ပျောက်ဆုံး အာဂျင်တီးနား ရေငုပ်သင်္ဘောမှဟု ယူဆရသည့် ပေါက်ကွဲသံတစ်ခု ကြားခဲ့ရကြောင်း ရေတပ်ဝန်ခံ

ပေါက်ကွဲသံတစ်ခု ကြားခဲ့ရသည်ဆိုသော သတင်းက ပျောက်ဆုံး အာဂျင်တီးနား ရေငုပ်သင်္ဘောမှ အမှုထမ်းများ၏ အသက်ရှင်ကျန်ရေး မျှော်လင့်ချက်ကို မှေးမှိန်သွားစေခဲ့သည်။

အာဂျင်တီးနား ရေတပ်မှ ဆန်ဟွမ် ရေငုပ်သင်္ဘောသည် ပြီးခဲ့သည့် သီတင်းပတ်ကုန်က အတ္တလန္တိတ် သမုဒ္ဒရာတောင်ပိုင်း၊ နိုင်ငံအရှေ့ဘက် ကမ်းလွန်ရေပြင်တွင် ရှိနေစဉ် အဆက်အသွယ် ပြတ်တောက်သွားခဲ့သည်။ ရေငုပ်သင်္ဘောကို အမေရိကန်နှင့် အာဂျင်တီးနားတို့ ဦးဆောင်ကာ နိုင်ငံစုံက ဖြန့်ကျက် ရှာဖွေနေပြီး ရေအောက်ကြမ်းပြင်တွင် ရှိနေပါက လိုက်ပါသွားသူ ၄၄ ဦးအတွက် အသက်ရှင်ရန် မျှော်လင့်နိုင်သေးကြောင်း ရေတပ်က ပြောကြားခဲ့သည်။

သို့သော် နျူကလီးယား စမ်းသပ်မှု စောင့်ကြည့်အဖွဲ့ တစ်ခုက ပြီးခဲ့သည့် သီတင်းပတ်အတွင်း ဆန်ဟွမ် ရေငုပ်သင်္ဘော ပျောက်ဆုံးသွားသည့် အချိန်ဝန်းကျင်တွင် အဆိုပါ ဧရိယာ၌ မူမှန်မဟုတ်သော၊ ပြတ်တောင်းသော်လည်း ပြင်းထန်သော ပေါက်ကွဲသံ တစ်ခုကို ထောက်လှမ်း ရရှိခဲ့ကြောင်း ကြေညာခဲ့သည်။

အမေရိကန် ရေတပ်က ယင်းနေရာတွင် ပြင်းထန်ကျယ်လောင်သော ပေါက်ကွဲသံတစ်ခု ကြားသိခဲ့ရကြောင်း သီးခြား ထုတ်ပြန်ခဲ့သလို အာဂျင်တီးနား ရေတပ်ကလည်း ယင်းအသံသည် ဆန်ဟွမ် ရေငုပ်သင်္ဘောထံမှ ဖြစ်နိုင်ကြောင်း ဝန်ခံခဲ့သည်။

ထို့ကြောင့် သတင်းကောင်းအတွက် မျှော်လင့်ချက် ယဲ့ယဲ့ကို ဆုပ်ကိုင်ထားသည့် သက်ဆိုင်ရာ မိသားစုဝင်များအတွက် ကြေကွဲမှုနှင့် ဒေါသအမျက်ထွက်မှု ရောပြွမ်းပြီး ကြေညာချက်ကို တုံ့ပြန်လာကြသည်။

အစောပိုင်းတွင် ရေတပ်က အကယ်၍ ရေငုပ်သင်္ဘောသာ ပင်လယ်ကြမ်းပြင်တွင် ရှိနေပါက သီတင်းနှစ်ပတ်စာအတွက် အောက်စီဂျင်နှင့် ရိက္ခာ လုံလောက်နိုင်ကြောင်း ပြောကြားခဲ့သည်။ သို့သော် ရေငုပ်သင်္ဘောတွင် ပြင်းထန်သည့် ပေါက်ကွဲမှုတစ်ခု ဖြစ်ခဲ့ရိုး မှန်ပါကမူ မျှော်လင့်ချက် မရှိတော့သည့် သဘောဟု ယူဆနိုင်သည်။

နိုင်ငံတကာ နျူကလီးယား စမ်းသပ်မှု စောင့်ကြည့်အဖွဲ့ CTBTOက ၎င်းတို့၏ ထောက်လှမ်းရေး ဌာနခွဲ နှစ်ခုသည် ရေအောက်တွင် မူမှန်မဟုတ်သည့် ပြင်းထန်သော တွန်းကန် ပေါက်ကွဲအား တစ်ခုကို ထောက်လှမ်း ရရှိခဲ့ကြောင်း ပြောကြားခဲ့သည်။ အမေရိကန်ကလည်း ပုံမှန်မဟုတ်သည့် ရေဖိအား ပြောင်းလဲမှု တစ်ခုကို ရေငုပ်သင်္ဘော ပျောက်ဆုံးကြောင်း သိရှိပြီး နာရီပိုင်းမျှ အကြာတွင် အဆိုပါ ဧရိယာ၌ ထောက်လှမ်း တွေ့ရှိခဲ့ကြောင်း ဆိုသည်။

ဆန်ဟွမ် ရေငုပ်သင်္ဘောကို လတ်တလောတွင် ရှာမတွေ့သေးသလို မည်သို့သော ကံကြမ္မာနှင့် ရင်ဆိုင်ခဲ့ရသည် ဆိုခြင်းကိုလည်း တိတိကျကျ မခန့်မှန်းနိုင်သေးချေ။ အစောပိုင်းကမူ ရေငုပ်သင်္ဘော၏ အင်ဂျင်နှင့် အီလက်ထရောနစ် စနစ်များ ချွတ်ယွင်း ပျက်စီးသွားခြင်း ဖြစ်နိုင်ကြောင်း ရေတပ်က ခန့်မှန်းခဲ့သည်။

ယခုအခါ ရေတပ်သားများ၏ ကျန်ရစ်သူ ဆွေမျိုးသားချင်းများက အာဂျင်တီးနား ရေတပ်သည် ၎င်းတို့ကို မျှော်လင့်ချက် အမှားများ ပေးခဲ့သည်ဟု ဒေါသတကြီး ဝေဖန်စွပ်စွဲမှုများ ပြုလုပ်နေကြောင်း သိရသည်။

Ref: Reuters

Top News