင် စက်ရုံလေးရုံကို ရပ်ဆိုင်းသင့် ကြောင်း  ပြည်ထောင်စုလွှတ်တော် ဥပဒေကြမ်းကော်မတီက တင်ပြ ခဲ့သည်။ ထို့နောက် လွှတ်တော် က စက်မှုဝန်ကြီးဌာနအောက်ရှိ စက်ရုံများအပါအဝင် စက်ရုံ  ၃၃ ရုံကို ရပ်ဆိုင်းရန် ဆုံးဖြတ်ခဲ့ သည်။

Top News