အလှူသွားသည့်ကားတစ်စီးတိမ်းမှောက်၊ လူ၁၀ ဦးဒဏ်ရာရ

ယာဉ်တိမ်းမှောက်မှုကြောင့် ဒဏ်ရာရရှိနေသူတစ်ဦးကို တွေ့ရစဉ် (ဓာတ်ပုံ − Bo Bo Win FB)

အလှူသွားမည့်သူများ ပါသည့် ကားတစ်စီးမော်လမြိုင်- ဘားအံလမ်းမကြီးပေါ်တွင် အရှိန် လွန်တိမ်းမှောက်သဖြင့် သံဃာ လေးပါးအပါအ၀င် ၁၀ ဦးဒဏ်ရာ ရရှိကြောင်း ယာဉ်တိမ်းမှောက်မှုကို သွားရောက်ကူညီခဲ့သည့် အမျိုးသားတစ်ဦးက ပြောသည်။

မော်လမြိုင်ဘက်မှ ဘားအံ ဘက်သို့ မောင်းနှင်လာသည့် မစ် ဆူဘီရှီပစ်ကပ်အမျိုးအစားကိုယ် ပိုင်ယာဉ်သည် ဒီဇင်ဘာ ၃ ရက် နံနက် ၆ နာရီခန့်က လမ်းလျှောက်နေသည့် အမျိုးသားတစ်ဦးကို တိုက်မိပြီး တိမ်းမှောက်ခဲ့ခြင်း ဖြစ်ကြောင်း ၎င်းက ဆက်လက်ရှင်းပြသည်။

‘‘အဲဒီနားက ချိုင့်နဲ့ လှိုင်းတွေ ရှိတယ်။ အရှိန်ကလည်း များနေ တော့ စလစ်ဖြစ်ပြီး၊ လမ်းဘေးက လူကိုတိုက်မိပြီးမှောက်သွားတာ။ တာယာလည်းကွဲသွားတယ်။ သူတို့က ခရားကျေးရွာမှာ အလှူလုပ်ဖို့ သွားကြရင်းဖြစ်တာ။ ဒဏ်ရာရတဲ့ သူတွေကိုတော့ မော်လမြိုင်ဆေးရုံကို ပို့ထားတယ်’’ဟု အဆိုပါအမျိုးသားက ပြောသည်။

ယာဉ်တိုက်ခံရသော အမျိုး သားလည်း ဒဏ်ရာရရှိခဲ့သည်။ ယာဉ်ပေါ်တွင်ပါဝင်သော သံဃာ လေးပါး၊ အမျိုးသားလေးဦးနှင့် အမျိုးသမီး တစ်ဦးတို့ ဒဏ်ရာရရှိ ပြီး အသက်အန္တရာယ်မစိုးရိမ်ရ ကြောင်း နယ်မြေရဲစခန်းမှ ရဲအရာရှိတစ်ဦးက ပြောသည်။

ယာဉ်တိမ်းမှောက်မှုကြောင့် ယာဉ်မောင်း ဦးလှမြင့်ကို သရနာနယ်မြေရဲစခန်းက ယာဉ်မဆင်မခြင်မောင်းနှင်မှုပုဒ်မ ၂၇၉ အပြင် အခြားသူ၏ အသက်ကို ဘေးဖြစ်စေသော နာကျင်စေမှုပုဒ်မ ၃၃၇၊ အခြားသူ၏ အသက်ကို ဘေးဖြစ်စေသောအပြင်းအထန်နာကျင်စေမှုပုဒ်မ ၃၃၈ ဖြင့် အမှုဖွင့်အရေးယူထားသည်။