နိုင်ကျဉ်းဟောင်းအဖွဲ့နှစ်ဖွဲ့ ပူးပေါင်းရန်စီစဉ်

အထက်မြန်မာပြည် နိုင်ငံရေးအကျဉ်းသားဟောင်း များအဖွဲ့နှင့် ပူးပေါင်းနိုင်ရေး စည်းမျဉ်းစည်းကမ်းများရေးဆွဲရန် စီစဉ်နေကြောင်း နိုင်ငံရေးအကျဉ်းသားဟောင်းများအဖွဲ့လုပ်ငန်းကော်မတီဝင် ဦးတင်မောင်ဦးက ပြောသည်။


အထက်မြန်မာပြည်နိုင်ငံရေး အကျဉ်းသားဟောင်းများအဖွဲ့နှင့် နိုင်ငံရေးအကျဉ်းသားဟောင်း များအဖွဲ့တို့ ပေါင်းစည်းရန် ကနဦးသဘောတူညီထားသော်လည်း စည်းမျဉ်းရေးဆွဲနိုင်ရန် ကျန်ရှိနေ ခြင်းကြောင့် ပေါင်းစည်းနိုင်ရေး ကြန့်ကြာနေခြင်း ဖြစ်သည်။

‘‘ဘယ်လိုပုံစံပေါင်းကြမလဲ ဆိုတာကို စည်းမျဉ်းတွေရေးပြီး တော့ သူတို့ဆီကိုပို့ရမှာ။ အစည်း အဝေးတွေလုပ်ပြီးတော့ နောက် ဆုံးပေါင်းစည်းရေးဖြစ်မှာပေါ့။ ကျွန်တော်တို့မလုပ်နိုင်သေးတဲ့ အခါမှာ ဒီဟာက ကြန့်ကြာသလို ဖြစ်နေတယ်’’ဟု ဦးတင်မောင်ဦး က ပြောသည်။

နိုင်ငံရေးအကျဉ်းသားများ တကွဲတပြားဖြစ်နေခြင်းကို ပြက် ရယ်ပြုနေသည့် သူများရှိနေခြင်း ကြောင့် ပေါင်းစည်းရေးလုပ်ကာ တိုင်းပြည်အကျိုး ပိုမိုလုပ်ဆောင် နိုင်စေရေး ရည်ရွယ်ကြောင်း ၎င်း က ပြောသည်။

‘‘နိုင်ကျဉ်းဆိုတာက မြန်မာ ပြည်မှာက ဒီချုပ်ကလွဲရင် နေရာ အနှံ့မှာရှိနေတဲ့ အင်အားအကြီး မားဆုံး၊နိုင်ငံရေးအရ ထဲထဲဝင်ဝင် ဖြတ်သန်းလာကြတဲ့သူတွေဖြစ် တဲ့အတွက်ကြောင့်မို့ နိုင်ငံရေးအ ရ အရမ်းအားကောင်းသွားပြီး တော့ တိုင်းပြည်မှာ မဖြစ်သင့်မ ဖြစ်ထိုက်တာကို ကျွန်တော်တို့ အားနဲ့ တားဆီးသွားနိုင်မယ်ထင် လို့ ခုလိုပေါင်းစည်းခြင်း ဖြစ်ပါ တယ်’’ဟု ၎င်းက ဆိုသည်။

နိုင်ငံရေး အကျဉ်းသားဟောင်းများ အဖွဲ့နှစ်ဖွဲ့ပူးပေါင်း ခြင်းကြောင့် အင်အားတောင့် တင်းသည်ဆိုသော်လည်း ပါတီဖွဲ့ စည်းခြင်းကိုမူ ဆောင်ရွက်မည် မဟုတ်ကြောင်း ဦးတင်မောင်ဦး က ပြောသည်။

ယင်းအဖွဲ့နှစ်ဖွဲ့သည် နိုင်ငံ ရေးအကျဉ်းသားဟောင်းများ နာမကျန်းဖြစ်၍ ဆေးရုံတက်ကုသရာတွင် ကူညီထောက်ပံ့ပေးခြင်း၊ ဖမ်းဆီးခံ နိုင်ငံရေးအကျဉ်းသားများ လွတ်မြောက်ရေး ကြေညာချက်များထုတ်ပြန်ကာ အစိုးရကို တောင်းဆိုခြင်းများ ပြုလုပ်နေသည်။