မူလတန်းပြ ဆရာ၊ ဆရာမနှစ်သိန်းခန့်ကို ဒုတိယတန်းသင်ရိုးသစ် နည်းပြသင်တန်းပေးမည်

 ၂၀၁၈-၁၉ ပညာသင် နှစ်တွင် စတင်ပြောင်းလဲမည့် ဒုတိယတန်း သင်ရိုးသစ်အတွက် တစ်နိုင်ငံလုံးရှိ မူလတန်းပြဆရာ၊ ဆရာမ နှစ်သိန်းခန့်ကို နည်းပြ သင်တန်းပေးမည်ဟု ပညာရေး ဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီးက ပြော သည်။

ယခု ၂၀၁၇-၁၈ ပညာသင် နှစ်တွင် စတင်သော ပထမတန်း သင်ရိုးသစ်ကို သင်ကြားပေးမည့် ဆရာ၊ ဆရာမ ငါးသောင်းခန့်ကို ယခင်နှစ်က နည်းပြသင်တန်း များပေးခဲ့ရာ ရာထူးတိုးနှင့် အပြောင်းအရွှေ့များ ဆောင်ရွက် ပြီးချိန်တွင် သင်တန်းပေးထား သော ဆရာ၊ ဆရာမများ ပြောင်း ရွှေ့ခဲ့သည်။ ထို့ကြောင့် ဒုတိယတန်းသင်ရိုးသစ် သင်ကြား နည်းများကို မူလတန်းပြဆရာ၊ ဆရာမအားလုံးကို သင်တန်းပေး မည်ဟု ၎င်းကဆိုသည်။

‘‘မနှစ်က ဆရာ၊ ဆရာမ နှစ် သိန်းနီးပါးရှိတာကို ငါးသောင်းပဲ သင်တန်းခေါ်လိုက်တဲ့အတွက် အဲဒီငါးသောင်း ပြောင်းသွားတာ နဲ့ ရာထူးတိုးသွားတာနဲ့ ဖြစ်တယ်။ ဒါကြောင့်မို့ ဒီနှစ်မှာတော့ Grade 2 (ဒုတိယတန်း) Text Book အသစ်တွေကို မူလတန်းပြဆရာ နှစ်သိန်းနှစ်သောင်းစလုံးကို သင် တန်းပေးမယ်’’ဟု ဒေါက်တာမျိုး သိမ်းကြီးက ပြောသည်။

အခြေခံပညာ အတန်းများ ကို တစ်နှစ်တစ်တန်းနှုန်း သင်ရိုး ညွှန်းတမ်းအသစ်များဖြင့် ၂၀၁၆ -၁၇ ပညာသင်နှစ်က စတင်၍ သင်ကြားနေရာ ဒုတိယတန်းကို လာမည့် ၂၀၁၈-၁၉ ပညာသင် နှစ်တွင် သင်ရိုးသစ်ဖြင့် သင်ကြား မည်ဖြစ်သည်။ အသစ်ရေးဆွဲထား သော ဒုတိယတန်းသင်ရိုးသစ်ကို မူလတန်းပြဆရာ၊ ဆရာမအား လုံး သင်ကြားနိုင်ရန် ၂၀၁၇ ဒီဇင် ဘာအတွင်း ဗဟိုအဆင့်နည်းပြ သင်တန်းများ စတင်ဖွင့်လှစ်မည် ဖြစ်သည်။

‘‘ဒီဇင်ဘာကျောင်းပိတ်ရက် မှာ ဗဟိုအဆင့်သင်တန်းတွေ စမယ်။ ပြီးရင် တိုင်းအဆင့်၊ မြို့ နယ်အဆင့်၊ ခရိုင်အဆင့်၊ ကျောင်းအဆင့် ဆင့်ပွားသင်တန်း တွေ ပေးမယ်’’ဟု အခြေခံပညာ ဦးစီးဌာန ခေတ္တညွှန်ကြားရေးမှူး ချုပ် ဒေါက်တာအောင်နိုင်စိုးက ပြောသည်။

လက်ရှိ သင်ကြားနေသည့် ဒုတိယတန်းသင်ရိုးတွင် မြန်မာ၊ အင်္ဂလိပ်၊ သင်္ချာ၊ သိပ္ပံနှင့် လူမှု ရေးဘာသာရပ် ငါးခုပါရှိပြီး တွဲ ဖက်သင်ရိုးဘာသာရပ်များအဖြစ် စာရိတ္တနှင့် ပြည်သူ့နီတိ၊ ပန်းချီ၊ ကာယနှင့် ဂီတတို့ပါဝင်သည်။

သင်ရိုးသစ်တွင် အဆိုပါဘာ သာရပ်များအပြင် တိုင်းရင်းသား ဘာသာရပ်များပါ ထည့်သွင်း ဖြည့်စွက်မည်ဖြစ်ပြီး သင်ရိုး အဟောင်းကဲ့သို့ အထွေထွေဘာ သာ၊ တွဲဖက်သင်ရိုးဟူ၍ ခွဲခြား မည်မဟုတ်ဘဲ ဘာသာရပ်အား လုံးကို အဓိကဘာသာအဖြစ် သင်ကြားမည်ဟု ပညာရေးဝန် ကြီးဌာန ပြောရေးဆိုခွင့်ရှိသူ ဒေါက်တာခိုင်မြဲက ပြောသည်။

ဒုတိယတန်းသင်ရိုးညွှန်း တမ်းအသစ်များကို ဂျပန်အပြည် ပြည်ဆိုင်ရာ  ပူးပေါင်းဆောင်ရွက် ရေး အေဂျင်စီ (JICA) နှင့် အခြေခံပညာသင်ရိုးညွှန်းတမ်း ကော်မတီတို့ ပူးပေါင်းရေးဆွဲခြင်း ဖြစ်သည်။

More in News Section