ထိုင်းတွင် မြန်မာအပါအဝင် လုပ်သားများ၏ တစ်ရက်လုပ်ခကို ၁၅ ဘတ် တိုးမြှင့်ရန် ဆွေးနွေးမည်ဟု ထိုင်းအစိုးရကြေညာ

ထိုင်းနိုင်ငံတွင် မြန်မာ လုပ်သားများ အပါအဝင် နိုင်ငံခြားသားလုပ်သားများ၏ တစ်ရက်လုပ်အားခကို ၁၅ ဘတ် (ကျပ် ၆၀၀) တိုးမြှင့်ပေးရေး အတည်ပြုရန် ဒီဇင်ဘာ ၁၅ ရက်တွင် ဆွေးနွေးမည်ဖြစ်ကြောင်း ထိုင်းအစိုးရက ကြေညာသည်။

ထိုင်းနိုင်ငံတွင် အလုပ်လုပ် ကိုင်နေသော မြန်မာလုပ်သားများ အပါအဝင် နိုင်ငံခြားသားလုပ်သားများသည် တစ်ရက်လုပ် အားခများကို နယ်မြေအလိုက် သတ်မှတ်သည့် နှုန်းထားအတိုင်း ရရှိနေသည်။


 ဘန်ကောက်နယ်မြေတွင် တစ်ရက်လုပ်ခသည် ဘတ် ၃၁၀ (ကျပ် ၁၂,၀၀၀ ကျော်) အမြင့် ဆုံးရရှိပြီး အခြားဒေသများတွင် နယ်မြေအလိုက် ၃၀၈ ဘတ်နှင့် ၃၀၅ ဘတ် အသီးသီးရရှိနေ ကြောင်း ထိုင်းနိုင်ငံဆိုင်ရာ မြန်မာ သံရုံး အလုပ်သမားသံအရာရှိ ဦးဆန်းမောင်ဦးကပြောသည်။

‘‘တိုးပေးမယ်လို့တော့ ကြား တယ်။ ဒါပေမဲ့ အော်ဒါတွေတော့ မထွက်သေးဘူးပေါ့။ မြန်မာလုပ် သားတွေရော အပါအဝင်ပေါ့။ နိုင်ငံခြားသား အလုပ်သမားတွေ အကုန်လုံးပါတာပေါ့’’ဟု ဦးဆန်း မောင်ဦးကပြောသည်။

ထိုင်းရောက် မြန်မာလုပ် သားများအား သတင်းများ ပြန် ကြားပေးနေသော ထိုင်းအဖွဲ့အ စည်း အစ်ဆာရာ မြန်မာ- Issaraက အခြေခံလုပ်အားခတိုးမြှင့်ရေး အတည်ပြုဆွေးနွေးရန် ယခုလ၁၅ ရက်တွင် ကော်မတီအစည်း အဝေး ပြုလုပ်မည်ဖြစ်ကြောင်း၊ ဒေသအလိုက် လက်ရှိရနေသည့် လုပ်အားခထက် ၅ ရာခိုင်နှုန်း(၁၅ ဘတ်) တိုးပေးတော့မည်ဖြစ် ၍ နှစ်သစ်တွင် မြန်မာလုပ်သားများ သတင်းကောင်းကြားရတော့ မည်ဖြစ်ကြောင်း ဇန်နဝါရီ ၃ ရက် တွင် ကြေညာထားသည်။

‘‘အတိအကျက လလယ်ပိုင်းမှ ကြေညာမယ်။ ၁၅ ဘတ်ထက် ပိုတိုးပေးနိုင်တယ်လို့ ပြောတယ်။ လစာတိုးတာ နိုင်ငံသား၊ နိုင်ငံ ခြားသားမခွဲဘူး။ အားလုံးတန်းတူ ပါပဲ။ အစည်းအဝေးလုပ်မယ်။ ပြီးရင် ကက်ဘိနက် (အစိုးရအဖွဲ့ အစည်းအဝေး)တင်ပြီး ကြေညာ ပေးမယ်လို့ ထိုင်းအစိုးရက ကြေ ညာထားတယ်’’ဟု ထိုင်းရောက် မြန်မာလုပ်သားများအရေး ကူညီ ပေးနေသော ရွှေ့ပြောင်းအလုပ် သမားအခွင့်အရေး ကွန်ရက် (MWRN) ဥက္ကဋ္ဌ ဦးစိန်ဌေးကပြောသည်။

ထိုင်းအစိုးရက တစ်ရက် လုပ်အားခ ၁၅ ဘတ် တိုးမြှင့်ပေး ပါက မြန်မာလုပ်သားများ လက်ရှိထက် တစ်လ ကျပ် ၁၈,၀၀၀ ပိုရမည်ဖြစ်သည်။

မြန်မာနိုင်ငံတွင် တစ်ရက် အနည်းဆုံးလုပ်ခလစာ ကျပ် ၃,၆၀၀ ဖြစ်ပြီး မကြာမီက ပြောင်း လဲသတ်မှတ်သောနှုန်းထား ကျပ် ၄,၈၀၀ ဖြစ်သည်။

ယင်းနှုန်းထားကို သဘောမတူပါက ရက် ၆၀ အတွင်း ကန့်ကွက်ရမည်ဖြစ်ပြီး အလုပ်ရှင်အ ချို့က များလွန်းသည်ဟုဆိုကာ မပေးနိုင်ကြောင်း သဘောထားပြုပြီး အလုပ်သမားများက ၎င်းတို့တောင်းဆိုသည့်နှုန်းထက် နည်းနေ၍ သဘောမတူပေ။

ထိုင်းနိုင်ငံတွင် မြန်မာလုပ် သား လေးသန်းကျော် အလုပ်လုပ်နေသည်။

ထိုင်းအစိုးရသည် တရား မဝင် မြန်မာလုပ်သားများ အပါအဝင် နိုင်ငံခြားသားလုပ်သား များကို ဖမ်းဆီးခြင်းမပြုရန် ဆိုင်းငံ့ကာလ ခြောက်လကို ဒီဇင်ဘာ ၂၈ ရက်က ထပ်မံတိုးမြှင့်ပေးထား သည်။

More in News Section

Top News