၂၁ ရာစုပင်လုံတွင် တင်ပြနိုင်ရေး ဒေသကိုးခု၌ ကရင်လူထုသဘောထားရယူရန် KNDCC ဆုံးဖြတ်

 ပြည်ထောင်စုငြိမ်းချမ်း ရေးညီလာခံ- ၂၁ ရာစုပင်လုံအ စည်းအဝေးများတွင် ကရင်လူထု လိုလားချက်များ ထပ်မံတင်ပြနိုင် ရေး ကရင်လူမျိုးများနေထိုင်ရာ ဒေသကိုးခု၌ လူထုသဘောထားရယူရန် ကရင်အမျိုးသားနိုင်ငံရေးဆွေးနွေးပွဲကျင်းပရေးကော်မတီ (KNDCC)က ဆုံးဖြတ်ခဲ့သည်။

KNDCC အစည်းအဝေးကို ဇန်န၀ါရီ ၅ ရက်နှင့် ၆ ရက်တွင်ဘားအံမြို့၌ ပြုလုပ်ရာ ကရင် ပြည်နယ်၊ မွန်ပြည်နယ်၊ ကရင်နီ (ကယား)ပြည်နယ်၊ ရန်ကုန်၊ ဧရာ ၀တီ၊ ပဲခူး၊ တနင်္သာရီ၊ အထက် မြန်မာပြည်နှင့် နယ်စပ်ဒေသများ စသည့် ကရင်လူမျိုးများနေထိုင် ရာ ဒေသကိုးခုတွင် လူထုသဘော ထားရယူရန် အစည်းအဝေးက ဆုံးဖြတ်ခဲ့သည်ဟု အစည်းအဝေး အကျိုးဆောင် စောထွန်းထွန်းက ပြောသည်။


‘‘ပိုပြီးတော့ ကောင်းသွား တာက ကရင် CSO တွေနဲ့ ကရင် အမျိုးသမီးကိုယ်စားလှယ်တွေကို ဆွေးနွေးဆုံးဖြတ်တဲ့နေရာမှာ ပါ ၀င်နိုင်ဖို့ ဒီအစည်းအဝေးကနေ ဆုံးဖြတ်တယ်။ ကရင်အစုအဖွဲ့အတွင်းမှာရော၊ လာမယ့် ၂၁ ရာစုပင်လုံမှာရောပေါ့’’ဟု ၎င်းကဆို သည်။

KNDCC ကို ကရင်အမျိုး သားအစည်းအရုံး (KNU) အပါအ ၀င် တစ်နိုင်ငံလုံးအပစ်အခတ်ရပ်စဲရေး သဘောတူစာချုပ် (NCA) လက်မှတ်ထိုးထားသည့် ကရင်လက်နက်ကိုင်အဖွဲ့သုံးဖွဲ့မှ ကိုယ်စားလှယ်များ၊ ကရင်နိုင်ငံရေးပါတီများမှ ကိုယ်စားလှယ်များ၊ ကရင် လူမှုအဖွဲ့အစည်းများမှ ကိုယ်စားလှယ်များနှင့် ဖွဲ့စည်းထားသည်။ NCA အရ ကျင်းပသည့် လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲကို ကရင်လူမျိုးများက ပထမဆုံးကျင်းပခြင်းဖြစ်ပြီး ၂၀၁၇ နှစ်ဆန်းပိုင်းက ဘားအံမြို့၌ ကျင်းပခဲ့သည်။

More in News Section