ပျောက်ဆုံးနေသည့် အာဂျင်တီးနား ရေငုပ်သင်္ဘောကို ရှာဖွေရန် အခက်အခဲများ ရင်ဆိုင်နေရ

အာဂျင်တီးနား ရေတပ်၏ ပျောက်ဆုံးနေသော ရေငုပ်သင်္ဘောကို ရှာဖွေရာတွင် အခက်အခဲများစွာ ရင်ဆိုင်နေရကြောင်း ကယ်ဆယ်ရေး အဖွဲ့များက ဝန်ခံ ပြောကြားခဲ့သည်။


ပြီးခဲ့သည့် သီတင်းပတ် ကတည်းက အာဂျင်တီးနား ရေတပ်၏ ဆန်ဟွမ် ရေငုပ်သင်္ဘောသည် နိုင်ငံ၏ အရှေ့ဘက် ကမ်းလွန် ရေပြင်တွင် အမှုထမ်း ၄၄ ဦးနှင့်အတူ ပျောက်ဆုံးနေခဲ့သည်။

ရေငုပ်သင်္ဘောကို အာဂျင်တီးနား ရေတပ်က ဖြန့်ကျက် ရှာဖွေနေသလို အမေရိကန် ရေတပ်ကလည်း သင်္ဘောနှစ်စီး ရှာဖွေကာ ကူညီထားပြီး ရေအောက်ကြမ်းပြင်တွင် လိုက်လံရှာဖွေမှုများ အစပြုလျက် ရှိနေပြီ ဖြစ်သည်။

 နိုဝင်ဘာ ၁၈ ရက်တွင်မူ ရေငုပ်သင်္ဘောမှဟု ယူဆရသည့် ဆက်သွယ်မှုလှိုင်းအချို့ကို ဂြိုဟ်တုမှတဆင့် ခြေရာခံ တွေ့ရှိခဲ့သည်။ အမေရိကန် အမျိုးသား အာကာသ အေဂျင်စီ (နာဆာ)၏ သုတေသန လေယာဉ် တစ်စီးက အဆိုပါ ဆက်သွယ်မှုကို နေရာရှာဖွေ ဖော်ထုတ်ရန် ကြိုးစားခဲ့သော်လည်း မအောင်မြင်ခဲ့ချေ။

ရေငုပ်သင်္ဘောကို နောက်ဆုံး အဆက်အသွယ် ရရှိသည့် နေရာနှင့် အနီးတဝိုက် ပင်လယ်ကြမ်းပြင်တွင် ရှာဖွေနေသော်လည်း ရာသီဥတု ဆိုးရွားမှု အပါအဝင် အခက်အခဲများစွာနှင့် ကြုံနေရကြောင်း ကယ်ဆယ်ရေး အဖွဲ့ဝင်များက ဝန်ခံခဲ့သည်။

အာဂျင်တီးနား ရေတပ်က ရေငုပ်သင်္ဘောနှင့် ပတ်သက်၍ လက်မလျှော့သေးကြောင်း၊ ဒီဇယ် အီလက်ထရောနစ် စွမ်းအင်သုံး ရေငုပ်သင်္ဘောတွင် နှစ်ပတ်ကြာ ကာလအတွက် အောက်စီဂျင်နှင့် စားနပ်ရိက္ခာ လုံလောက်ကြောင်း ပြောကြားထားသည်။

ရေငုပ်သင်္ဘောသည် နိုင်ငံတောင်ပိုင်းတွင် စစ်ရေးလေ့ကျင့်မှု တာဝန်တစ်ခုအပြီး အခြေစိုက် စခန်းသို့ ပြန်လာစဉ် နိုဝင်ဘာ ၁၅ ရက် မနက်ပိုင်းက အဆက်အသွယ် ပြတ်တောက်သွားခြင်း ဖြစ်သည်။ ရေငုပ်သင်္ဘောပေါ်တွင် မည်သည့်ပြဿနာ ရှိခဲ့ကြောင်း မသိရသေးသော်လည်း  စွမ်းအင် ထောက်ပံ့မှု ရပ်ဆိုင်းသွားခြင်း ဖြစ်နိုင်ကြောင်း ယေဘုယျ ခန့်မှန်းထားသည်။ ထို့ကြောင့်လည်း ဆက်သွယ်ရေးအတွက် အားထုတ်မှုများတွင်ပါ အခက်ကြုံနေရခြင်း ဖြစ်သည်။ ရေငုပ်သင်္ဘော နောက်ဆုံး ရှိနေနိုင်သည့် နေရာကိုလည်း တိကျစွာ ဖော်ထုတ်နိုင်ရန် ရုန်းကန်နေရဆဲဟု သိရှိရသည်။

Ref: EPA

Top News