တစ်ပတ်တာလွှတ်တော်လည်ပြန်

နိုဝင်ဘာ ၇ ရက်မှ ၁၀ ရက်အထိ
ပြည်ထောင်စုလွှတ်တော်အစည်းအဝေးပြီးနောက် ပြန်လည်ထွက်ခွာလာသော လွှတ်တော်ကိုယ်စားလှယ်များကို တွေ့ရစဉ် (ဓာတ်ပုံ-စိုင်းဇော်)

ယခုတစ်ပတ် ပြည်ထောင်စုလွှတ်တော်၊ အမျိုးသားလွှတ်တော်နှင့် ပြည်သူ့လွှတ်တော် အစည်းအဝေးများတွင် ၂၀၁၇-၁၈ ဘဏ္ဍာရေးနှစ်အတွက် အစိုးရက တောင်းခံထားသည့် ဖြည့်စွက်ဘဏ္ဍာငွေ စုစုပေါင်းကျပ်ဘီလီယံ ၂,၅၀၀ကျော်အနက် ကျပ်ဘီလီယံ ၇၀ ကျော်ဖြတ်တောက်ခဲ့ခြင်းနှင့် အိုင်တီနည်းပညာ အလွဲသုံးမှုများအား စောင့်ကြည့်ထိန်းကျောင်းပေးရေးအဆို အတည်ပြုမှုတို့က ထင်ရှားသည်။

တစ်ပတ်အတွင်း လွှတ် တော်သုံးရပ်၏ လုပ်ဆောင်ချက်များထဲမှ ထူးခြားသည့် လုပ် ဆောင်ချက်အချို့ကို ကောက်နုတ်ချက်အဖြစ် 7Day News က ဖော် ပြလိုက်ပါသည်။

နိုဝင်ဘာ ၇

ပြည်ထောင်စု လွှတ်တော်တွင် ၂၀၁၇-၁၈ ဘဏ္ဍာရေးနှစ် ပြည်ထောင်စု၏ နောက်ထပ် ဘဏ္ဍာငွေ ခွဲဝေသုံးစွဲရေး ဥပဒေကြမ်း၏ ရငွေသုံးငွေများအပေါ် ကိုယ်စားလှယ် ၁၅ ဦးက ဆွေး နွေးကာ မေးခွန်းထုတ်ခြင်းနှင့် ထောက်ပြခြင်းတို့ ပြုလုပ်သည်။

ထိုသို့ ဆွေးနွေးရာတွင် ပုလဲအမတ် ဒေါ်ခင်စန်းလှိုင်က အစိုးရက တောင်းခံထားသည့် ဖြည့်စွက်ဘဏ္ဍာငွေမှ ကျပ်သန်းပေါင်း လေးထောင်ကျော်ကို ခွင့်မပြုသင့် ကြောင်း အဆိုတင် ဆွေးနွေးသည်။ အမှတ်(၁) သံမဏိစက်ရုံ (မြင်းခြံ)သည် စက်မှုဝန်ကြီးဌာန လက်အောက်ရှိ လုပ်ငန်းလည်ပတ်မှုမရှိဘဲ ရင်ဆိုင်ထားရသည့် စက်ရုံ ၂၈ ရုံတွင် ပါဝင်ပြီး ယင်းစက်ရုံများနှင့်ပတ်သက်၍ မူဝါဒပိုင်း ဆွေးနွေးအဖြေရှာနေဆဲကာလ၌ စက်စမ်းသပ်လည်ပတ် စရိတ် ကျပ် ၄၂၂၇ ဒသမ ၆၆၆ သန်း တောင်းခံထားခြင်းမှာ မဖြစ်သင့်ကြောင်း ဒေါ်ခင်စန်းလှိုင်က ဆွေးနွေးခဲ့သည်။

ထို့နောက် နိုင်ငံတော်သမ္မတက ပြည်ထောင်စု လွှတ်တော် နာယကထံ ပေးပို့ထားသည့် လေ ကြောင်းဆိုင်ရာ နိုင်ငံတကာသဘောတူညီချက် နှစ်ရပ်တွင် ပါဝင်ရေး သဝဏ်လွှာများကို လွှတ်တော်က အတည်ပြုသည်။

ထို့အပြင် နိုင်ငံတကာသဘော တူညီချက်တစ်ရပ်တွင်ပါဝင်ရန် သမ္မတက သဝဏ်လွှာတစ်ရပ်ကို ထပ်မံပေးပို့ခဲ့ရာ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေက လွှတ်တော်သို့ ရှင်းလင်းတင်ပြသည်။

ဖိလစ်ပိုင်နိုင်ငံတွင် ကျင်းပမည့် (၃၁)ကြိမ်မြောက် အာဆီယံထိပ်သီးအစည်းအဝေးတွင် လက်မှတ်ရေးထိုးရန် စီစဉ်ထားသည့် ရွှေ့ပြောင်းအလုပ်သမားများ၏ အခွင့်အရေးများ ကာကွယ်စောင့် ရှောက်ခြင်းနှင့် မြှင့်တင်ခြင်းဆိုင်ရာ အာဆီယံသဘောတူညီချက်တွင် မြန်မာနိုင်ငံမှ ပါဝင်လက်မှတ် ရေးထိုးရေးနှင့်ပတ်သက်၍ ၎င်းက ရှင်းပြခဲ့သည်။

နိုဝင်ဘာ ၈

ဂန့်ဂေါ မဲဆန္ဒနယ်မှ ဒေါ်ယဉ်မင်းလှိုင် တင်သွင်းထားသည့် အိုင်တီနည်းပညာ အလွဲသုံးမှုများကို စောင့်ကြည့်ထိန်းကျောင်းရန် တိုက်တွန်းကြောင်းအဆိုကို ပြည် သူ့လွှတ်တော်က အတည်ပြုခဲ့သည်။ အင်တာနက် လူမှုကွန်ရက် တွင် အမုန်းစကားများ၊ သတင်းအမှားများ ပျံ့နှံ့နေခြင်းကို တားဆီးနိုင်ရန် ယင်းအဆိုတင်သွင်း ခြင်းဖြစ်ပြီး ပုဂ္ဂိုလ်ရေးဆိုင်ရာ လွတ်လပ်ခွင့်ကို ထိပါးရန် မရည်ရွယ်ကြောင်း အဆိုရှင် ဒေါ်ယဉ်မင်းလှိုင်က ဆိုသည်။

ဒေါ်ယဉ်မင်းလှိုင်၏ အဆိုကို တပ်မတော်သားတစ်ဦး အပါအဝင် ကိုယ်စားလှယ်ငါးဦးက ဆွေးနွေးခဲ့ပြီး လူမှုကွန်ရက်တွင် အမုန်းစကားနှင့် သတင်းမှား ဖြန့် ချိနေသူများကို စိစစ်ဖော်ထုတ် အရေးယူသင့်သည်ဟုဆိုသည်။

သို့သော် လက်ရှိ လွှတ်တော်က ပြဋ္ဌာန်းထားသည့် ပုဂ္ဂိုလ်ဆိုင်ရာ လွတ်လပ်မှုနှင့် လုံခြုံမှုကို ကာကွယ်ပေးရေး ဥပဒေပါ ပြဋ္ဌာန်း ချက်များနှင့်လည်းကောင်း၊ နိုင်ငံသားများ၏ ပုဂ္ဂလိက လွတ်လပ်ခွင့်ကိုလည်းကောင်း ထိခိုက်မှုမရှိ စေရန် ဆောင်ရွက်သင့်ကြောင်း ပါဝင်ဆွေးနွေးသူ ကိုယ်စားလှယ်များက အကြံပြုသည်။

အိုင်တီနည်းပညာကို အလွဲသုံးနေမှုများအား စောင့်ကြပ်ကြည့်ရှုရန်လိုအပ်၍ ဒေါ်ယဉ်မင်းလှိုင်၏ အဆိုကို အတည်ပြုသင့်ကြောင်း ပို့ဆောင်ရေးနှင့် ဆက်သွယ်ရေး ဝန်ကြီးဌာန ပြည်ထောင်စုဝန်ကြီး ဦးသန့်စင်မောင်က ပြောသည်။

နိုင်ငံတော်သမ္မတရုံး၊ ပြည် ထောင်စု ရှေ့နေချုပ်ရုံးတို့နှင့် တိုင်ပင်၍ အိုင်တီနည်းပညာအလွဲ သုံးမှုများ စောင့်ကြပ် ကြည့်ရှုဖော် ထုတ်ရေးအဖွဲ့ ဖွဲ့စည်းမည်ဖြစ် ကြောင်း ၎င်းက ပြောကြားသည်။

ယင်းနေ့အစည်းအဝေးမှာ ပင် နိုင်ငံတော်ဘတ်ဂျက်အခြေ အနေအရ လွှတ်တော်အပါအဝင် ဝန်ကြီးဌာနအားလုံးသည် ဝန် ထမ်း ဖွဲ့စည်းပုံအင်အား မပြည့်မီ သော်လည်း သက်ဆိုင်ရာဌာန အဖွဲ့အစည်းများ၏ လုပ်ငန်း ယန္တရားမှန်ကန်စွာ လည်ပတ်နိုင် ရေး ဆောင်ရွက်ရန်လိုအပ် ကြောင်း ပြည်သူ့လွှတ်တော်ဥက္ကဋ္ဌ ဦးဝင်းမြင့်က ပြောသည်။

မီတာခ ခန့်မှန်းကောက်ယူမှု ဖြင့် လုပ်ငန်းတာဝန် ကျေပွန် အောင် ဆောင်ရွက်ခြင်းမရှိသော ဝန်ထမ်းများကို အရေးယူပေးရေး နှင့်ပတ်သက်၍ မေးမြန်းဖြေကြား ပြီးချိန်တွင် လွှတ်တော်ဥက္ကဋ္ဌက ထိုသို့ ပြောကြားခြင်းဖြစ်သည်။

လျှပ်စစ်မီတာခကို ခန့်မှန်း ကောက်ယူခြင်းအပါအဝင် တာ ဝန်မကျေပွန်မှုများ ဖြစ်ပေါ်လာပါ က ထိရောက်သော အရေးယူမှု များ ပြုလုပ်၍ ဝန်ထမ်းများကို ထိန်းကျောင်းနေကြောင်း လျှပ်စစ် နှင့် စွမ်းအင်ဝန်ကြီးဌာန ဒုတိယ ဝန်ကြီး ဒေါက်တာထွန်းနိုင်က သံဖြူဇရပ်အမတ် ဦးဉာဏ်ဟိန်း၏ မေးခွန်းကို ဖြေကြားသည်။ ထို့အ ပြင် ဝန်ထမ်းဖွဲ့စည်းပုံ မပြည့်မှု ကြောင့် ထိုသို့အားနည်းချက်များ ပေါ်ပေါက်နေရသည်ဟုလည်း ဆို သည်။

ဥပဒေပြုရေးတွင် အငြင်းပွား မှုရှိနေသည့် မြန်မာနိုင်ငံလွှတ် တော်အဖွဲ့ ဥပဒေကြမ်းကို အမျိုး သားလွှတ်တော်က မဲခွဲဆုံးဖြတ်၍ အတည်ပြုသည်။ တပ်မတော် သားကိုယ်စားလှယ်၊ ပြည်ခိုင်ဖြိုး ကိုယ်စားလှယ်နှင့် ရခိုင်အမျိုးသား ပါတီဝင် ကိုယ်စားလှယ်များက ပြဋ္ဌာန်းရန်မသင့်ကြောင်း ဆွေး နွေးထားသည့် ယင်းဥပဒေကြမ်း ကို လွှတ်တော်ဥက္ကဋ္ဌ ညွှန်ကြား ချက်အရ ဥပဒေကြမ်းကော်မတီ တွင် ပြန်လည်ကြားနာပြီးနောက် မဲခွဲဆုံးဖြတ်ခဲ့ခြင်းဖြစ်သည်။ ယင်း ဥပဒေကြမ်းကို ပြဋ္ဌာန်းရန်သင့်၊ မသင့်မဲခွဲရာ ၁၉၉ ဦးအနက် ထောက်ခံမဲ ၁၁၉ မဲ၊ ကန့်ကွက်မဲ ၇၄ မဲဖြင့် ပြဋ္ဌာန်းသင့်ကြောင်း လွှတ်တော်က ဆုံးဖြတ်ခဲ့သည်။

မေးခွန်းမေးမြန်း ဖြေကြားမှု တွင် မြောက်ဦးယဉ်ကျေးမှုဒေသ ကို ကမ္ဘာ့အမွေအနှစ်စာရင်းတင် သွင်းနိုင်ရန် ဆောင်ရွက်လျက်ရှိ ပြီး ယူနက်စကိုပညာရှင်များနှင့် ပူးပေါင်းကာ အဆိုပြုလွှာမူကြမ်း စတင်ရေးသားနေကြောင်း သာ သနာရေးနှင့် ယဉ်ကျေးမှုဝန်ကြီး သူရဦးအောင်ကိုက ပြောသည်။

မြောက်ဦးယဉ်ကျေးမှုဒေသ ကမ္ဘာ့အမွေအနှစ်စာရင်းဝင်အဖြစ် သတ်မှတ်နိုင်ရေး အဆိုပြုလွှာကို ၂၀၁၈ ဇွန်လတွင်ပြုလုပ်မည့် ယူ နက်စကို ကမ္ဘာ့အမွေအနှစ် ညီ လာခံ၌ တင်သွင်းမည်ဖြစ်ကြောင်း သူရဦးအောင်ကိုက အမျိုးသား လွှတ်တော်ကိုယ်စားလှယ် ဦး မောင်ကျော်ဇံ၏ မေးမြန်းမှုကို ဖြေ ကြားသည်။

နိုဝင်ဘာ ၉

၂၀၁၇-၁၈ ဘဏ္ဍာနှစ် ပြည် ထောင်စု နောက်ထပ်ဘဏ္ဍာငွေခွဲဝေသုံးစွဲရေး ဥပဒေကြမ်းပါ ဘဏ္ဍာငွေ တောင်းခံမှုများနှင့်ပတ်သက်၍ သက်ဆိုင်ရာဝန်ကြီးဌာနများက ပြည်ထောင်စုလွှတ်တော် တွင် ရှင်းလင်းသည်။ ထိုသို့ရှင်း လင်းရာတွင် ပို့ဆောင်ရေးနှင့် ဆက်သွယ်ရေးဝန်ကြီးဌာန ဒုတိယဝန်ကြီး ဦးကျော်မျိုး၏ရှင်းလင်း ချက်က ထင်ရှားသည်။

၂၀၀၉ ခုနှစ်က တရုတ်နိုင်ငံ Exim Bank ချေးငွေဖြင့် ဝယ်ယူခဲ့သည့် လေယာဉ်သုံးစီးအတွက် ပြန်ဆပ်ရမည့်အကြွေး မကျေ သေးသော်လည်း ယင်းလေယာဉ်သုံးစီးမှာ လက်ရှိတွင် ပျံသန်းနိုင် ခြင်းမရှိတော့ကြောင်း ဒုဝန်ကြီး ဦးကျော်မျိုးက ပြောသည်။ နိုင်ငံ ပိုင် လေကြောင်းလိုင်းတွင် ပြေးဆွဲ ခဲ့သည့် အဆိုပါတရုတ်နိုင်ငံထုတ် MA-60 လေယာဉ်သုံးစီးအနက် နှစ်စီးသည် ၂၀၁၃ က မတော်တဆ ထိခိုက်မှုကြောင့် ပျက်စီးခဲ့ သည်။

ကျန်တစ်စီးသည် ပျံသန်းရန် မသင့်တော်တော့၍ ရပ်နားထားရခြင်းဖြစ်သည်။ ယင်းလေယာဉ်သုံးစီး ဝယ်ယူမှုအတွက် Exin Bank မှ တရုတ်ယွမ် ၃၉၉ သန်း ချေးယူခဲ့ပြီး ၂၀၁၇ မတ်လအထိ စုစုပေါင်းယွမ် ၁၀၁ သန်း ပေးချေ ခဲ့ပြီးဖြစ်ကြောင်း ဦးကျော်မျိုးက ပြောသည်။

ချေးငွေအတွက်အတိုးကတိ ခံကြေးနှင့် အရင်း ယွမ် ၃၇၂ သန်းနှင့်ညီမျှသော ကန်ဒေါ်လာ ၅၆ ဒသမ ၈၃၆ သန်းကို ၂၀၁၇ မတ်လမှ ၂၀၂၉ စက်တင်ဘာ ၉ ရက်အထိ ထပ်မံပေးဆပ်ရမည် ဖြစ်သည်။ အရှုံးပေါ်နေသော နိုင် ငံပိုင် လေကြောင်းလိုင်း၏ လုပ် ငန်းလည်ပတ်မှု အတန်အသင့် အဆင်ပြေနိုင်ရန် နိုင်ငံတော်က ကျခံပေးဆပ်ရန် ပြည်ထောင်စု အစိုးရအဖွဲ့က ဆုံးဖြတ်ထား ကြောင်း ၎င်းကပြောသည်။

ထို့နောက် နိုင်ငံတကာရေ ကြောင်းဆိုင်ရာ သဘောတူညီမှု နှစ်ခုတွင် မြန်မာနိုင်ငံက ပါဝင် လက်မှတ်ရေးထိုးရန် ဆောင်ရွက် ထားမှုနှင့်ပတ်သက်၍ ဒုတိယဝန် ကြီး ဦးကျော်မျိုးက ပြည်ထောင်စု လွှတ်တော်သို့ ရှင်းလင်းသည်။

သင်္ဘောများမှ မောင်းဆီ (လောင်စာဆီ) ယိုဖိတ်မှုကြောင့် ညစ်ညမ်းပျက်စီးခြင်းအတွက် တရားမကြောင်းအရ ပေးလျော် ရန် တာဝန်ရှိမှု အပြည်ပြည်ဆိုင် ရာကွန်ဗင်းရှင်း ၂၀၀၁ တွင်ပါဝင် လက်မှတ်ရေးထိုးရေးနှင့် သင်္ဘော သားများ၏ သက်သေခံအထောက် အထားများဆိုင်ရာ ကွန်ဗင်းရှင်း (ပြင်ဆင်ချက်) ၂၀၀၃၊ နံပါတ် (၁၈၅) ပါဝင်ရေး သဘောတူညီမှု များဖြစ်သည်။

နိုဝင်ဘာ ၁၀

၂၀၁၇-၁၈ ဘဏ္ဍာနှစ် ပြည် ထောင်စု၏ နောက်ထပ်ဘဏ္ဍာငွေ ခွဲဝေသုံးစွဲရေး ဥပဒေကြမ်းအရအစိုးရက တောင်းခံထားသည့် ဖြည့်စွက်ဘဏ္ဍာငွေ ကျပ်ဘီလီယံ ၂,၅၀၀ ကျော်အနက် ကျပ်ဘီလီ ယံ ၇၀ ကျော်ကို လွှတ်တော်က ဖြတ်တောက်ခဲ့သည်။

လွှတ်တော်နှစ်ရပ် ကိုယ်စားလှယ်များပါဝင်သည့် ပူးပေါင်းအဖွဲ့ ၁၇ ဖွဲ့၏ စိစစ်မှုအရ ပြည်သူ့ ငွေစာရင်း ပူးပေါင်းကော်မတီက ဖြတ်တောက်ရန် တင်ပြထားသည့် ကျပ် ၆၆ ဘီလီယံကျော်နှင့် ပြည် သူ့လွှတ်တော်ကိုယ်စားလှယ် ဒေါ်ခင်စန်းလှိုင်က သီးခြားအဆိုတင် သွင်းသည့် ကျပ်လေးဘီလီယံ ကျော် ဖြတ်တောက်ရေးတို့ကို လွှတ်တော်က အတည်ပြုသည်။

အစိုးရအဖွဲ့က လက်ရှိ ဘဏ္ဍာနှစ်အတွက် ဖြည့်စွက် ဘဏ္ဍာငွေ စုစုပေါင်းကျပ် ၂,၅၄၄ ဒသမ ၇၃၇ ဘီလီယံ တောင်းခံထားပြီး ပြည်ထောင်စုလွှတ်တော် က ၇၀ ဒသမ ၆၃၀ ဘီလီယံ ဖြတ် တောက်ခဲ့ခြင်းဖြစ်သည်။ ဒေါ်ခင် စန်းလှိုင် တင်သွင်းထားသည့် ကျပ်လေးဘီလီယံကျော် ဖြတ် တောက်ရေးအဆိုကို စက်မှုဝန်ကြီးဌာန ပြည်ထောင်စုဝန်ကြီးက ဖြတ်တောက်ရန် မသင့်ကြောင်း ရှင်းပြခဲ့ပြီး မဲခွဲရာတွင်လည်း အကြိတ်အနယ် ရှိခဲ့သည်။

ဒေါ်ခင်စန်းလှိုင်၏အဆိုနှင့် ပတ်သက်၍ မဲခွဲမှုရလဒ်မှာ ထောက်ခံမဲ ၂၈၆ မဲ၊ ကန့်ကွက်မဲ ၂၁၇ မဲ၊ ကြားနေလေးမဲဖြစ်သည်။ ဘတ်ဂျက် ဖြတ်တောက်ခံရမည့် ဝန်ကြီးဌာနများတွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင် ဆန်းစုကြည် ပြည်ထောင်စုဝန်ကြီး အဖြစ် ပူးတွဲတာဝန်ယူနေသည့် နိုင်ငံခြားရေး ဝန်ကြီးဌာနလည်း ပါဝင်သည်။

နိုင်ငံခြားရေးဝန်ကြီးဌာနသည် သာမန်အသုံးစရိတ်နှင့် ငွေလုံးငွေရင်း  အသုံးစရိတ် စုစု ပေါင်း ကျပ်သန်း ၂,၂၀၀ ဖြတ် တောက်ခံရသည်။ အများဆုံးဖြတ် တောက်ခံရသည့် ဝန်ကြီးဌာနသည် ဆောက်လုပ်ရေးဝန်ကြီးဌာန နှင့် စိုက်ပျိုးရေး မွေးမြူရေးနှင့် ဆည်မြောင်းဝန်ကြီးဌာနဖြစ်သည်။

ဆောက်လုပ်ရေးဝန်ကြီးဌာနသည် ကျပ်သန်း ၂၉,၀၀၀ (၂၉ ဘီလီယံ)နီးပါး ဖြတ်တောက်ခံရ ပြီး စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနသည် ကျပ်သန်း ၁၇,၀၀၀ (၁၇ဘီလီယံ) ကျော် ဖြတ်တောက်ခံရသည်။ အဆိုပါ ဝန်ကြီးဌာနနှစ်ရပ်ပေါင်း ဖြတ်တောက်ခံရသည့် ပမာဏ သည် လွှတ်တော်က ဖြတ်တောက် သည့် ပမာဏစုစုပေါင်း၏ သုံးပုံနှစ်ပုံခန့်ဖြစ်သည်။

ပမာဏအနည်းဆုံး ဖြတ် တောက်ခံရသည့် ဝန်ကြီးဌာနသည် အလုပ်သမား လူဝင်မှုကြီး ကြပ်ရေးနှင့် ပြည်သူ့အင်အားဝန်ကြီးဌာနဖြစ်ပြီး ၄၉ သန်းကျော်သာ ဖြတ်တောက်ခံရသည်။ ဝန်ကြီးဌာနများ၏ တောင်းခံငွေများကို သတ်မှတ် စည်းမျဉ်းစည်းကမ်း မူဝါဒများနှင့်အညီ ဖြတ်တောက် ခြင်းဖြစ်ကြောင်း ပြည်သူ့ငွေစာ ရင်း ပူးပေါင်းကော်မတီ ဒုတိယ ဥက္ကဋ္ဌ ဦးအောင်မင်းက ပြောသည်။ လွှတ်တော်က ချေးယူထားသည့် ပမာဏထက်ကျော်လွန်၍ ပြည်ထောင်စုအစိုးရက ဗဟိုဘဏ်မှ ငွေချေးယူခဲ့မှုကို လွှတ် တော်က ပြန်လည်အတည်ပြုပေးရန် စီမံကိန်းနှင့်ဘဏ္ဍာရေးဝန်ကြီး ဦးမောင်မောင်ဝင်းနှင့် ဗဟိုဘဏ် ဒုဥက္ကဋ္ဌ ဦးစိုးသိန်းတို့က ရှင်းလင်းခဲ့သည်။

၂၀၁၆-၁၇ ဘဏ္ဍာနှစ် ပြည် ထောင်စုအစိုးရ၏ လိုငွေကိုဖြည့်ဆည်းရန် ဗဟိုဘဏ်မှ ကျပ် ၁,၂၃၆ ဘီလီယံ ချေးယူရန် လွှတ် တော်က အတည်ပြုပြီးဖြစ်သော်လည်း ဘဏ္ဍာနှစ် စာရင်းပိတ်ချိန်တွင် ဗဟိုဘဏ်က ဖြည့်ဆည်းပေး ခဲ့ရသော လိုငွေသည် မူလအတည် ပြုထားသည့် ပမာဏထက် ကျပ် ၅၅၃ ဒသမ ၅၃၄ ဘီလီယံကျော် လွန်နေခြင်းဖြစ်သည်။

ထို့ကြောင့် ယင်းချေးငွေရယူမှုကို ပြန်လည်အတည်ပြုပေးရန် နိုင်ငံတော်သမ္မတက ပြည်ထောင်စုလွှတ်တော် နာယကထံ သဝဏ်လွှာ ပေးပို့ခဲ့သည်။ ယင်းချေးငွေယူမှုအပေါ် လွှတ်တော်ကိုယ်စားလှယ်များ ဆွေးနွေးရန် ရှိနေသည်။

 

Top News