တားမြစ်ဆေး ကိစ္စကြောင့် ဆောင်းရာသီ အိုလံပစ်တွင် ရုရှားနိုင်ငံ ပါဝင်ခွင့် ပိတ်ပင်ခံရ

တားမြစ်ဆေး ပြဿနာနှင့် ဆက်စပ်၍ ရုရှား အားကစားအဖွဲ့ကို ပြုံချမ်း ဆောင်းရာသီ အိုလံပစ်တွင် ပါဝင်ခွင့် တားမြစ် ပိတ်ပင်လိုက်ကြောင်း သိရသည်။

နိုင်ငံတကာ အိုလံပစ် ကော်မတီက ဆောင်းရာသီ အိုလံပစ်တွင် ရုရှားနိုင်ငံကို ပါဝင်ခွင့် ပြုမည်မဟုတ်ကြောင်း အတည်ပြု ကြေညာခဲ့သည်။ သို့သော် ရုရှား အားကစား မောင်မယ်များ အနေဖြင့် ၎င်းတို့ တားမြစ်ဆေး သုံးစွဲမှု ကင်းစင်ကြောင်း သက်သေပြနိုင်ပါက ရုရှားအလံကို ကိုယ်စားမပြုဘဲ တောင်ကိုရီးယားရှိ ပြိုင်ပွဲကြီးတွင် ပါဝင် ယှဉ်ပြိုင်ခွင့် ရဖွယ်ရှိနေသည်။

၂၀၁၄ ခုနှစ်၊ ဆိုချီ ဆောင်းရာသီ အိုလံပစ်၌ ရုရှားအစိုးရက ထောက်ခံအားပေးသည့် အိုလံပစ် အသင်းဝင်များသည် တားမြစ်ထားသည့် ဆေးဝါးသုံးစွဲမှုများ ရှိနေကြောင်း ဖော်ထုတ် တွေ့ရှိမှုနှင့် ဆက်စပ်၍ ယခုလို ဆုံးဖြတ်ခဲ့ခြင်း ဖြစ်သည်။ “ပုံရိပ် ထိခိုက်ခဲ့တဲ့ အခြအနေကို ပြတ်ပြတ်သားသား ကိုင်တွယ်ဖို့ ဆုံးဖြတ်ခဲ့ပါတယ်”ဟု နိုင်ငံတကာ အိုလံပစ် ကော်မတီက ကြေညာသည်။

ရုရှားအစိုးရနှင့် အားကစား အဖွဲ့များကမူ ယခုဆုံးဖြတ်ချက်နှင့် ပတ်သက်၍ ကျယ်ကျယ်ပြန့်ပြန့် ဝေဖန် ရှုတ်ချမှုများ ပြုလုပ်ခဲ့သည်။ ထို့အပြင် နိုင်ငံရေးသမား အချို့က ရုရှား အားကစားသမား အားလုံးက ပြိုင်ပွဲကို သပိတ်မှောက်သင့်ကြောင်း တောင်းဆိုကြသည်။ သို့သော် အစိုးရ အရာရှိ အချို့ကမူ တားမြစ်ဆေး သုံးစွဲမှု ကင်းရှင်းကြောင်း သက်သေပြနိုင်သည့် အားကစား မောင်မယ်များကို ပြုံချမ်းမြို့သို့ သွားရောက် ယှဉ်ပြိုင်ရန် အားပေးသွားမည်ဟု ပြောကြားထားသည်။

ရုရှား အိုလံပစ် ကော်မတီက ၎င်းတို့သည် တားမြစ်ဆေး ကင်းရှင်းသည့် အားကစားသမားများကို စုစည်းကာ ရုရှားနိုင်ငံ ကိုယ်စားမပြုဘဲ ရုရှားမှ အိုလံပစ် အားကစားအဖွဲ့ဆိုသော အမည်ဖြင့် ဖေဖော်ဝါရီလတွင် တောင်ကိုရီးယားသို့ စေလွှတ်သွားမည်ဟု ပြောကြားခဲ့သည်။

ရုရှားက တားမြစ်ဆေး ကိစ္စနှင့် ပတ်သက်၍ အစဉ်တစိုက် ငြင်းဆန်ခဲ့သော်လည်း စစ်ဆေးမှုများအရ ရုရှား အားကစားသမား အများအပြားတွင် တားမြစ်ဆေး သုံးစွဲမှုများ ရှိနေကြောင်း ဖော်ထုတ် တွေ့ရှိခဲ့သည်။

တောင်ကိုရီးယားတွင် ဆောင်းရာသီ အိုလံပစ် ပြိုင်ပွဲကို ဖေဖော်ဝါရီ ၉ ရက်၌ စတင်ကျင်းပမည်ဖြစ်ပြီး ရုရှားကို ပိတ်ပင်ထားခြင်းကြောင့် အစဉ်အလာ အကြီးဆုံး အိုလံပစ် အားကစားနိုင်ငံတစ်ခု ပါဝင်တော့မည် မဟုတ်ကြောင်း သတင်းများက ဖော်ပြသွားသည်။

Ref: BBC

Top News