အစိုးရ ရုပ်မြင်သံကြား ဌာနကို ထိန်းချုပ်ထားသော်လည်း အာဏာသိမ်းရန် မဟုတ်ဟု ဇင်ဘာဘွေစစ်တပ် ထုတ်ပြန်

ဇင်ဘာဘွေတွင် စစ်တပ်က အစိုးရပိုင် ရုပ်မြင်သံကြား ဌာနကို စီးနင်း သိမ်းပိုက်ထားပြီး ပြည်တွင်းရေး အရှုပ်အထွေးများ ကျယ်ကျယ်ပြန့်ပြန့် ပေါ်ပေါက်လျက် ရှိသည်။

နိုဝင်ဘာ ၁၄ ရက်တွင် မြို့တော် ဟာရာရီရှိ အမျိုးသား ရုပ်မြင်သံကြားဌာန ZBCထဲသို့ စစ်သား ၁၀၀ မျှ ဝင်ရောက်သွားသည်ကို တွေ့ရကြောင်း မျက်မြင်များက ဆိုသည်။ ဇင်ဘာဘွေတွင် စစ်တပ်က အာဏာသိမ်းယူရန် လှုပ်ရှားမှုတစ်ခု ဖြစ်ပွားနေပြီဟု သတင်းများ ပျံ့နှံ့လာသော်လည်း စစ်တပ် ပြောရေးဆိုခွင့်ရ အရာရှိကမူ ၎င်းတို့သည် ရာဇဝတ်သားများကိုသာ ပစ်မှတ်ထား စစ်ဆင်ရေး ဆင်နွှဲနေခြင်းဟု ZBCမှတဆင့် ထုတ်ပြန်ခဲ့သည်။

မြို့တော် မြောက်ပိုင်းတွင်မူ သေနတ်သံ၊ လက်နက်ကြီး ပစ်ခတ်သံများ ကြားနေရသည်။ ဇင်ဘာဘွေ စစ်တပ်၏ ကြေညာချက်တွင် သမ္မတ ရောဘတ်မူဂါဘီ၏ မိသားစုမှာ လုံခြုံ ဘေးကင်းကြောင်း၊ မိမိတို့သည် သမ္မတနှင့် အနီးကပ် ရှိနေသည့် ရာဇဝတ်သားများကို ရှင်းလင်းနေခြင်းသာဖြစ်ကြောင်း ဖော်ပြထားသည်။

သို့သော် အာဖရိက အရှေ့တောင်ပိုင်း ဒေသရှိ ကုန်းပိတ်နိုင်ငံအတွင်း အမှန်တကယ် ဖြစ်ပျက်နေသည့် အခြေအနေများကို တိကျစွာ ခန့်မှန်းရန် ခက်ခဲနေဆဲ ဖြစ်သည်။ တောင်အာဖရိကဆိုင်ရာ ဇင်ဘာဘွေ သံအမတ် အိုင်ဆက်မိုယိုကမူ နိုင်ငံအတွင်း အာဏာသိမ်းမှု ဖြစ်ပွားနေသည်ဆိုသော သတင်းများကို ငြင်းဆန်ခဲ့သည်။

ဇင်ဘာဘွေ စစ်တပ်က ၎င်းတို့သည် နိုင်ငံ၏ လူမှုရေးနှင့် စီးပွားရေး ကဏ္ဍကို ဆိုးရွားစွာ ထိခိုက်ဆုတ်ယုတ်စေသည့် ရာဇဝတ်မှုများ ကျူးလွန်နေသူများကို ကိုင်တွယ်နေခြင်းဟု ဆိုသည်။ “စစ်ဆင်ရေးတွေ ပြီးသွားရင် အခြေအနေက ချက်ချင်းလိုလို ပုံမှန် ပြန်ဖြစ်သွားမယ်လို့ ယုံကြည်ပါတယ်”ဟု စစ်တပ်က ထုတ်ပြန်ခဲ့သည်။

အသက် ၉၃ နှစ်အရွယ် သမ္မတ မူဂါဘီနှင့် ၎င်း၏ မိသားစုမှာ ဘေးရန်ကင်းကင်း ရှိနေပြီး ၎င်းတို့၏ လုံခြုံရေးကို စစ်တပ်က အာမခံကြောင်းလည်း ကြေညာထားသည်။

ဇင်ဘာဘွေတွင် သမ္မတ မူဂါဘီ၏ နေရာကို ဆက်ခံရန် ကိစ္စနှင့် ပတ်သက်၍ နိုင်ငံရေး ဂိုဏ်းဂဏ ကွဲပြားမှုများ ကြီးကြီးမားမား ရှိနေသည်။ မူဂါဘီက ဒုတိယ သမ္မတ ဖြစ်သူကို ရာထူးမှ ထုတ်ပယ်ခဲ့သည့်နောက် ဇင်ဘာဘွေ စစ်တပ်မှ ဗိုလ်ချုပ်ကြီး ကွန်စတန်တီနို ချီဝမ်ဂါက စစ်တပ် အနေဖြင့် ထိုအခြေအနေကို ကြားဝင် ကိုင်တွယ်နိုင်ကြောင်း သတိပေးခဲ့သည်။ ထိုအခါ အာဏာရ ဇာနူပီအက်ဖ် ပါတီက ချီဝမ်ဂါကို သစ္စာဖောက် တစ်ဦးအဖြစ် စွပ်စွဲ ရှုတ်ချခဲ့သည့်နောက် အခြေအနေများ ပိုမို ဆိုးရွားလာသည်။

ယခုဖြစ်စဉ်များ မတိုင်မီတွင် ချီဝမ်ဂါက စစ်တပ် အနေဖြင့် မူဂါဘီ၏ ပါတီအတွင်းမှ ဆိုးသွမ်း ညစ်ညမ်းသူများကို ရှင်းလင်းဖယ်ရှားရန် စီစဉ်နေကြောင်း ပြောကြားခဲ့သည်။ ZBC ရုပ်မြင်သံကြား ဌာနကို စစ်သားများက စီးနင်းခဲ့ပြီးနောက် ဝန်ထမ်းအချို့ကို အိမ်ပြန်ခွင့် ပေးခဲ့သည်။ လိုအပ်သဖြင့် ကျန်နေခဲ့သော ဝန်ထမ်းများကိုလည်း စစ်သားများက စိုးရိမ်စရာ မရှိကြောင်းနှင့် ၎င်းတို့သည် ထိုနေရာကို ထိန်းသိမ်းထားရန်သာ ရည်ရွယ်ကြောင်း နှစ်သိမ့် ပြောကြားခဲ့သည်ဟု ZBCနှင့် နီးစပ်သူများက ဆိုသည်။

မူဂါဘီသည် ၎င်း၏ အရိုက်အရာ ဆက်ခံရန်အတွက် သမ္မတကတော် ဂရေ့စ်မူဂါဘီနှင့်အပြိုင် ရေပန်းစားသူ တစ်ဦးဖြစ်သော ဒုတိယ သမ္မတ အမ်မာဆန် အန်ဂါဝါကို ပြီးခဲ့သည့် သီတင်းပတ်အတွင်း ရာထူးမှ ထုတ်ပယ်ခဲ့သည့်နောက် အခြေအနေများ ရှုပ်ထွေးလာခဲ့သည်။ ယခင်က သမ္မတရာထူးကို ဆက်ခံရန် ဂရေ့စ်နှင့် အန်ဂါဝါတို့ အပြိုင် ဖြစ်ခဲ့သော်လည်း ယခုအခါတွင်မူ ဂရေ့စ်တစ်ဦးတည်း ပြိုင်ဘက်မရှိတော့သည့် သဘောမျိုး ဖြစ်လာခဲ့သည်။

Ref: Reuters

Top News