ပျောက်ဆုံး အာဂျင်တီးနား ရေငုပ်သင်္ဘောကို ရှာဖွေမှုတွင် ရုရှားပါ ပူးပေါင်းပါဝင်လာ

ရေငုပ်သင်္ဘော ပြန်ရှာတွေ့ရန် ဆုတောင်း ရေးသားထားသည့် စာများကို ရေတပ်စခန်းအနီး ချိတ်ဆွဲထားပုံ။

ပျောက်ဆုံးနေသည့် အာဂျင်တီးနား ရေငုပ်သင်္ဘောကို ဖြန့်ကျက် ရှာဖွေရာတွင် ရုရှားလည်း ပူးပေါင်း ပါဝင်လာပြီဟု သိရသည်။


အစောပိုင်းတွင် အမေရိကန် ရေတပ်က ရှာဖွေရေး လုပ်ငန်းစဉ်အတွက် ကင်းထောက် လေယာဉ်များ ပံ့ပိုးကာ ထဲထဲဝင်ဝင် အကူအညီ ပေးနေခဲ့သည်။ အာဂျင်တီးနား သမ္မတ မော်ရစ်စီယို မာကရီက ရုရှားသမ္မတ ဗလာဒီမူ ပူတင်နှင့် ဖုန်းပြောခဲ့ကြောင်း၊ အမေရိကန်နည်းတူ ရုရှားကလည်း အာဂျင်တီးနားကို ကူညီပြီး အချက်အလက် ရှာဖွေဆန်းစစ်မှု သင်္ဘောတစ်စီးနှင့် အဖွဲ့သားများ စေလွှတ်ခဲ့ကြောင်း ပြောကြားခဲ့သည်။

အာဂျင်တီးနား ရေတပ်၏ ဆန်ဟွမ် ရေငုပ်သင်္ဘောသည် စစ်ဆင်ရေး တစ်ခုအပြီး အခြေစိုက် စခန်းသို့ အပြန် လွန်ခဲ့သည့် သီတင်းတစ်ပတ်ခန့်က အာဂျင်တီးနား အရှေ့ဘက် ကမ်းလွန်ရေပြင်တွင် အဆက်အသွယ် ပြတ်တောက်သွားခဲ့သည်။ 

လက်ရှိတွင် ရေငုပ်သင်္ဘောကို အမေရိကန်နှင့် အာဂျင်တီးနားတို့က ဦးဆောင် ရှာဖွေနေသော်လည်း စုစုပေါင်း နိုင်ငံ တစ်ဒါဇင်မျှထိ ပူးပေါင်း ပါဝင်နေကြောင်း သိရသည်။ ရေတပ် အခြေစိုက် စခန်းသည် လွန်ခဲ့သော တစ်ပတ်ကျော်က ရေငုပ်သင်္ဘော၏ နောက်ဆုံး ဆက်သွယ်မှုကို လက်ခံရရှိခဲ့သည်။

ရေတပ် ပြောရေးဆိုခွင့်ရ အရာရှိ ဗိုလ်ကြီး အန်ရီကေး ဘယ်လ်ဘီက လက်ရှိကာလသည် သေရေးရှင်ရေး အခိုက်အတန့်မျိုး ဖြစ်နေပြီဟု ဝန်ခံသည်။ ရေတပ်က ရေငုပ်သင်္ဘောသာ ရေအောက်တွင် နစ်မြုပ်နေပါက လိုက်ပါသွားသော ရေတပ်သား ၄၄ ဦးအတွက် စားနပ်ရိက္ခာနှင့် အောက်စီဂျင်သည် နှစ်ပတ်စာမျှသာ ခံနိုင်မည်ဟု ခန့်မှန်းထားသည်။

ယခုအခါ အာဂျင်တီးနား၊ အမေရိကန်၊ ဘရာဇီး၊ ချီလီ၊ ပြင်သစ်၊ ဂျာမနီ၊ ပီရူး၊ တောင်အာဖရိက၊ ဥရုဂွေးနှင့် ဗြိတိန်တို့ ပါဝင်သော ရှာဖွေရေး အဖွဲ့များသည် ရေပြင်ရှာဖွေမှုကို ရပ်နားကာ ပင်လယ်ကြမ်းပြင်ကို အဓိက အာရုံစိုက်နေပြီ ဖြစ်သည်။ အမေရိကန်သည် ပင်လယ်ကြမ်းပြင် ပုံရိပ်များကို ထောက်လှမ်းနိုင်မည့် ရေအောက် စူးစမ်းရေး ယာဉ်နှစ်စီးကိုလည်း ပေးပို့ထားသည်။

ရေငုပ်သင်္ဘော၏ ဦးစီးမှူးက ဘက်ထရီတွင် ပြဿနာ အနည်းငယ် ရှိနေကြောင်း အကြောင်းကြားခဲ့သည့်နောက် ရေတပ်က စစ်ဆင်ရေး ရုပ်သိမ်းကာ နောက်ကြောင်းပြန်လှည့်လာရန် ညွှန်ကြားခဲ့ကြောင်း သိရသည်။ ထို့အတွက် ရေငုပ်သင်္ဘောသည် လုပ်ထုံးလုပ်နည်းများအတိုင်း ရေပေါ်မှသာ ခုတ်မောင်းကာ အခြေစိုက် စခန်းသို့ ပြန်လာရမည့် သဘောဖြစ်သည်။

ရေတပ်၏ လမ်းညွှန်ချက်များအရ စစ်မဲ့ကာလတွင် ရေငုပ်သင်္ဘောများသည် အခြေစိုက် စခန်းသို့ တစ်ရက်လျှင် နှစ်ကြိမ် ဆက်သွယ်ရန် လိုအပ်သည်။ အဆိုပါ လုပ်ထုံးလုပ်နည်း ပျက်ကွက်ခြင်းက ရေငုပ်သင်္ဘောတွင် ပြဿနာ ပေါ်နေပြီမှန်း သိသာစေပြီး ရှာဖွေ ကယ်ဆယ်ရေး လုပ်ငန်းများကို အဆောတလျင် စတင်ခဲ့ခြင်း ဖြစ်သည်။

Ref: CNN

Top News