ရွေးကောက်ပွဲများ၌ ဒီချုပ် အနိုင်ရရှိခြင်းတွင် လူငယ်များက အင်အားတစ်ရပ်အဖြစ် ပါဝင်ခဲ့ဟု ဦးဝင်းထိန်ပြော

အမျိုးသားဒီမိုကရေစီ အဖွဲ့ချုပ်ပါတီ(NLD) အနေဖြင့် ခေတ်အဆက်ဆက် ဝင်ရောက် ယှဉ်ပြိုင်ခဲ့သည့် ရွေးကောက်ပွဲ များ အနိုင်ရရှိခဲ့ရာတွင် လူငယ် များ၏ ပူးပေါင်းပါဝင်မှုသည် အ ရေးပါသည့် အင်အားတစ်ရပ်ဖြစ်ခဲ့ကြောင်း ပါတီဗဟိုအလုပ်အမှု ဆောင် အတွင်းရေးမှူးအဖွဲ့ဝင် ဦးဝင်းထိန်က ပြောကြားသည်။

 ချမ်းအေးသာစံမြို့နယ်ရှိ ဓမ္မသာလခန်းမ၌ နိုဝင်ဘာ ၁၉ ရက်က ပြုလုပ်သည့် ဒီချုပ်ဒုတိယ အကြိမ် နိုင်ငံလုံးဆိုင်ရာ လူငယ် ညီလာခံကျင်းပရေး ဗဟိုကော်မ ရှင်၊ ဗဟိုလုပ်ငန်းကော်မတီနှင့် မန္တလေးတိုင်းဒေသကြီးရှိ ညီလာခံကျင်းပရေးကော်မရှင်များ တွေ့ဆုံပွဲတွင် ၎င်းက အထက်ပါအတိုင်း ပြောကြားသည်။


ဒီချုပ်ဝင်ရောက်ယှဉ်ပြိုင်ခဲ့ သည့် ၁၉၉၀ ပြည့် အထွေထွေရွေးကောက်ပွဲ၊ ၂၀၁၂ ကြားဖြတ်ရွေးကောက်ပွဲနှင့် ၂၀၁၅ အထွေထွေရွေးကောက်ပွဲတို့၌ အနိုင်ရရှိမှုတွင် လူငယ်များက အင်အားကြီးမားစွာဖြင့် ပါဝင်ကူညီခဲ့ ကြောင်း ဦးဝင်းထိန်ကဆိုသည်။

 ‘‘သို့သော် ၂၀၁၅ ရွေး ကောက်ပွဲမှာ လူငယ်တာဝန်ကျ တဲ့ ပုဂ္ဂိုလ်တော်တော်များများက လွှတ်တော်အသီးသီးကို ရောက် သွားကြတယ်။ လူငယ်အင်အား တွေ နည်းသွားတယ်’’ဟု ၎င်းက ပြောသည်။

ယင်းတွေ့ဆုံပွဲသို့ လူငယ် ညီလာခံကျင်းပရေး ဗဟိုကော်မ ရှင်နှင့် ဗဟိုလုပ်ငန်းကော်မတီ အဖွဲ့ဝင်များနှင့်အတူ ပါတီဗဟို အလုပ်အမှုဆောင်အဖွဲ့ အတွင်း ရေးမှူးအဖွဲ့ဝင်များဖြစ်သည့် ဦး ဝင်းထိန်နှင့်တိုင်းဒေသကြီးဝန်ကြီး ချုပ် ဒေါက်တာဇော်မြင့်မောင်တို့ တက်ရောက်သည်။

အဆိုပါ တွေ့ဆုံပွဲသည် လူငယ်ညီလာခံကျင်းပနိုင်ရေး ဖွဲ့စည်းထားသည့် တိုင်းနှင့် ပြည် နယ်အဆင့် ကော်မရှင် ၁၇ ဖွဲ့ထံ ဗဟိုကော်မရှင်နှင့် ဗဟိုလုပ်ငန်းကော်မတီအဖွဲ့ဝင်များက သွားရောက်တွေ့ဆုံ၍ လုပ်ငန်းစဉ်များ ရှင်းပြသည့် နောက်ဆုံးတွေ့ဆုံပွဲဖြစ်ကြောင်း ညီလာခံကျင်းပရေး ဗဟိုကော်မရှင်ဥက္ကဋ္ဌ ဦး မောင်မောင်ဦးကပြောသည်။

တွေ့ဆုံပွဲသို့ မန္တလေးတိုင်း ဒေသကြီး လူငယ်ညီလာခံကျင်းပ ရေးကော်မရှင် အဆင့်ဆင့်တွင် ပါဝင်သူ ၇၀၀ ခန့် တက်ရောက်ခဲ့ ပြီး ဦးဝင်းထိန်နှင့် ဒေါက်တာဇော် မြင့်မောင်တို့က အမျိုးသားဒီမိုက ရေစီအဖွဲ့ချုပ်၏ ခေတ်အဆက် ဆက် ဖြတ်သန်းမှု၌ လူငယ်မျိုး ဆက်များ၏ အခန်းကဏ္ဍ အရေးပါပုံကို ရှင်းပြခဲ့ကြောင်း ၎င်းက ပြောသည်။

‘‘အထူးသဖြင့် မျိုးဆက်သစ် လူငယ်တွေရဲ့ အရေးပါမှုကို ဦး စားပေးပြီး ပြောသွားတာပါ။ အ ရင်က လူငယ်မျိုးဆက်တွေအ ကြောင်း ပြောပြတာပေါ့။ နောက် ထပ်လည်း လူငယ်မျိုးဆက်တွေ လိုတယ်ဆိုတဲ့အကြောင်း ပါတီရဲ့ အဓိကကျောရိုးက လူငယ်ဖြစ် တယ်ဆိုတဲ့အကြောင်း ၂၀၂၀ ရွေး ကောက်ပွဲပြင်ဆင်မှုတွေအတွက် လူငယ်တွေက အရေးကြီးတယ်ဆို တဲ့အကြောင်း ဒါလေးတွေ ပြော သွားတာပါ’’ဟု ဦးမောင်မောင်ဦး က ပြောသည်။

ဒီချုပ်၏ ဒုတိယအကြိမ် နိုင်ငံလုံးဆိုင်ရာ လူငယ်ညီလာခံကို ယခုနှစ်ကုန်တွင် ကျင်းပနိုင်ရန် ဆောင်ရွက်နေပြီး လူငယ်ပါတီဝင် တစ်သိန်းခန့် စုဆောင်းရရှိရန် မျှော်မှန်းထားသည်။

Top News