ပုပ္ပားရှိ ဒေါ်အောင်ဆန်းစုကြည်ပိုင်သောခြံတွင် ကွန်ပျူတာသင်တန်းကျောင်းဖွင့်မည်

ခြံဝင်းထဲရှိ နေအိမ်အတွင်း သင်တန်းဖွင့်ရန် ပြင်ဆင်ထားစဉ်(ဓာတ်ပုံ − မင်းစံ)

 ပုပ္ပားရှိ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ပိုင်ဆိုင်သော ခြံတွင် ဒေသခံများ၊ ၀န်ထမ်းများနှင့် ကျောင်းသားများအတွက် ပထမဆုံးအကြိမ် ကွန်ပျူတာသင်တန်းကျောင်းဖွင့်လှစ်မည်ဟု ခြံယာယီ တာဝန်ခံ ကိုမင်းစံက ပြောသည်။

ပုပ္ပား-ကျောက်ပန်းတောင်း-မြင်းခြံသုံးပွင့်ဆိုင်လမ်းခွဲအနီး တွင် ဒေါ်အောင်ဆန်းစုကြည်ပိုင် ဆိုင်သော နှစ်ဧကကျော်ကျယ် ၀န်းသည့် ခြံရှိပြီး ယခုအခါ ဒေါ်ခင်ကြည်ဖောင်ဒေးရှင်းက ဦးဆောင် ကာကွန်ပျူတာသင်တန်းကျောင်း ဖွင့်လှစ်ရန် အကောင်အထည် ဖော်နေသည်။


‘‘လာမယ့် တစ်ပတ် ဗုဒ္ဓဟူး နေ့ (ဒီဇင်ဘာ ၁၃ ရက်)မှာ သင် တန်းစဖွင့်တော့မယ်။ သင်တန်း ကျောင်းဖွင့်ပွဲကတော့ ဇန်န၀ါရီ မှာလုပ်မယ်။ အခုက လျှောက်တဲ့ သူအရမ်းများနေတယ်’’ဟု ကိုမင်း စံက ပြောသည်။

သင်တန်းဖြစ်မြောက်ရေး ဦး ဆောင်နေသူ ဒေါ် ခင်ကြည်ဖောင်ဒေးရှင်းရွေ့လျားစာကြည့်တိုက် လက်ထောက်စာကြည့်တိုက်မှူး ကိုစောညီစံက ကွန်ပျူတာသင်တန်းကျောင်းကို ကွန်ပျူတာအလုံးရေ ၂၀ ဖြင့် စတင်မည်ဖြစ်ပြီး သင်တန်းသား ၄၀ ပထမဆုံးလက်ခံထားကြောင်းပြောသည်။ ကျောင်းဖွင့်ပွဲကို ၂၀၁၈ ဇန်န၀ါရီ ပထမပတ်တွင်ပြုလုပ်ရန် စီစဉ်ထားကြောင်း ပြောသည်။

ဒီဇင်ဘာ ၁၃ ရက်တွင် စတင်မည့် ယင်းသင်တန်း၌ ဗုဒ္ဓဟူး၊ ကြာသပတေး၊ သောကြာနေ့များ ၌ ဒေသခံလူငယ် ၂၀ အား သင်ကြားမည်ဖြစ်ပြီး စနေနှင့် တနင်္ဂနွေနေ့တွင် ကျောင်းသား၊ ကျောင်းသူများနှင့် ၀န်ထမ်းစုစုပေါင်း ၂၀ ဦးအား သင်ကြားမည်ဟု ကိုမင်းစံက ပြောသည်။ တနင်္လာနေ့နှင့် အင်္ဂါနေ့ကို ပိတ်ရက်အဖြစ် သတ်မှတ်ထားသည်။

 ဒေါ်အောင်ဆန်းစုကြည် သည် နေအိမ်အကျယ်ချုပ်မှ ၂၀၁၀ နိုဝင်ဘာ ၁၃ ရက်က လွတ်မြောက်ပြီးနောက် သားငယ်ကင်မ် အဲရစ်နှင့်အတူ ပုဂံသို့ အပန်းဖြေသွားရောက်ရာမှ ယင်းခြံကို တွေ့ရှိကာ ၀ယ်ယူခဲ့သည်။ လူငယ်များအတွက် ဘာသာစကားသင်တန်းများနှင့် အသက်မွေးဝမ်းကျောင်း သင်တန်းများကို ဒေါ်ခင်ကြည်ဖောင်ဒေးရှင်းက ဦးဆောင်ကာ ယင်းခြံတွင် ဖွင့်လှစ်ရန် စီစဉ်နေသည်။

Top News